Views: 4
ប្រែសម្រួលៈបំណង(CGTN,ST)៖ ក្រោយប្រធានសភាអាម៉េរិកធ្វើទស្សនកិច្ចនៅកោះតៃវ៉ាន់បានមួយសប្តាហ៍ អនុរដ្ឋមន្ត្រីការបរទេសចិនលោក ម៉ា ចាវស៊ូ(Ma Zhaoxu)បានប្រាប់ទូរទស្សន៍CGTNកាលពីថ្ងៃអង្គារថា «មិនមានកន្លែងណាត្រូវស្រពេចស្រពិលឬរំលោភការបកស្រាយអំពីគោលការណ៍ចិនតែមួយឡើយ។
លោកម៉ាបានប្រាប់អ្នកយកព័ត៌មាននៃទូរទស្សន៍CGTNថា «នេះជាត្លុកល្ខោននយោបាយមួយ តែគ្រោះថ្នាក់និងបង្ករឿងលេងមួយ។ដំណើរទស្សនកិច្ចរបស់ ណាន់ស៊ី ផេឡូស៊ី ផ្គើននឹងការព្រមានរបស់ចិន រំលោភអធិបតេយ្យភាពនិងបូរណភាពទឹកដីចិន រំលោភគោលការណ៍ចិនតែមួយនិងខចែងក្នុងសេចក្តីប្រកាសរួមគ្នាចំនួនបីរវាងចិននិងអាម៉េរិក ដោយធ្វើអោយប៉ះពាល់គ្រឹះនយោបាយនៃទំនាក់ទំនងចិន-អាម៉េរិក បំផ្លាញសន្តិភាពនិងស្ថិរភាពកាត់ច្រកសមុទ្រតៃវ៉ាន់»។
លោកបានបញ្ជាក់ថា «វាមិនអាចទទួលយកបានចំពោះប្រជាជនចិន។ចិនមានហេតុផលគ្រប់យ៉ាងដើម្បីឆ្លើយតបជាមួយនឹងវិធានការតបវិញ»។
អនុរដ្ឋមន្ត្រីការបរទេសចិនលោក ម៉ា ចាវស៊ូ ក្នុងអំឡុងពេលផ្តល់កិច្ចសម្ភាសន៍ជាមួយអ្នកយកព័ត៌មាននៃទូរទស្សន៍CGTN
ជាវិធានការតបនឹងការផ្គើនរបស់មន្ត្រីអាម៉េរិករូបនេះ ចិនបានប្រកាសធ្វើសមយុទ្ធធំបំផុតនៅជុំវិញកោះតៃវ៉ាន់ចាប់តាំងពីសប្តាហ៍មុន។កាលពីថ្ងៃអង្គារទី៩សីហា ចិនបានបន្តលំហាត់យោធាដល់ថ្ងៃទី៦នៅពេលកោះតៃវ៉ាន់ក៏បង្ហាញភាពគឃ្លើនដោយចាប់ផ្តើមធ្វើសមយុទ្ធបាញ់គ្រាប់ពិតផងដែរ ដើម្បីត្រៀមទប់ទល់នឹងការវាយចូលរបស់កងទ័ពចិន ដែលអាចកើតមាន។
ក្រសួងការបរទេសចិនបាននិយាយថា សមយុទ្ធយោថានេះមានលក្ខណៈ«បើកចំហ តម្លាភាពនិងដោយវិជ្ជាជីវៈ» តែរដ្ឋមន្រ្តីការបរទេសតៃវ៉ាន់លោក ចូសេហ្វ វូ(Joseph Wu)បាននិយាយថា ដំណើរទស្សនកិច្ចរបស់ផេឡូស៊ី ត្រូវបានចិនប្រើជាលេសសំរាប់ធ្វើសមយុទ្ធត្រៀមការឈ្លានពានមួយចូលកោះតៃវ៉ាន់។
លំហាត់យោធាចិនផ្តោតលើការហ៊ុមព័ទ្ធបិទខ្ទប់កោះនិងប្រតិបត្តិការគាំទ្ររួម។កងទ័ពអាកាសបានបញ្ជូនយន្តហោះប្រយុទ្ធជាច្រើនក្រុម ធ្វើការហ្វឹកហាត់ក្នុងប្រតិបត្តិការគ្រប់គ្រងដែនអាកាស ការចាក់សាំងកណ្តាលអាកាសនិងការគាំទ្រពីអាកាសទៅសមុទ្រ។វាក៏ផ្តោតលើប្រតិបត្តិការសង្គ្រោះនិងស្វែងរកក្នុងសមុទ្ររួមគ្នា ការផ្គត់ផ្គង់គ្រាប់រំសេវនិងសម្ភារ ជួសជុលគ្រឿងបរិក្ខាហើយនឹងការផ្ទេរនិងសង្គ្រោះអ្នករងរបួស៕
តៃវ៉ាន់បាននិយាយថា យន្តហោះចិន១៦គ្រឿងបានហោះហួសខ្សែបន្ទាត់កណ្តាលនៃច្រកសមុទ្រតៃវ៉ាន់កាលពីថ្ងៃអង្គារ
តៃវ៉ាន់បានប្រកាសធ្វើសមុទ្ធបាញ់កាំភ្លើងធំដោយប្រើគ្រាប់ពិតៗ ដើម្បីតៀមទប់ទក់កងកម្លាំងចិនកាលពីថ្ងៃអង្គារ
