Views: 7
ដោយៈ ប.ខុន / ភ្នំពេញៈ ព្យុះណូរុ មកដល់វេលាជិតថ្ងៃត្រង់ ថ្ងៃទី២៨ ខែកញ្ញា បានរំកិលដល់ព្រំប្រទល់ប្រទេសវៀតណាម ឡាវ ហើយបន្តដំណើរក្នុងកម្រិតជាកូនព្យុះ ទៅរកព្រំប្រទល់ប្រទេសឡាវ ថៃ មុននឹងថយឥទ្ធិពល មកនៅក្នុងកម្រិតជាវិសម្ពាធ បន្ទាប់ពីដើរលើដីគោក របស់ប្រទេសវៀតណាម ជាព្យុះទីហ្វុង កម្រិត១ ធ្វើឱ្យមានភ្លៀង ធ្លាក់ពីជាង ២០០ ទៅជាង ៣០០ មីលីម៉ែត្រ ពេលវាដើរមកកៀកនឹងឆ្នេររបស់ប្រទេស វៀតណាម នោះ។
លោក ចាន់ យុត្ថា អ្នកនាំពាក្យ និងជារដ្ឋលេខាធិការ ក្រសួងធនធានទឹក និងឧតុនិយម បានប្រាប់ឱ្យរស្មីកម្ពុជាដឹង នៅថ្ងៃទី២៨ ខែកញ្ញា ឆ្នាំ២០២២ថាៈ ចំណុចកណ្តាល នៃព្យុះទីណូរុ នៅពេលនេះ (ម៉ោង ១០ ព្រឹក) កំពុងស្ថិតនៅលើព្រំប្រទល់ប្រទេស វៀតណាម ឡាវ ស្ថិតនៅជាព្យុះទីហ្វុង កម្រិត១ ដោយបន្តដំណើរកាត់ប្រទេសឡាវ ទៅដល់ព្រំប្រទល់ រវាងប្រទេសថៃ ឡាវ នឹងថយឥទ្ធិពល មកនៅក្នុងកម្រិតជាកូនព្យុះ មុនថយចុះមកនៅកម្រិតជាវិសម្ពាធ។
អ្នកនាំពាក្យក្រសួងជំនាញខាងលើ បាននិយាយ ដោយយោងតាមមជ្ឈមណ្ឌលជាតិ សម្រាប់ការព្យាករណ៍ជលសាស្ត្រ និងឧតុនិយមរបស់វៀតណាមថាៈ នៅក្នុងអំឡុងពេល ព្យុះ បានដើរមកដល់កៀកឆ្នេរ ធ្វើឱ្យតំបន់ខ្លះ នៃភាគកណ្តាលប្រទេសវៀតណាម មានភ្លៀងធ្លាក់ ក្នុងកម្រិតពីជាង ២០០ មីលីម៉ែត្រ ទៅដល់ជាង ៣០០ មីលីម៉ែត្រ ហើយភ្លៀងនៅតែបន្តធ្លាក់ថែមទៀត។ ការខូចខាតកម្រិតណា មិនទាន់មានព័ត៌មាន នៅឡើយទេ។
ក្រសួងធនធានទឹក និងឧតុនិយម កាលពីថ្ងៃទី២៧ ខែកញ្ញា ឆ្នាំ២០២២ បានជូនដំណឹង ស្តីពីស្ថានភាពធាតុអាកាស សម្រាប់ពីថ្ងៃទី២៨ ខែកញ្ញា ដល់ថ្ងៃទី៤ ខែតុលា ថាៈ នៅថ្ងៃទី២៨ និង ២៩ ខែកញ្ញា ប្រទេសកម្ពុជា បន្តទទួលរងឥទ្ធិពលពីព្យុះទី១៦ ឈ្មោះ ណូរុ (NORU)។ ព្យុះនេះ នឹងចូលលើប្រទេសវៀតណាម ភាគកណ្ដាល នៅវេលាម៉ោង ០១ យប់ថ្ងៃទី២៨ ខែកញ្ញា ក្នុងកម្រិតជា (STS) រួចបន្ថយឥទ្ធិពល ទៅជាវិសម្ពាធ (TD) ដើរលើតំបន់អាងទន្លេមេគង្គ មុននឹងថមថយឥទ្ធិពល ទៅជាសម្ពាធទាប (LOW) ។ បន្ទាប់មក ប្រទេសកម្ពុជា ទទួលរងឥទ្ធិពលពីជ្រលង សម្ពាធទាបឥណ្ឌា និងខ្យល់មូសុងនិរតី ក្នុងកម្រិតមធ្យម ។
សេចក្តីជូនដំណឹងខាងលើ បានសរសេរទៀតថាៈ ស្ថានភាពអាកាសធាតុបែបខាងលើ ធ្វើឲ្យតំបន់ទំនាបកណ្តាល មានសីតុណ្ហភាព អប្បបរមាពី ២២ ទៅ ២៤ អង្សាសេ សីតុណ្ណភាព អតិបរមា មានពី ៣០ ទៅ ៣២ អង្សាសេ។ នៅថ្ងៃទី២៨ និងទី២៩ ខែកញ្ញា បណ្ដាខេត្តក្នុងភូមិសាស្ត្រជាប់ព្រំដែនថៃ អាចមានភ្លៀង ក្នុងកំរិតពីបង្គួរទៅច្រើន លាយឡំទៅដោយផ្គរ រន្ទះ និងខ្យល់កន្ត្រាក់។ រីឯរាជធានី និងបណ្តាខេត្តដទៃទៀត អាចមានភ្លៀងធ្លាក់ ក្នុងកំរិតពីតិចទៅបង្គួរ។ បន្ទាប់ពីនោះ ភ្លៀងអាចធ្លាក់ ក្នុងកម្រិតពី ខ្សោយទៅមធ្យម ។
សម្រាប់តំបន់ខ្ពង់រាប មានសីតុណ្ហភាពអប្បបរមាពី ២១ ទៅ ២៣ អង្សាសេ សីតុណ្ហភាព អតិបរមាមានពី ២៩ ទៅ ៣១ អង្សាសេ ។ នៅថ្ងៃទី២៨ និងទី២៩ ខែកញ្ញា អាចមានភ្លៀងធ្លាក់ ក្នុងកម្រិតពីបង្គួរទៅច្រើន លាយឡំទៅដោយផ្គរ រន្ទះ និងខ្យល់កន្ត្រាក់ ។ ចាប់ពីថ្ងៃទី៣០ ខែកញ្ញាទៅភ្លៀងអាចធ្លាក់ក្នុងកំរិតពីខ្សោយ ទៅបង្គួរ។
នៅតំបន់មាត់សមុទ្រ មានសីតុណ្ហភាពអប្បបរមា ពី ២២ ទៅ ២៤ អង្សាសេ សីតុណ្ណភាពអតិបរមា មានពី ២៨ ទៅ ៣០ អង្សាសេ ។ អាចមានភ្លៀងក្នុងកំរិត ពីមធ្យមទៅច្រើន លាយឡំទៅដោយផ្គរ រន្ទះ និងខ្យល់កន្ត្រាក់។ នៅលើផ្ទៃសមុទ្រ អាចមានភ្លៀងលាយឡំ និងខ្យល់បក់បោកខ្លាំងរលកសមុទ្រខ្ពស់ៗ បន្តរហូតដល់ថ្ងៃទី៣០ ខែកញ្ញា។
យោងលើស្ថានភាពធាតុអាកាស ដូចបានជម្រាបជូនខាងលើ ក្រសួងធនធានទឹក និងឧតុនិយម បានសូមអាជ្ញាធរដែនដី និងសាធារណជន ជ្រាបជាព័ត៌មាន និងបន្តប្រុងប្រយ័ត្ន ចំពោះបាតុភូតធម្មជាតិ ដែលអាចកើតមានឡើងជាយថាហេតុ៕ V / N
