Views: 2
ប្រែសម្រួលៈបំណង(ស្ត្រេតថែមស៍)៖ អ្នកការទូតចិនសំខាន់ម្នាក់បាននិយាយថា អាម៉េរិកគួរប្រគល់បំណែកបាឡុងដែលខ្លួនបានបាញ់ទម្លាក់នោះមកអោយចិនដោយសារតែវាជាទ្រព្យរបស់ចិន។លោកលូ សាយ(Lu Shaye)ឯកអគ្គរដ្ឋទូតចិនប្រចាំបារាំងបាននិយាយថា«បើសិនជាអ្នករើសបានរបស់អ្វីមួយនៅតាមដងផ្លូវ អ្នកគួរប្រគល់វាទៅអោយម្ចាស់គេវិញ»។
រដ្ឋាភិបាលទីក្រុងប៉េកាំងនៅតែអះអាងថា បាឡុងនេះជាយានសិក្សាស្រាវជ្រាវអាកាសធាតុស៊ីវិលមួយ តែអាម៉េរិកអះអាងថាវាជាបាឡុងចារកម្ម។
លោកលូបានបន្ថែមថា «បើអាម៉េរិកមិនចង់ប្រគល់ វាជាការសំរេចចិត្តរបស់គេ។វាបង្ហាញចិត្តមិនស្មោះរបស់គេ»។
ក្រសួងការបរទេសចិនបាននិយាយនៅពេលមុននេះថា ចិនរក្សាសិទ្ធិឆ្លើយតបចំពោះចំណាត់ការរបស់អាម៉េរិក តែមិនបានបញ្ជាក់លម្អិតថាអ្វីជាការឆ្លើយរបស់ចិននោះទេ។
កាលពីថ្ងៃពុធអាម៉េរិកបាននិយាយថា បាឡុងចិនដែលជាច្រើនគេសង្ស័យជាយានឈ្លបយកការណ៍និងដូចបាឡុងមួយដែលខ្លួនបានបាញ់ទម្លាក់កាលពីសប្តាហ៍មុន ជាផ្នែកនៃកងបាឡុងដែលចិនបញ្ជូនចេញទៅកាន់ទ្វីបទាំងប្រាំ ហើយប្រមុខអង្គការណាតូក៏បានសម្តែងការព្រួយបារម្ភ។
រដ្ឋមន្ត្រីការបរទេសអាម៉េរិកលោក អ៊ែនថូនី ប្លីងកិន បាននិយាយថាអាម៉េរិកផ្តល់ទិន្នន័យទៅកាន់សម្ពន្ធមិត្តនៅពេលខ្លួនកំពុងវាយតំលៃបំណែកបាឡុងដែលទើបស្រង់បាន។
លោកបានប្រាប់អគ្គលេខាអង្គការណាតូថា«យើងបានចែករំលែកព័ត៌មានជាមួយប្រទេសបួនដប់នៅជុំវិញពិភពលោក ទាំងពីរដ្ឋាភិបាលទីក្រុងវ៉ាស៊ីនតោននិងតាមរយៈស្ថានទូត។យើងធ្វើដូច្នេះពីព្រោះអាម៉េរិកមិនមែនជាគោលដៅតែមួយនៃកម្មវិធីធំទូលាយនេះដែលវារំលោភអធិបតេយ្យភាពប្រទេសដទៃនៅទ្វីបទាំងប្រាំ»។
ចំណែកលេខាព័ត៌មានប្រចាំសេតវិមានបានប្រាប់អ្នកយកព័ត៌មានថា បាឡុងទាំងនេះជាផ្នែកនៃកងបាឡុងចិន ដែលគេបានប្រទះឃើញនៅជុំវិញពិភពលោកអស់ពេលជាច្រើនឆ្នាំមកហើយ។
អគ្គលេខាងអង្គការណាតូលោកជេន ស្តូលថិនប៊ឺក ដែលកំពុងធ្វើទស្សនកិច្ចទីក្រុងវ៉ាស៊ីនតោន បាននិយាយថាព្រឹត្តិការណ៍បាឡុងនេះបានបង្ហាញអំពីតំរូវការដែលប្រទេសនានានៅទូទាំងសម្ពន្ធភាពនេះត្រូវការពារខ្លួនឯង៕
អគ្គលេខាអង្គការណាតូ និងរដ្ឋមន្ត្រីការបរទេសអាម៉េរិកនិយាយអំពីបាឡុងចិនក្នុងសន្និសីទកាសែតមួយនៅវ៉ាស៊ីនតោន