Views: 10
ដោយៈ សុខុម / ស្ទឹងត្រែងៈ សមត្ថកិច្ចបានឲ្យដឹង នៅព្រឹកថ្ងៃទី២៧ ខែកញ្ញា ឆ្នាំ២០២២ នេះថាៈ ករណីឃាតកម្មសម្លាប់បុរសម្នាក់កាលពីថ្ងៃទី១៦ ខែកញ្ញា នៅចំណុចក្បែរបង្គោលសេវាទូរសព្ទ ស្ថិតក្នុងភូមិរិទ្ធីសែនជ័យ២ ឃុំអូរស្វាយ ស្រុកបូរីអូស្វាយសែនជ័យសមត្ថកិច្ចជំនាញ បានឃាត់ខ្លួនជនសង្ស័យពីរនាក់ នៅថ្ងៃទី២៥ កញ្ញា ថ្មីៗនេះ។
លោក វ៉ា សុផាន់ ស្នងការរងនគរបាលខេត្តស្ទឹងត្រែង បានឱ្យដឹងថាៈ ជនសង្ស័យទាំងពីរនាក់ ដែលឃាត់ខ្លួនបានទី១ ឈ្មោះ ជាតិ សារ៉ូភេទប្រុស អាយុ ១៨ឆ្នាំ និងទី២ ឈ្មោះ គង់ សំអឿន ហៅ ម៉ាប់ ហៅក្តឿ ភេទប្រុស អាយុ ២៧ ឆ្នាំ។ ពួកគេទាំងពីរនាក់ រស់នៅភូមិរិទ្ធីសែនជ័យ២ ឃុំអូរស្វាយ ស្រុកបូរីអូរស្វាយសែនជ័យ។ ចំណែកជនរងគ្រោះ ឈ្មោះ ថេន សុមិត្ត ភេទប្រុស អាយុ១៩ឆ្នាំ រស់នៅភូមិកោះកី ឃុំកោះស្នៃង ស្រុកបុរីអូរស្វាយសែនជ័យ ខេត្តស្ទឹងត្រែង។
លោកស្នងការរងនគរបាលខេត្ត បានបញ្ជាក់ថាៈករណីឃាតកម្ម ខាងលើនេះ យោងតាមការឆ្លើយបំភ្លឺរបស់ជនសង្ស័យ បានប្រាប់ថាដើមហេតុបណ្ដាលឲ្យឈានដល់ការសម្លាប់ជនរងគ្រោះ គឺបណ្ដាលមកពីជនរងគ្រោះ លក់ថ្នាំញៀនមិនមានសារធាតុសុទ្ធ ហើយចងគំនុំនឹងគ្នា រវាងជនសង្ស័យ និងជនរងគ្រោះណាត់ជួបគ្នាទិញថ្នាំញៀន យកទៅជក់ជាលើកទី២ រួចក៏វាយសម្លាប់ដោយដាក់ខ្នោះដៃទុកសពចោល។ ជនសង្ស័យ ក៏បានយកម៉ូតូជនរងគ្រោះ គេចខ្លួនបាត់រហូតដល់សមត្ថកិច្ចចាប់ខ្លួន។ ចំណែកខ្នោះដៃ សមត្ថកិច្ចមិនទាន់បញ្ជាក់ពីប្រភពច្បាស់លាស់នៅឡើយទេ៕ V / N
