Views: 1
ប្រែសម្រួល : កញ្ញាដាលីស (ដេល្លីម៉េល) ៖ មើលមួយភ្លែត វាហាក់ដូចជាឆ្កែយន្តសម្រាប់សង្គ្រាមនាពេលអនាគតដ៏គួរឱ្យខ្លាច ពោលគឺជាឆ្កែយន្តប្រដាប់ដោយកាំភ្លើងបាញ់គ្រាប់បែកដៃដែលរចនាឡើងដើម្បីប្រមាញ់និងបាញ់កម្ទេចរថក្រោះ។
Video of the M-81 robot-dog armed with an RPG-26 at the Army 2022 defense expo. https://t.co/rUnwoCMoyS pic.twitter.com/BEDjnwstN0
— Rob Lee (@RALee85) August 15, 2022
ប៉ុន្តែនៅពេលពិនិត្យកាន់តែដិតដល់ទៅ អាវុធថ្មី ដែលដាក់បង្ហាញនៅឯពិព័រណ៍ការពារជាតិឆ្នាំ២០២២របស់រុស្ស៊ីក្នុងទីក្រុងមូស្គូ តាមពិតទៅហាក់ដូចជា “រ៉ូបូតជំនួយការចាំផ្ទះ” របស់ចិនដែលគ្រប់គ្នាអាចទិញតាមអ៊ីនធឺណិតក្នុងតម្លៃត្រឹមតែ ២.៥០០ ផោន។
ឆ្កែរ៉ូបូតនេះត្រូវបានរចនាឡើងដើម្បីដើរតាមដៃគូជាមនុស្សនៅជុំវិញផ្ទះដូចសត្វចិញ្ចឹមពិតៗ អាចផ្ទុកទម្ងន់ស្រាលត្រឹមបីគីឡូក្រាម ឬ ទម្ងន់ប្រហែលកាំភ្លើងសម្រាប់បាញ់គ្រាប់បែកដែលមិនទាន់ញាត់គ្រាប់ ដោយមិនអាចទៅបំផ្ទុះរថពាសដែកស្អីនោះទេ។
បំពាក់ជាមួយកាំភ្លើង RPG-26 ឆ្កែយន្តនេះត្រូវគេបង្ហាញជាមួយការផ្ទុកទម្ងន់ប្រហែល ៤,៥ គីឡូក្រាម ដែលច្រើនហួសពេកហើយសម្រាប់វា។
តម្រុយនៃអត្តសញ្ញាណរបស់ឆ្កែរ៉ូបូតនេះត្រូវបានបិទបាំងដោយឈុតពណ៌ខ្មៅចម្លែកដែលពាក់ជុំវិញវា នៅពេលដែល “អ្នករចនារបស់វា”បានបង្ហាញវាទៅកាន់ប្រព័ន្ធផ្សព្វផ្សាយរដ្ឋកាលពីថ្ងៃចន្ទទី១៥សីហា។
ជាជាងបំពាក់ឈុតក្លែងកាយ សម្លៀកបំពាក់នេះហាក់ដូចជាត្រូវបានរចនាឡើងដើម្បីបោកបញ្ឆោតភ្នែករបស់អ្នកទស្សនាឱ្យគិតថាវាជារ៉ូបូតថ្មី។
ទោះយ៉ាងណា អ្នកលេងអ៊ីនធឺណិតរវៀសរវៃ បាននិយាយថា ក្បាលរាងឆកោណរបស់រ៉ូបូតនិងទីតាំងភ្នែកកាមេរ៉ាពីរគ្រាប់របស់វានៅខាងមុខ បានលាតត្រដាងពីការពិត។
ពួកគេជឿថា រ៉ូបូតនេះតាមពិតជាឆ្កែ Go1 Yushu Technology Dog ដែលផលិតដោយក្រុមហ៊ុនឈ្មោះថា Unitree។
ការផ្សាយពាណិជ្ជកម្មនៅលើវេបសាយចិន AliExpress បង្ហាញថា សត្វឆ្កែនេះអាចទិញបានក្នុងតម្លៃចន្លោះពី ២.៥០០ ទៅ ៣.០០០ ផោន។
នៅក្នុងប្រទេសរុស្ស៊ី ឆ្កែ Go1 ត្រូវបានលក់ដោយក្រុមហ៊ុនឈ្មោះថា Robosobaka ដែលមានទំនាក់ទំនងជាមួយក្រសួងកិច្ចការផ្ទៃក្នុងនិងក្រសួងគ្រាអាសន្ន នេះបើយោងតាមវេបសាយ The Insider ។
ក្រុមហ៊ុន Robosobaka និយាយថា ឆ្កែនេះមិនអាចឆ្លងកាត់ដីសើម ឬដីភក់បានទេ ព្រោះវាមិនមានប្រព័ន្ធការពារជម្រៀបទឹកគ្រប់គ្រាន់ឬការពារពីភាពកខ្វក់ មិនអាចដើរលើដីរដិបរដុបបាន និងដើរបានតែក្នុងអាកាសធាតុមានពន្លឺថ្ងៃប៉ុណ្ណោះ។
ការពិនិត្យរបស់អតិថិជននៅលើវេបសាយចិនខាងលើក៏លើកឡើងផងដែរថា ថ្មរបស់វាមានទំហំធំល្មមអាចដំណើរការបានរយៈពេលពីរម៉ោង ហើយពេលខ្លះដើរបានតិចជាង ៣០ នាទី៕
អ្នកលេងអ៊ីនធឺណិតជឿថាឆ្កែយន្តដែលរុស្ស៊ីបង្ហាញជាឆ្កែយន្តធម្មតាៗរបស់ចិនប៉ុណ្ណោះ