Views: 1
ប្រែសម្រួល : កញ្ញាដាលីស (ដេល្លីម៉េល) ៖ ទីភ្នាក់ងារព្យាករណ៍អាកាសធាតុជាតិបាននិយាយថា ព្យុះទីហ្វុងណូរុ (Noru)បានបោកបក់ចូលឆ្នេរសមុទ្រភាគកណ្តាលរបស់ប្រទេសវៀតណាមកាលពីព្រឹកថ្ងៃពុធទី២៨កញ្ញា ដោយបាននាំមកនូវខ្យល់បក់ខ្លាំងនិងភ្លៀងធ្លាក់ខ្លាំង ខណៈមនុស្សរាប់សែននាក់បានភៀសខ្លួននៅតាមទីជម្រក។
នៅទីក្រុងដាណាង ដែលជាទីក្រុងធំទីបីរបស់វៀតណាម អគារខ្ពស់ៗបានអង្រួនដោយសារខ្យល់ព្យុះដ៏ខ្លាំង ដែលបានផ្តួលរលំដើមឈើ និងគាស់បំប៉ើងដំបូលផ្ទះនៅទូទាំងតំបន់ភាគកណ្តាល។ការដាច់ចរន្តអគ្គិសនីទ្រង់ទ្រាយធំត្រូវបានរាយការណ៍។
មជ្ឈមណ្ឌលជាតិសម្រាប់ការព្យាករណ៍ឧតុនិយមបាននិយាយថា “ស្នូលរបស់ព្យុះទីហ្វុងនៅម៉ោង ៤៖០០ ព្រឹកថ្ងៃទី ២៨ ខែកញ្ញាគឺនៅចន្លោះទីក្រុងដាណាង និងខេត្តក្វាងណាម (Quang Nam)”ដោយបន្ថែមថា ល្បឿនខ្យល់គឺពី ១០៣ ទៅ ១១៧ គីឡូម៉ែត្រក្នុងមួយម៉ោង។
មនុស្សជាង ២០០.០០០ នាក់នៅក្នុងប្រទេសវៀតណាមបានជ្រកកោននៅតាមទីជម្រកពេញមួយយប់បន្ទាប់ពីអ្នកព្យាករណ៍បានព្យាករណ៍ថាព្យុះនេះនឹងក្លាយជាព្យុះដ៏ធំបំផុតមួយដែលវាយប្រហារប្រទេសអាស៊ីអាគ្នេយ៍មួយនេះ។
ល្បឿនខ្យល់គឺយឺតជាងការបារម្ភពីដំបូង ប៉ុន្តែអ្នកព្យាករណ៍និយាយថា ភ្លៀងធ្លាក់ខ្លាំងនឹងបន្តពេញមួយថ្ងៃ ហើយព្រមានពីការបាក់ដីនិងទឹកជំនន់ធ្ងន់ធ្ងរ។
ប្រព័ន្ធផ្សព្វផ្សាយរដ្ឋបាននិយាយថា ក្រសួងការពារជាតិបានចល័តទាហានប្រហែល ៤០.០០០ នាក់ និងសមាជិកកងជីវពល ២០០.០០០ នាក់ ដោយបំពាក់ដោយរថពាសដែកនិងទូកដើម្បីត្រៀមសម្រាប់ប្រតិបត្តិការជួយសង្គ្រោះនិងផ្តល់ជំនួយ៕
ព្យុះទីហ្វុងណូរុវាយប្រហារទីក្រុងដាណាងកាលពីព្រលឹមថ្ងៃពុធ
