Views: 1
ដោយ៖ សុវណ្ណកុម្ភៈ /ភ្នំពេញ៖ អនុរដ្ឋលេខាធិការ ក្រសួងទេសចរណ៍ លោក នី ផល្លី នាថ្ងៃទី៩ ខែសីហា ឆ្នាំ២០២២ នេះបានបើកកិច្ចប្រជុំផ្សព្វផ្សាយ ស្តីពីការគ្រប់គ្រងគុណភាពសេវាកម្មទេសចរណ៍ នៅក្នុងខេត្តព្រះសីហនុឆ្ពោះទៅការរៀបចំពិធីបុណ្យសមុទ្រ និងមហាសន្និបាតក្លិបឆ្នេរសមុទ្រ ដែលស្អាតបំផុតលើសកលលោក ក្នុងអំឡុងខែធ្នូ ឆ្នាំ២០២២ នេះ។
កិច្ចប្រជុំនេះ មានការចូលរួមពីតំណាងរដ្ឋបាលខេត្តព្រះសីហនុ មន្ទីរ អង្គភាពជំនាញជុំវិញខេត្ត រដ្ឋបាលក្រុង ស្រុក រួមទាំងសភពាណិជ្ជកម្ម ខេត្តព្រះសីហនុ និងប្រតិបត្តិករទេសចរណ៍តំបន់ឆ្នេរក្នុងខេត្តផងដែរ។
លោក នី ផល្លី បានជម្រាបជូនអង្គប្រជុំថាៈ ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្នុងការដាក់ចេញនូវគោលនយោបាយដ៏ជោគជ័យ នៃការចាក់ស្រោចវ៉ាក់សាំងកូវីដ-១៩ ជូនប្រជាពលរដ្ឋទូទាំងប្រទេស បង្កើនភាពសាំ ក្នុងសហគមន៍និងឈានទៅការបើកដំណើរការប្រទេសឡើងវិញ ក្នុងគ្រប់វិស័យ រួមទាំងវិស័យទេសចរណ៍។ ប្រការដ៏សំខាន់នេះ បានធ្វើឱ្យប្រទេសកម្ពុជា ត្រូវបានជ្រើសរើសធ្វើជាម្ចាស់ផ្ទះ ក្នុងការៀបចំមហាសន្និបាតក្លិបឆ្នេរសមុទ្រ ដែលស្អាតបំផុតលើសកលលោកដែលនឹងប្រព្រឹត្តទៅ នៅខេត្តព្រះសីហនុ ក្នុងអំឡុងខែធ្នូ ឆ្នាំ២០២២ នាពេលខាងមុខ អមជាមួយនឹងពិធីបុណ្យសមុទ្រ។
ស្របជាមួយគ្នានេះ ដើម្បីត្រៀមខ្លួនឲ្យកាន់តែរួចរាល់ ក្នុងការរៀបចំព្រឹត្តិការណ៍ធំ ទាំង២នេះ លោក នី ផល្លី បានវាយតម្លៃខ្ពស់ និងផ្ដាំផ្ញើដល់រដ្ឋបាលខេត្តព្រះសីហនុ ដែលមានមន្ទីរអង្គភាពជំនាញនានា ជាសេនាធិការ ត្រូវបន្តកិច្ចខិតខំប្រឹងប្រែង កាន់តែសកម្ម ចុះផ្សព្វផ្សាយអប់រំ និងត្រៀមការងារមួយចំនួន ដូចជា៖
ទី១.បន្តជំរុញ និងលើកកម្ពស់ការរៀបចំទីក្រុងឱ្យបានស្អាត រួមទាំងគោលដៅទេសចណ៍សំខាន់ៗ និងគ្រប់ឆ្នេរខ្សាច់កម្សាន្តទាំងអស់នៅក្នុងខេត្តព្រះសីហនុ។
ទី២.បន្តពង្រឹងការផ្តល់សេវាកម្មទេសចរណ៍ និងផលិតផលទេសចរណ៍ ប្រកបដោយគុណភាព និងភាពកក់ក្តៅ។
ទី៣.ជំរុញដល់មូលដ្ឋានអាជីវកម្មទេសចរណ៍ក្នុងការអនុវត្តវិធានសុវត្ថិភាពទេសចរណ៍ និងស្តង់ដាប្រតិបត្តិអប្បបរមា (SOP) និងវិធានការសុខាភិបាល ឱ្យបានខ្ជាប់ខ្ជួន សំដៅលើកកម្ពស់ កិត្យានុភាពខេត្តព្រះសីហនុ ជាគោលដៅទេសចរណ៍ ប្រកបដោយសុវត្ថិភាព។
ទី៤.ពង្រឹងគុណភាព និងសុវត្ថិភាពសេវាកម្មដឹកជញ្ជូនទេសចរណ៍ ទាំងផ្លូវទឹក និងផ្លូវគោក។
ទី៥.ជំរុញនិងលើកទឹកចិត្រ ដល់គ្រប់មូលដ្ឋានអាជីវកម្មទេសចរណ៍ ក្នុងការគាំទ្រ និងប្រើ
ប្រាស់ផលិតផលក្នុងស្រុក ដូចជាបន្លែផ្លែឈើ សាច់ និងផលិតផលផ្សេងៗទៀត។
ទី៦. បង្កើនការបើកវគ្គបណ្តុះបណ្តាលអភិវឌ្ឍន៍ធនធានមនុស្ស ក្នុងវិស័យទេសចរណ៍ ដើម្បីធានាបាននូវការផ្តល់សេវាកម្ម ប្រកបដោយគុណភាព និងបដិសណ្ឋាកិច្ចល្អ។
ទី៧. ជំរុញការរៀបចំព្រឹត្តការណ៍ ឱ្យបានច្រើន រួមទាំំងព្រឹត្តការណ៍ទេសចរណ៍ កីឡា និងព្រឹត្តការណ៍ពិព័រណ៌ទេសចរណ៍នានា។
ទី៨. រៀបចំកញ្ចប់ទស្សនកិច្ចទេសចរណ៍តម្លៃសមរម្យ ចាប់ពីការស្នាក់នៅ ម្ហូបអាហារ និងការធ្វើដំណើរជាដើម ដើម្បីទាក់ទាញភ្ញៀវទេចរ មកខេត្តព្រះសីហនុ កាន់តែច្រើន។
ទី៩.ចូលរួមផ្សព្វផ្សាយគោលដៅទេសចរណ៍ខេត្តព្រះសីហនុ ដោយចាប់ផ្តើមពីប្រជាពលរដ្ឋ ក្នុងមូលដ្ឋាន មន្ទីរជំនាញពាក់ព័ន្ធ រហូតដល់រដ្ឋបាលខេត្ត។
ទី១០.ស្នើដល់រដ្ឋបាលខេត្តព្រះសីហនុ មន្ទីរជំនាញ និងអង្គភាពពាក់ព័ន្ធ ចុះដល់គ្រប់ទីតាំងមូលដ្ឋានអាជីវកម្ម ដើម្បីក្តាប់នូវបញ្ហាប្រឈម និងឈានទៅរកដំណោះស្រាយជាក់ស្តែង និងក្នុងករណីចាំចាច់ ត្រូវស្នើសុំជំនួយបច្ចេកទេសពីក្រសួងជំនាញពាក់ព័ន្ធ ដើម្បីធានាដល់និរន្តរភាព នៃការអភិវឌ្ឍវិស័យទេសចរណ៍ និងឈានទៅជំរុញ ដល់កំណើនសេដ្ឋកិច្ចមូលដ្ឋាន។
គួរបញ្ជាក់ថា តាមរយៈលិខិតលេខ ២១៤ សជណ ចុះថ្ងៃទី២៨ ខែមីនា ឆ្នាំ២០២២ របស់ទីស្តីការគណៈរដ្ឋមន្ត្រី រាជរដ្ឋាភិបាល សម្រេចជាគោលការណ៍ កំណត់កាលបរិច្ឆេទរៀបចំពិធីបុណ្យសមុទ្រ លើកទី៩ ជុំទី៣ នៅខេត្តព្រះសីហនុ ចាប់ពីថ្ងៃទី៩ ដល់ថ្ងៃទី១១ ខែធ្នូ ឆ្នាំ២០២២ និងមហាសន្និបាតក្លិបឆ្នេរសមុទ្រដែលស្អាតបំផុត លើពិភពលោក ចាប់ពីថ្ងៃទី៩ ដល់ថ្ងៃទី១៤ ខែធ្នូ ឆ្នាំ២០២២៕/V