Views: 7
ដោយ៖ សុវណ្ណកុម្ភៈ / ភ្នំពេញ៖ ឆ្នាំ២០២៣ គឺជាឆ្នាំដែលកម្ពុជា នឹងទទួលធ្វើជាម្ចាស់ផ្ទះនៃការប្រកួតកីឡាស៊ីហ្គេម ជាលើកដំបូងនោះ គឺស៊ីហ្គេមលើកទី៣២ ឆ្នាំ២០២៣ ។
អ្វីដែលគួរឲ្យកត់សំគាល់នោះ ក្នុងស៊ីហ្គេមលើកទី៣១ ឆ្នាំ២០២២ នៅទីក្រុងហាណូយ ប្រទេសវៀតណាម កម្ពុជា ទទួលបានជោគជ័យដ៏ធំបំផុត មិនតែប៉ុណ្ណោះ ក្នុងព្រឹត្តិការណ៍ អាស៊ានប៉ារ៉ាហ្គេម លើកទី១១ ឆ្នាំ២០២២ នៅទីក្រុងសូឡូ ប្រទេសឥណ្ឌូណេស៊ី ដែលទើបនឹងបញ្ចប់ទៅថ្មីៗនេះ ក៏កីឡាករដែលមានពិការភាពរបស់កម្ពុជា ដណ្ដើមបាន ជោគជ័យដ៏អស្ចារ្យដែរ ។
សម្រាប់ព្រឹត្តិការណ៍ស៊ីហ្គេម លើកទី៣១ កម្ពុជា ដណ្ដើមបានមេដាយ រហូតដល់ទៅ ៦៣ គ្រឿង ដែលក្នុងនោះ មេដាយមាស ចំនួន ៩ គ្រឿង មេដាយប្រាក់ ចំនួន ១៣ គ្រឿង និង សំរិទ្ធ ៤១ គ្រឿង។
កត្តាដែលសំខាន់នោះ ប្រភេទកីឡាមួយចំនួន ដែលកន្លងមក ពុំធ្លាប់បានទទួលមេដាយនោះ លើកនេះ មានជោគជ័យយ៉ាងខ្លាំង ដោយប្រជែងបានមេដាយ ដែលនេះជាសញ្ញាដ៏ប្រសើរមួួយ សម្រាប់ឆ្នាំ២០២៣ ដែលកម្ពុជាធ្វើជាម្ចាស់ផ្ទះ ។
លោក ណយ ផាណា អគ្គលេខាធិការ សហព័ន្ធកីឡាកាយសម្ព័ន្ធកម្ពុជា បានមានប្រសាសន៍ថាៈ អ្វីៗដែលយើងទទួលបាន គឺដោយសារការចង្អុលបង្ហាញផ្លូវ ពីសំណាក់លោកប្រធាន លោកឧកញ៉ា អនុប្រធាន គ្រូបង្វឹក និងការប្រឹងប្រែងរបស់កូនៗ កីឡាករ កីឡាការិនី ទាំងអស់។
សូមបញ្ជាក់ថា ក្នុងស៊ីហ្គេមលើកទី៣១ កាយសម្ព័ន្ធរកបានមេដាយប្រាក់ ចំនួន ៣ គ្រឿង និងសំរិទ្ធ ១ គ្រឿង។
សម្រាប់ប្រភេទកីឡាហែលទឹក ដែលរង់ចាំ រាប់ជំនាន់ គឺរយៈពេលជាង ៤០ ឆ្នាំឯណោះ ទើបរកបានមេដាយឡើងវិញ នេះជាមោទនភាពមួយរបស់កម្ពុជា ក្នុងការត្រៀមខ្លួន សម្រាប់ឆ្នាំ២០២៣ ។
ខាងក្រោមនេះ ជាប្រវត្តិមេដាយ ដែលកម្ពុជា ដណ្ដើមបានក្នុងព្រឹត្តិការណ៍ស៊ីហ្គេម ឆ្នាំ១៩៥៩ ដែលមានកម្ពុជា គឺជាស្ថាបនិកមួយដែរ តែកម្ពុជា មិនបានចូលរួមប្រកួត នៅលើកដំបូងឡើយ គឺចាប់ពីលើកទី២ ទៅ ទើបកម្ពុជា បានចូលរួម៖
-លើកទី២ ឆ្នាំ១៩៦១៖ កម្ពុជា រកបានមេដាយ មាស១ ប្រាក់៦ សំរឹទ្ធ ៥ សរុប ១១ ។
-លើកទី៣ ឆ្នាំ១៩៦៥៖ រកបានមេដាយមាស ១៥ ប្រាក់១៩ សំរឹទ្ធ១៧ សរុប ៥១ ។
-លើកទី៦ ឆ្នាំ១៩៧១៖ មាស ១៧ ប្រាក់១៨ សំរឹទ្ធ១៨ សរុប ៥៣ ។
-លើកទី៧ ឆ្នាំ១៩៧៣៖ មាស៩ ប្រាក់១២ សំរឹទ្ធ៣០ សរុប ៥១ ។
-លើកទី១៤ ឆ្នាំ១៩៨៧៖ ប្រាក់១ សំរឹទ្ធ៩ សរុប ១០ ។
-លើកទី១៨ ឆ្នាំ១៩៩៥៖ សំរឹទ្ធ ២ សរុប ២ ។
-លើកទី១៩ ឆ្នាំ១៩៩៧៖ សំរឹទ្ធ៦ សរុប ៦ ។
-លើកទី២១ ឆ្នាំ២០០១៖ មាស១ ប្រាក់១ សំរឹទ្ធ៥ សរុប ៧ ។
-លើកទី២២ ឆ្នាំ២០០៣៖ មាស១ ប្រាក់៥ សំរឹទ្ធ១១ សរុប ១៧ ។
-លើកទី២៣ ឆ្នាំ២០០៥៖ ប្រាក់៣ សំរឹទ្ធ៩ សរុប ១២ ។
-លើកទី២៤ ឆ្នាំ២០០៧៖ មាស២ ប្រាក់៥ សំរឹទ្ធ១១ សរុប ១៨ ។
-លើកទី២៥ ឆ្នាំ២០០៩៖ មាស៣ ប្រាក់១០ សំរឹទ្ធ២៧ សរុប ៤០ ។
-លើកទី២៦ ឆ្នាំ២០១១៖ មាស៤ ប្រាក់១១ សំរឹទ្ធ២៤ សរុប ៣៩ ។
-លើកទី២៧ ឆ្នាំ២០១៣៖ មាស៨ ប្រាក់១១ សំរឹទ្ធ២៨ សរុប ៤៧ ។
-លើកទី២៨ ឆ្នាំ២០១៥៖ មាស១ ប្រាក់៥ សំរឹទ្ធ៩ សរុប ១៩ ។
-លើកទី២៩ ឆ្នាំ២០១៧៖ មាស៣ ប្រាក់២ សំរឹទ្ធ១២ សរុប ១៧ ។
-លើកទី៣០ ឆ្នាំ២០១៩៖ មាស៤ ប្រាក់៦ សំរឹទ្ធ៣៦ សរុប ៤៦ ។
-លើកទី៣១ ឆ្នាំ២០២១ (លើកមក ២០២២) ៖ មាស៩ ប្រាក់១៣ សំរឹទ្ធ៤១ សរុបចំនួន ៦៣ ។
សម្រាប់ព្រឹត្តិការណ៍អាស៊ានប៉ារ៉ាហ្គេមវិញ នៅក្នុងការប្រកួត លើកទី១១ ដែលទើបនឹងបញ្ចប់ទៅថ្មីៗនេះ កម្ពុជាដណ្ដើមបានមេដាយ ចំនួន ២៨ គ្រឿង ដែលក្នុងនោះ មាស ៧ គ្រឿង ប្រាក់ ១០ គ្រឿង និងសំរិទ្ធ ១១ គ្រឿង ។
សូមមើលប្រវត្តិមេដាយរបស់កម្ពុជា ក្នុងអាស៊ានប៉ារ៉ាហ្គេម កន្លងមក៖
-លើកទី១ ឆ្នាំ២០០១ នៅប្រទេសម៉ាឡេស៊ី កម្ពុជា ដណ្ដើមបានមេដាយមាស ១គ្រឿង ប្រាក់១គ្រឿង និងសំរិទ្ធ១គ្រឿងសរុប៣គ្រឿង។
-លើកទី២ ឆ្នាំ២០០២ នៅប្រទេសវៀតណាម កម្ពុជា ដណ្ដើមបានមេដាយមាស ១គ្រឿង ប្រាក់ ៥ គ្រឿង និងសំរិទ្ធ ៣ គ្រឿង សរុប ៩ គ្រឿង ។
-លើកទី៣ ឆ្នាំ២០០៥ នៅប្រទេសហ្វីលីពីន កម្ពុជា ដណ្ដើមបានមេដាយ សរុប ៥ គ្រឿង ដែលក្នុងនោះ មេដាយប្រាក់ ៣ គ្រឿង និងសំរិទ្ធ ២ គ្រឿង ។
-លើកទី៤ ឆ្នាំ២០០៧ នៅប្រទេសថៃ កម្ពុជា ដណ្ដើមបានមេដាយ ប្រាក់១គ្រឿងប៉ុណ្ណោះ។
-លើកទី៥ ឆ្នាំ២០០៩ កម្ពុជា រកបានមេដាយសរុប ៧ គ្រឿង ក្នុងនោះ មាស ១គ្រឿង ប្រាក់ ២គ្រឿង និងសំរិទ្ធ ៤ គ្រឿង។
-លើកទី៦ ឆ្នាំ២០១១ នៅប្រទេសឥណ្ឌូណេស៊ីកម្ពុជា រកបានមេដាយសរុប ៧ ក្នុងនោះ មេដាយប្រាក់ ៥ គ្រឿង និងសំរិទ្ធ ២ គ្រឿង។
-លើកទី៧ ឆ្នាំ២០១៣ កម្ពុជា ដណ្ដើមបានមេដាយសរុប ចំនួន ៩ គ្រឿង ក្នុងនោះ មាស ៣ គ្រឿង ប្រាក់ ៤ គ្រឿង និងសំរិទ្ធ ២ គ្រឿង។
-លើកទី៨ ឆ្នាំ២០១៥ កម្ពុជា រកបានមេដាយសរុប ៩ គ្រឿង ក្នុងនោះ មាស ១គ្រឿង ប្រាក់ ២ គ្រឿង និងសំរិទ្ធ ៦ គ្រឿង ។
-លើកទី៩ ឆ្នាំ២០១៧ នៅប្រទេសម៉ាឡេស៊ី កម្ពុជា រកបានមេដាយសរុបចំនួន ១០ គ្រឿង ក្នុងនោះ មាស ៥ គ្រឿង និងប្រាក់ ៥ គ្រឿង។
-លើកទី១០ ឆ្នាំ២០១៩ នៅប្រទេសហ្វីលីពីន ត្រូវលុបចោល ដោយសារការរាតត្បាត នៃកូវីដ ១៩ ។
តាមរយៈសន្ទស្សន៍មេដាយ ដែលដណ្ដើមបាន ក្នុងឆ្នាំ២០២២ នេះ ទាំងព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេម កម្ពុជា មានជំនឿចិត្តថា ឆ្នាំ២០២៣ គឺជាឆ្នាំដែលកាន់តែល្អ សម្រាប់កម្ពុជា ពិតជាមិនខានឡើយ ៕/V
