Views: 1
ប្រែសម្រួលៈបំណង(BLOOMBERG)៖ ដំណើរទស្សនកិច្ចរបស់គណៈប្រតិភូសភាអាម៉េរិកមកកាន់កោះតៃវ៉ាន់កំពុងបញ្ឆេះភាពតានតឹងហើយរដ្ឋាភិបាលរបស់លោកបៃដិនមិនគួរមើលស្រាលការតាំងចិត្តរបស់ចិនលើបញ្ហានេះឡើយ នេះបើតាមតំណាងរបស់ចិនប្រចាំក្រុងវ៉ាស៊ីនតោនបានបញ្ជាក់កាលពីថ្ងៃអង្គារទី១៦សីហា។
ឯកអគ្គរដ្ឋទូត គីន ហ្កាង(Qin Gang) បានច្រានចោលការលើកឡើងរបស់មន្ត្រីអាម៉េរិកដែលថា ពួកសមាជិកសភាធ្វើសកម្មភាពឯករាជ្យពីសេតវិមាន ឬក៏ថារដ្ឋាភិបាលអាម៉េរិកមិនគ្រប់គ្រងលើរបៀបវារៈរបស់ប្រធានសភាលោកស្រី ណាន់ស៊ី ផេឡូស៊ី ដែលបានទៅធ្វើទស្សនកិច្ចកោះតៃវ៉ាន់កាលពីដើមខែសីហានោះទេ។
លោកគីន បាននិយាយថា ដំណើរទស្សនកិច្ចរបស់ផេឡូស៊ី និងសមាជិកសភាដទៃទៀត រំលោភកិច្ចព្រមព្រៀងអាម៉េរិក-ចិន។«យើងកំពុងដោះស្រាយផលវិបាកធ្ងន់ធ្ងរចេញពីដំណើរទស្សនកិច្ចនេះ»។
លោកបានព្រមានកុំអោយអាម៉េរិកមើលស្រាលការតាំងចិត្តដ៏ខ្ពស់និងសមត្ថភាពរបស់រដ្ឋាភិបាលព្រមទាំងប្រជាជនចិន ដើម្បីការពារអធិបតេយ្យជាតិនិងបូរណភាពទឹកដីរបស់ខ្លួន។
ការព្រមានរបស់លោកគីន កើតឡើងបន្ទាប់ពីគណៈប្រតិភូសភាអាម៉េរិកមួយទៀតដឹកនាំដោយព្រឹទ្ធសមាជិក អេដវឺដ ម៉ាគី(Edward Markey)បានបញ្ចប់ដំណើរទស្សនកិច្ចមួយនៅកោះតៃវ៉ាន់កាលពីចុងសប្តាហ៍។
ដំណើររបស់ផេឡូស៊ីកាលពីដើមខែនាំអោយចិនធ្វើសមយុទ្ធយោធាទ្រង់ទ្រាយធំជុំវិញកោះតៃវ៉ាន់។
លោកគីន បាននិយាយថា« សភាជាផ្នែកនៃរដ្ឋាភិបាលអាម៉េរិកមិនមែនជាសាខាឯករាជ្យមិនអាចគ្រប់គ្រងបានឡើយ។សភាមានកាតព្វកិច្ចដើរតាមគោលនយោបាយការបរទេសរបស់អាម៉េរិក។ហេតុនេះហើយយើងមានអារម្មណ៍ខកចិត្តនិងទោមនស្សណាស់ចំពោះដំណើរបស់ព្រឹទ្ធសមាជិកម៉ាគី ទៅកាន់តៃវ៉ាន់។វាបង្ករឿង មិនជួយសភាពការណ៍បានទេ»។
លោកគីន បានបន្ថែមថា ចិនបានព្រមានអាម៉េរិកថាដំណើរទស្សនកិច្ចណាមួយរបស់ផេឡូស៊ី នឹងនាំមកផលវិបាកធ្ងន់ធ្ងរណាស់។ចម្លើយតបរបស់ចិនសមស្របនិងថាសមយុទ្ធយោធាមានលក្ខណៈបើកចំហ តម្លាភាពនិងប្រកបដោយវិជ្ជាជីវៈ៕
ឯកអគ្គរដ្ឋទូត គីន ហ្កាង