Views: 8
ប្រែសម្រួលៈបំណង(ដេល្លីម៉េល)៖ រដ្ឋមន្ត្រីការបរទេសចិនលោកឈីន ហ្កាង( Qin Gang)និងសមភាគីជប៉ុន យ៉ូស៊ីម៉ាសា ហាយ៉ាស៊ី( Yoshimasa Hayashi)កាលពីថ្ងៃព្រហស្បតិ៍ទី២កុម្ភៈបានពិភាក្សាអំពីបណ្តាកោះជម្លោះនៅសមុទ្រចិនខាងកើត ដោយភាគីទាំងពីរបានសម្តែងការព្រួយបារម្ភ ហើយលោកឈីនសង្ឃឹមថា ជប៉ុនអាចរារាំងការបង្ករឿងបង្កឡើងដោយ«ពួកក្រុមស្តាំនិយម»។
បណ្តាកូនកោះជម្លោះនៅសមុទ្រខាងកើតដែលទាំងជប៉ុននិងចិនអះអាងថាស្ថិតក្រោមអធិបតេយ្យភាពរបស់ខ្លួន ជាចំណុចរារាំងទំនាក់ទំនងល្អរវាងប្រទេសអាស៊ីខាងកើតទាំងពីរនេះជាយូរមកហើយ។ចិនហៅប្រជុំកោះនេះថា «ទាវយូ» នៅពេលជប៉ុនហៅវាថា«សេនកាគុ»។
នៅក្នុងការសន្ទនាលើកដំបូងរបស់ប្រមុខការទូតទាំងពីរចាប់តាំងពីឡើងកាន់តំណែងរដ្ឋមន្ត្រីការបរទេសចិនមក លោកឈីនបានប្រាប់លោកហាយ៉ាស៊ីថា រដ្ឋាភិបាលទីក្រុងប៉េកាំងសង្ឃឹមថា ជប៉ុនអាចបញ្ឈប់«កម្លាំងស្តាំនិយម»កុំអោយបង្កជម្លោះអំពីបណ្តាកូនកោះដែលទាមទារជាន់គ្នានេះ។
ចំណែកលោកហាយ៉ាស៊ី បាននិយាយថា ទំនាក់ទំនងទ្វេភាគីជួប«ការប្រឈមនិងការព្រួយបារម្ភជាច្រើន»និងថាមតិសាធារណជនជប៉ុនចំពោះចិន«ធ្ងន់ធ្ងរខ្លាំងណាស់» នេះបើតាមសេចក្តីថ្លែងការណ៍មួយចេញដោយក្រសួងការបរទេសជប៉ុន។
លោកហាយ៉ាស៊ី ក៏បានសម្តែង«ការព្រួយបារម្ភជាខ្លាំង»អំពីសមុទ្រចិនខាងកើត (ជប៉ុនហៅសមុទ្រខាងកើត)រួមមានសកម្មភាពរបស់ចិននៅជុំវិញប្រជុំកោះ ព្រមទាំងសកម្មភាពយោធាចិនកាន់តែកើនឡើងនៅក្បែរជប៉ុន។
សេចក្តីថ្លែងការណ៍របស់ជប៉ុនបានបន្ថែមថា ទោះជាយ៉ាងណា«ភាគីទាំងពីរបានយល់ព្រមសហការគ្នាដើម្បីស្ថាបនាទំនាក់ទំនងបែបស្ថាបនានិងមានស្ដិរភាពមួយហើយបាននិយាយថាពួកគេនឹងបន្តទាក់ទងគ្នាយ៉ាងជិតដិតនៅគ្រប់កំរិត រួមមានជំនួបកំពូលផង»។
លោកហាយ៉ា ស៊ីបានប្រាប់សន្និសីទកាសែតមួយកាលពីថ្ងៃសុក្រថា លោកឈីនបានអញ្ជើញរូបលោកអោយទៅធ្វើទស្សនកិច្ចចិន និងថានឹងមានការរៀបចំពេលវេលាសំរាប់ដំណើរទស្សនកិច្ចដូច្នេះ។ចំណែកនាយខុទ្ទកាល័យជប៉ុនលោក ហ៊ីរ៉ូកាហ្ស៊ូ ម៉ាតស៊ូណូ(Hirokazu Matsuno)បានបញ្ជាក់នៅថ្ងៃសុក្រនេះថា រដ្ឋមន្ត្រីទាំងពីរបានពិភាក្សាគ្នានិងបានយល់ព្រមធ្វើការឆ្ពោះរកទំនាក់ទំនងបែបសហការនិងវិជ្ជមាន៕
រដ្ឋមន្ត្រីការបរទេសចិនលោកឈីន ហ្កាងនិងសមភាគីជប៉ុន យ៉ូស៊ីម៉ាសា ហាយ៉ាស៊ី
