Views: 11
ប្រែសម្រួលៈបំណង(ដេល្លីម៉េល)៖យោធាចិននៅថ្ងៃអង្គារទី២៩វិច្ឆិកានេះបាននិយាយថាខ្លួនបានបណ្តេញនាវាគ្រូស៊ើរបំពាក់កាំជ្រួចបញ្ជានាំផ្លូវរបស់អាម៉េរិកមួយគ្រឿងដែលបាន«បើកចូលដោយខុសច្បាប់»ក្នុងដែនទឹកក្បែរប្រជុំកោះស្ព្រ៉ាតលី(Spratly)ក្នុងសមុទ្រចិនខាងត្បូង ជាការអះអាងដែលអាម៉េរិកបដិសេធ។
ទៀន ជុនលី(Tian Junli)អ្នកនាំពាក្យសំរាប់បញ្ជាការភូមិភាគខាងត្បូងនៃកងទ័ពរំដោះប្រជាជន បាននិយាយថា«អំពើរបស់យោធាអាម៉េរិកបានរំលោភអធិបតេយ្យភាពនិងសន្តិសុខចិនយ៉ាងធ្ងន់ធ្ងរ»។
នាវាគ្រូស៊ើរ USS Chancellorsvilleនេះទើបបើកឆ្លងកាត់ច្រកសមុទ្រតៃវ៉ាន់។
នៅក្នុងសេចក្តីថ្លែងការណ៍មួយ កងទ័ពជើងទឹកអាម៉េរិកបាននិយាយថា សេចក្តីថ្លែងការណ៍របស់ចិន«មិនពិត» ដោយហៅវាថាជា«អំពើចុងក្រោយមួយក្នុងចំណោមអំពើដូច្នេះជាបន្តបន្ទាប់របស់កងទ័ពរំដោះប្រជាជន(ចិន)ដែលធ្វើអោយគេយល់ថាប្រតិបត្តិការសមុទ្រស្របច្បាប់របស់អាម៉េរិកទៅជាខុសច្បាប់»។
ដោយចង់សំដៅសេរីភាពនាវាចរណ៍របស់យោធាអាម៉េរិក វាបាននិយាយថា«USS Chancellorsville (CG 62)បានធ្វើប្រតិបត្តិការស្របតាមច្បាប់អន្តរជាតិនិងបន្ទាប់មកបន្តធ្វើប្រតិបត្តិការធម្មតាក្នុងដែនទឹក កន្លែងដែលត្រូវអនុវត្តសេរីភាពលំហសមុទ្រ»។
សូមបញ្ជាក់ថា ចិនអះអាងដែនទឹកក្នុងសមុទ្រចិនខាងត្បូងស្ទើរទាំងអស់ហើយវាក្លាយជាចំណុចប្រទាញប្រទង់រវាងចិននិងអាម៉េរិក។អាម៉េរិកច្រានចោលការអះអាងរបស់ចិននៅក្នុងដែនទឹកដ៏សំបូរធនធាននិងជាផ្លូវដឹកជញ្ជូនដ៏សំខាន់នេះហើយតែងបញ្ជូននាវាឆ្លងកាត់វាក្នុងកិច្ចខិតខំបង្ហាញថា ការអះអាងរបស់ចិនមិនមានតំលៃ។
មុននេះ យោធាចិនបាននិយាយថា ការធ្វើដំណើរឆ្លងកាត់នៃនាវាគ្រូស៊ើររបស់អាម៉េរិកចុងក្រោយនេះបានបង្ហាញថា អាម៉េរិកជា«អ្នកបង្កហានិភ័យសន្តិសុខ»នៅក្នុងសមុទ្រចិនខាងត្បូង និងជា«ភស្តុតាងច្បាប់ក្រឡែតមួយទៀតអំពីអនុត្តរភាពរបស់អាម៉េរិកនិងការប្រែក្លាយសមុទ្រចិនខាងត្បូងទៅជាទីតាំងយោធា»៕
រូបឯកសារបង្ហាញទាហានចិនធ្វើសមយុទ្ធនៅសមុទ្រចិនខាងត្បូង។យោធាចិនបាននិយាយនៅថ្ងៃអង្គារនេះថា ទាហានរបស់ខ្លួនស្ថិតក្នុងស្ថានភាពប្រុងជើងការខ្ពស់ក្រោយបណ្តេញនាវាUSS Chancellorsville
