Views: 12
ដោយៈ ប.ខុន / ភ្នំពេញៈ ព្យុះទី៧ បានរលាយហើយ នៅព្រឹកថ្ងៃទី១១ ខែសីហា បន្ទាប់ពីបានដើរកាត់លើប្រទេសវៀតណាម ខាងជើង រហូតទៅដល់ក្នុងប្រទេសឡាវ ធ្វើឱ្យផ្ទៃមេឃ នៅ ក្នុងប្រទេសកម្ពុជា នៅបន្តអាប់អួរមួយថ្ងៃនេះទៀត ជាមួយនឹងការធ្លាក់ភ្លៀង កម្រិតខ្សោយ រហូតដល់ព្រឹកថ្ងៃទី១២ ខែសីហា បន្ទាប់ពីមានភ្លៀង ធ្លាក់ជោគជាំ ដល់កម្រិតជាង ១០០ មីលីម៉ែត្រ នៅខេត្តព្រះសីហនុ និងខេត្តកោះកុង រួចមក។
លោក ចាន់ យុត្ថា អ្នកនាំពាក្យ និងជារដ្ឋលេខាធិការ ក្រសួងធនធានទឹក និងឧតុនិយម បានប្រាប់ឱ្យរស្មីកម្ពុជាដឹង នៅថ្ងៃទី១១ ខែសីហា ឆ្នាំ២០២២ថាៈ ព្យុះទី៧ នៅព្រឹក ថ្ងៃទី១១ ខែសីហានេះ វាបានឡើងគោក ហើយបន្តដំណើរ ក្នុងកម្រិតជាវិសម្ពាធ ចូលជ្រៅ ទៅដល់ក្នុងទឹកដីប្រទេសឡាវ បន្ទាប់ពីបានដើរកាត់ លើប្រទេសវៀតណាម ខាងជើង។ ឯស្ថានភាពអាកាសធាតុ នៅក្នុងប្រទេសកម្ពុជា ផ្ទៃមេឃ នៅ មានសភាពអាប់អួរ មួយថ្ងៃនេះទៀត។
អ្នកនាំពាក្យក្រសួងជំនាញខាងលើ បាននិយាយឱ្យដឹងទៀតថាៈ សម្រាប់តំបន់មាត់សមុទ្រ នៅមានភ្លៀងរលឹម និងខ្យល់ មួយថ្ងៃនេះទៀត តែដល់ព្រឹកថ្ងៃស្អែក ផ្ទៃមេឃស្រឡះវិញ រហូតដល់ក្រោយថ្ងៃទី១៥ ខែសីហា ទើបមានភ្លៀងធ្លាក់ មកច្រើនជាថ្មី។
លោក គួច ចំរើន អភិបាលខេត្តព្រះសីហនុ បានប្រាប់ឱ្យរស្មីកម្ពុជាដឹង នៅថ្ងៃទី១១ ខែសីហានេះថាៈ ភ្លៀងធ្លាក់បន្តបន្ទាប់លើក្រុងព្រះសីហនុ ពេញមួយយប់ មានកម្រិត ដល់ ១០៨ មីលីម៉ែត្រ បានធ្វើឱ្យមានការលិចលង់ នៅកន្លែងទំនាបមួយចំនួន ក្នុងរយៈពេលខ្លី តែថ្ងៃបន្តិច ទឹកបានស្រកអស់ទៅវិញ។
លោក ហេង សោភ័ណរិទ្ធ ប្រធានមន្ទីរធនធានទឹក និងឧតុនិយម បានប្រាប់ឱ្យរស្មីកម្ពុជា ដឹង នៅថ្ងៃទី១១ ខែសីហាថាៈ ភ្លៀងរលឹមពេញមួយយប់ ដល់ព្រឹកលើក្រុងព្រះសីហនុ មានកម្រិតដល់ ១០៨ មីលីម៉ែត្រ ធ្វើឱ្យមានទឹកលិច ដោយសារហូរមិនទាន់ នៅភូមិទឹកភ្នែក តែថ្ងៃបន្តិច ទឹកបានស្រកអស់ទៅវិញ។ ថ្ងៃនេះ មេឃមានសភាពស្រឡះបន្តិច និងខ្យល់ ក៏ខ្សោយដែរ។ បរិមាណទឹកភ្លៀងធ្លាក់ រយៈពេល ២៤ ម៉ោង នៅស្រុកកំពង់សីលា មានកម្រិត ៣៥ មីលីម៉ែត្រ នៅស្រុកព្រៃនប់ ៧១ មីលីម៉ែត្រ នៅស្រុកស្ទឹងហាវ ៨៦ មីលីម៉ែត្រ និងនៅក្រុងព្រះសីហនុ មានកម្រិត ១០៨ មីលីម៉ែត្រ។
របាយទឹកភ្លៀង ធ្លាក់រយៈពេល ២៤ ម៉ោង ត្រឹមព្រឹកថ្ងៃទី១១ ខែសីហា នៅខេត្តព្រះសីហនុ មានកម្រិតពី ៣៥ ដល់ ១០៨ មីលីម៉ែត្រ, ខេត្តឧត្តរមានជ័យ មានកម្រិតពីតិច ដល់ ៤៣ មីលីម៉ែត្រ, ខេត្តប៉ៃលិន មានកម្រិតពី ៦ ដល់ ២៤ មីលីម៉ែត្រ, ខេត្តរតនគិរី មានកម្រិតពីតិច ដល់ ២៧ មីលីម៉ែត្រ, ខេត្តកំពង់ធំ មានកម្រិតពី ១៧ ដល់ ១៩ មីលីម៉ែត្រ, ខេត្តកោះកុង មានកម្រិតពី ៥៩ ដល់ ១៣៥ មីលីម៉ែត្រ, ខេត្តបាត់ដំបង មានកម្រិតពី ១៥ ដល់ ២២ មីលីម៉ែត្រ, ខេត្តកំពង់ឆ្នាំង មានកម្រិតពី ២ ដល់ ៤២ មីលីម៉ែត្រ, ខេត្តស្ទឹងត្រែង មានកម្រិតពី ១៣ ដល់ ៣៨ មីលីម៉ែត្រ, ខេត្តព្រះវិហារ មានកម្រិតពី ៥ ដល់ ៣៩ មីលីម៉ែត្រ, ខេត្តសៀមរាប មានកម្រិតពីតិច ដល់ ៤១ មីលីម៉ែត្រ, ខេត្តកណ្តាល មានភ្លៀងតិចតួច កម្រិតផ្សែងក្រូច, ខេត្តក្រចេះ មានភ្លៀងកម្រិតពីតិច ដល់ ២៧ មីលីម៉ែត្រ, ខេត្តបន្ទាយមានជ័យ មានភ្លៀងកម្រិតពីតិច ដល់ ២៦ មីលីម៉ែត្រ, ខេត្តមណ្ឌលគិរី មានភ្លៀងកម្រិតពី ៦ ដល់ ៨៦ មីលីម៉ែត្រ, ខេត្តកំពង់ស្ពឺ មានភ្លៀង កម្រិតពីតិចដល់ ២១ មីលីម៉ែត្រ, ខេត្តកែប មានភ្លៀងកម្រិតពី ១២ ដល់ ២៤ មីលីម៉ែត្រ, ខេត្តតាកែវ មានភ្លៀងកម្រិតពី ៤ ដល់ ១៧ មីលីម៉ែត្រ, ខេត្តពោធិសាត់ មានភ្លៀងពីតិច ដល់ ២៨ មីលីម៉ែត្រ, ខេត្តកំពត មានភ្លៀងកម្រិតពីតិច ដល់ ១៣ មីលីម៉ែត្រ និងខេត្តកំពង់ចាម មានភ្លៀងកម្រិតពីតិច ដល់ ១៦ មីលីម៉ែត្រ។
ក្រសួងធនធានទឹក និងឧតុនិយម នៅថ្ងៃទី៩ ខែសីហា បានជូនដំណឹង ស្តីពីការព្យាករ ធាតុអាកាស សម្រាប់ពីថ្ងៃទី១០ ដល់ថ្ងៃទី១៦ ខែសីហា ឆ្នាំ២០២២ថាៈ នៅចន្លោះ ពីថ្ងៃទី១០ ដល់ ១៣ ខែសីហា ប្រទេសកម្ពុជា ទទួលរងឥទ្ធិពល ពីជ្រលងនៃប្រព័ន្ធ សម្ពាធទាប ( ITCZ ) អូសបន្លាយកាត់លើភាគខាងជើង ប្រទេសថៃ ,ឡាវ, វៀតណាម រួមជាមួយនឹងឥទ្ធិពលព្យុះទី៧ ឈ្មោះ មូឡេន (MULAN) ដែរមានដំណើរឆ្ពោះទៅ ភាគខាងជើង នៃប្រទេសវៀតណាម នៅថ្ងៃទី១១ ខែសីហា។
ក្នុងសេចក្តីជូនដំណឹង បានសរសេរទៀតថាៈ នៅអំឡុងពេលនោះ ខ្យល់មូសុងនិរតី បន្តបក់ខ្លាំងមកលើតំបន់មាត់សមុទ្រ។ បន្ទាប់ពីនោះ ប្រទេសកម្ពុជា នឹងទទួលរងឥទ្ធិពល ពីជ្រលងសម្ពាធទាបឥណ្ឌា និងខ្យល់មូសុងនិរតីខ្សោយ។ អាចបង្កឱ្យមានភ្លៀងធ្លាក់ ក្នុងកម្រិតពីខ្សោយទៅបង្គួរ លាយឡំទៅដោយផ្គរ រន្ទះនិងខ្យល់កន្ត្រាក់។
នៅក្នុងសេចក្តីជូនដំណឹង បានសរសេរថាៈ ស្ថានភាពបែបខាងលើ ធ្វើឲ្យបណ្តាខេត្ត នៅតំបន់វាលទំនាបកណ្តាល មានសីតុណ្ហភាព អប្បបរមាពី ២៣ ទៅ ២៥ អង្សាសេ និងសីតុណ្ហភាព អតិបរមា មានពី ៣៣ ទៅ ៣៥ អង្សាសេ។ អាចមានភ្លៀងធ្លាក់ នៅក្នុងកម្រិតពីខ្សោយទៅមធ្យមក្នុងនោះ អាចមានភ្លៀងធ្លាក់បង្គួរ ដោយអន្លើ លាយឡំទៅដោយផ្គរ រន្ទះ និងខ្យល់កន្ត្រាក់។
សម្រាប់បណ្តាខេត្ត នៅជាប់ជួរភ្នំដងរែក និងខ្ពង់រាបភាគឦសាន មានសីតុណ្ហភាព អប្បបរមាពី ២២ ទៅ ២៤ អង្សាសេ និងសីតុណ្ហភាពអតិបរមា មានពី ៣៣ ទៅ ៣៥ អង្សាសេ។ អាចមានភ្លៀង នៅក្នុងកម្រិតពីតិចទៅបង្គួរ លាយឡំទៅដោយ ផ្គរ រន្ទះ និងខ្យល់កន្ត្រាក់។
តំបន់មាត់សមុទ្រ មានសីតុណ្ហភាពអប្បបរមា មានពី ២៣ ទៅ ២៥ អង្សាសេ និងសីតុណ្ហភាពអតិបរមា មានពី ៣១ ទៅ ៣៣ អង្សាសេ។ នៅចន្លោះថ្ងៃទី១០ ដល់ ១២ ខែសីហា អាចមានភ្លៀងធ្លាក់ច្រើន ដែលជាហេតុធ្វើឲ្យផ្នែកមួយចំនួន នៅក្នុងភូមិសាស្ត្រ ខេត្តកោះកុង និងខេត្តព្រះសីហនុ ប្រឈមនឹងជំនន់ទឹកភ្លៀង ។ នៅលើផ្ទៃសមុទ្រ អាចមានភ្លៀងខ្យល់ បក់បោកខ្លាំង និងមានរលកសមុទ្រខ្ពស់ ។ បន្ទាប់ពីនោះ ភ្លៀងនឹងថមថយ មកក្នុងកម្រិតពីតិចទៅមធ្យម៕/V
