Views: 14
ប្រែសម្រួលៈបំណង(ដេល្លីម៉េល)៖ចិនបានគំរាមជាថ្មីថានឹងប្រើកម្លាំងយោធាដើម្បីនាំកោះតៃវ៉ាន់មកនៅក្រោមការគ្រប់គ្រងរបស់ខ្លួន។
សេចក្តីថ្លែងការណ៍ដូច្នេះកាលពីថ្ងៃពុធដោយការិយាល័យកិច្ចការតៃវ៉ាន់នៃគណៈរដ្ឋមន្ត្រីចិន និងនាយកដ្ឋានព័ត៌មានរបស់វាកើតឡើងចំពេលយោធាចិនបាននិងកំពុងធ្វើការហ្វឹកហាត់បាញ់គ្រាប់ពិតនិងបើកយន្តហោះរួមទាំងនាវាចម្បាំងចូលក្នុងអ្វីដែលតៃវ៉ាន់អះអាងថាជាដែនអាកាសនិងដែនទឹករបស់ខ្លួនអស់ពេលជិតមួយសប្តាហ៍មកហើយ។
នៅព្រឹកថ្ងៃពុធទី១០សីហានេះ នាវាកងទ័ពជើងទឹកចិនត្រូវបានគេឃើញសកម្មក្នុងសមុទ្រនៅឯនាយឆ្នេរខាងកើតនិងខាងលិចកោះតៃវ៉ាន់ នៅពេលចិនប៉េកាំងបន្តធ្វើសមយុទ្ធយោធាដើម្បីជាការផ្តល់មេរៀនចំពោះការសមគំនិតគ្នារវាងកម្លាំងគាំទ្រឯករាជ្យតៃវ៉ាន់និងក្រុមមេដឹកនាំអាម៉េរិកដែលនៅតែចចេសបន្តផែនការទស្សនកិច្ចរបស់ប្រធានសភារបស់ខ្លួនមកកាន់កោះដែលចិនអះអាងថាជាទឹកដីរបស់ខ្លួន។
សមយុទ្ធយោធាចិនរំខានដល់ការជើងហោះហើរស៊ីវិលនិងការដឹកជញ្ជូនតាមផ្លូវសមុទ្រដ៏សំខាន់ ព្រមទាំងបណ្តាលអោយមានការថ្កោលទោសពីអាម៉េរិក ជប៉ុននិងប្រទេសដទៃទៀត។
សេចក្តីថ្លែងការណ៍ជាភាសាអង់គ្លេស បាននិយាយថា រដ្ឋាភិបាលទីក្រុងប៉េកាំងនឹង«ខិតខំធ្វើការដោយស្មោះបំផុតដើម្បីសំរេចអោយបានការបង្រួបបង្រួមដោយសន្តិវិធី។តែយើងនឹងមិនច្រានចោលការប្រើកម្លាំង យើងនឹងរក្សាទុកជំរើសចាត់វិធានការតាមមធ្យោបាយចាំបាច់ទាំងអស់។នេះដើម្បីការពារទល់នឹងការជ្រៀតជ្រែកមកពីក្រៅ និងសកម្មភាពផ្តាច់ខ្លួនទាំងអស់»។
វាបានបន្ថែមថា «យើងតែងតែត្រៀមខ្លួនប្រើកម្លាំងឆ្លើយតប ឬមធ្យោបាយចាំបាច់ផ្សេងៗចំពោះការជ្រៀតជ្រែកដោយកម្លាំងមកពីខាងក្រៅ ឬចំណាត់ការរ៉ាឌីកាល់ដោយសមាភាពផ្តាច់ខ្លួន។គោលដៅផ្តាច់ព្រាត់របស់យើងគឺត្រូវធានាលទ្ធភាពនៃការបង្រួបបង្រួមឡើងវិញដោយសន្តិវិធី និងជំរុញដំណើរការនេះ»។
ចិនបាននិយាយថា ចំណាត់ការគំរាមនេះជំរុញឡើងដោយដំណើរទស្សនកិច្ចកាលពីសប្តាហ៍មុនដោយប្រធានសភាអាម៉េរិកលោកស្រី ណាន់ស៊ី ផេឡូស៊ីមកកាន់កោះតៃវ៉ាន់ទោះជាទាំងរដ្ឋាភិបាលនិងកងទ័ពចិនបានព្រមានជាមុនក្តី។
តៃវ៉ាន់និយាយថា ដំណើរទស្សនកិច្ចដូច្នេះជារឿងធម្មតា និងថាចិនប្រើវាជាលេសដើម្បីបង្កើនការសម្លុតគំរាមដោយយោធា។
បន្ថែមលើការបង្ហាញកម្លាំងយោធា ចិនក៏បានកាត់ផ្តាច់ការចរចាអំពីបញ្ហាជាច្រើនចាប់ពីសន្តិសុខសមុទ្រដល់ការប្រែប្រួលអាកាសធាតុជាមួយសហរដ្ឋអាម៉េរិក ។
រដ្ឋមន្ត្រីការបរទេសតៃវ៉ាន់កាលពីថ្ងៃអង្គារបានព្រមានថា សមយុទ្ធយោធាចិនឆ្លុះបញ្ចាំងមហិច្ឆតារបស់រដ្ឋាភិបាលទីក្រុងប៉េកាំងចង់គ្រប់គ្រងផ្នែកដ៏ធំនៅប៉ាស៊ីហ្វិកខាងលិច នៅពេលយោធាតៃវ៉ាន់ចាប់ផ្តើមសមយុទ្ធយោធាផងដែរដើម្បីត្រៀមទប់ទល់ចិន៕
