Views: 3
ដោយ: ប.ខុន / ភ្នំពេញ: ខណៈពេលព្យុះទី៧ បានដើរកាន់តែទៅកៀកនឹងឆ្នេររបស់ប្រទេសចិននៅខាងជើងកោះហៃណាំ ដោយមានដំណើរដូរការព្យាករមានវិសម្ពាធ TD មួយទៀត បានកើតមានឡើងនៅក្នុងសមុទ្រប៉ាស៊ីហ្វិកភាគអគ្នេយ៍នៃប្រទេសជប៉ុនតែមិនមានដំណើរមករកសមុទ្រចិនខាងត្បូងទេ។
លោក ចាន់ យុត្ថា អ្នកនាំពាក្យនិងជារដ្ឋលេខាធិការក្រសួងធនធានទឹកនិងឧតុនិយម បានប្រាប់ឱ្យរស្មីកម្ពុជាដឹងនៅថ្ងៃទី១០ខែសីហាឆ្នាំ២០២២ថា ព្យុះទី៧ឈ្មោះមូឡេន(MULAN) នៅព្រឹកថ្ងៃទី១០ខែសីហានេះ វាបានដើរទៅដល់ខាងជើងកោះហៃណាំទៅរកឆ្នេរប្រទេសចិន រួចដើរស្របតាមឆ្នេរចូលក្នុងឈូងសមុទ្រតុងកឹងមុននឹងទៅដល់ឆ្នេររបស់ប្រទេសវៀតណាមខាងជើងដូចការព្យាករ។
ឥទ្ធិពលរបស់កូនព្យុះទី៧ធ្វើឱ្យមានភ្លៀងរលឹលើបណ្តាខេត្តជាប់មាត់សមុទ្រ, មានភ្លៀងច្រើននៅតំបន់ខ្ពង់រាប ភាគខាងជើងនិងខ្ពង់រាបភាគឦសាន ជាពិសេសនៅតាមព្រំដែនកម្ពុជា ឡាវ។ ព្រមពេលព្យុះទី៧ បានដើរកាន់តែទៅកៀកនឹងឆ្នេររបស់ប្រទេសចិន មានវិសម្ពាធមួយទៀតបានកើតមានឡើងនៅភាគអគ្នេយ៍នៃប្រទេសជប៉ុនហើយ អាចវិវត្តទៅជាព្យុះទី៨ តែមិនមានដំណើរមករកសមុទ្រចិនខាងត្បូងទេ។
ក្រសួងធនធានទឹកនិងឧតុនិយមនៅថ្ងៃទី៩ខែសីហាបានជូនដំណឹងស្តីពីការព្យាករធាតុអាកាស សម្រាប់ពីថ្ងៃទី១០ដល់ថ្ងៃទី១៦ខែសីហាឆ្នាំ២០២២ថានៅ ចន្លោះពីថ្ងៃទី១០ដល់១៣ខែសីហាប្រទេសកម្ពុជាទទួលរងឥទ្ធិពលពីជ្រលង នៃប្រព័ន្ធសម្ពាធទាប ( ITCZ ) អូសបន្លាយកាត់លើភាគខាងជើងប្រទេសថៃ ,ឡាវ, វៀតណាម រួមជាមួយនឹងឥទ្ធិពលព្យុះទី៧ឈ្មោះមូឡេន(MULAN) ដែលមានដំណើរឆ្ពោះទៅភាគខាងជើង នៃប្រទេសវៀតណាមនៅថ្ងៃទី១១ខែសីហា។
ក្នុងសេចក្តីជូនដំណឹង បានសរសេរទៀតថា នៅអំឡុងពេលនោះខ្យល់មូសុងនិរតីបន្តបក់ខ្លាំងមកលើតំបន់មាត់សមុទ្រ។ បន្ទាប់ពីនោះប្រទេសកម្ពុជា នឹងទទួលរងឥទ្ធិពលពីជ្រលងសម្ពាធទាបឥណ្ឌានិងខ្យល់មូសុងនិរតីខ្សោយ។ អាចបង្កឱ្យមានភ្លៀងធ្លាក់ក្នុងកម្រិតពីខ្សោយទៅបង្គួរ លាយឡំទៅដោយផ្គរ រន្ទះនិងខ្យល់កន្ត្រាក់។
នៅក្នុងសេចក្តីជូនដំណឹងបានសរសេរថា ស្ថានភាពបែបខាងលើធ្វើឲ្យបណ្តាខេត្តនៅតំបន់វាលទំនាបកណ្តាល មានសីតុណ្ហភាពអប្បបរមាពី២៣ទៅ២៥អង្សាសេ និងសីតុណ្ហភាពអតិបរមា មានពី៣៣ទៅ៣៥អង្សាសេ។ អាចមានភ្លៀងធ្លាក់នៅក្នុងកម្រិតពីខ្សោយទៅមធ្យមក្នុងនោះ អាចមានភ្លៀងធ្លាក់បង្គួរដោយអន្លើ លាយឡំទៅដោយផ្គរ រន្ទះ និងខ្យល់កន្ត្រាក់។ សម្រាប់បណ្តាខេត្តនៅជាប់ជួរភ្នំដងរែក និងខ្ពង់រាបភាគឦសាន មានសីតុណ្ហភាពអប្បបរមាពី២២ទៅ២៤អង្សាសេ និងសីតុណ្ហភាពអតិបរមាមានពី៣៣ទៅ៣៥អង្សាសេ។ អាចមានភ្លៀងនៅក្នុងកម្រិតពីតិចទៅបង្គួរលាយឡំទៅដោយ ផ្គរ រន្ទះនិងខ្យល់កន្ត្រាក់។
តំបន់មាត់សមុទ្រមានសីតុណ្ហភាពអប្បបរមាមានពី២៣ទៅ២៥អង្សាសេ និងសីតុណ្ហភាពអតិបរមា មានពី៣១ទៅ៣៣អង្សាសេ។ នៅចន្លោះថ្ងៃទី១០ដល់១២ ខែសីហា អាចមានភ្លៀងធ្លាក់ច្រើន ដែលជាហេតុធ្វើឲ្យផ្នែកមួយចំនួននៅក្នុងភូមិសាស្ត្រខេត្តកោះកុង និងខេត្តព្រះសីហនុប្រឈមនឹងជំនន់ទឹកភ្លៀង។ នៅលើផ្ទៃសមុទ្រអាចមានភ្លៀងខ្យល់បក់បោកខ្លាំងនិងមានរលកសមុទ្រខ្ពស់។ បន្ទាប់ពីនោះភ្លៀងនឹងថមថយមកក្នុងកម្រិតពីតិចទៅមធ្យម៕