Views: 1
ប្រែសម្រួល : កញ្ញាដាលីស (ស៊ីនហួ) ៖ អ្នកនាំពាក្យក្រសួងការបរទេសចិនបាននិយាយក្នុងទីក្រុងប៉េកាំងកាលពីថ្ងៃពុធទី១កុម្ភៈថា ចិនអំពាវនាវឱ្យបញ្ចប់រឿងនិទានអំពី “ការគំរាមកំហែងរបស់ចិន” និងការព្យាយាមញុះញង់ឱ្យមានការប្រឈមមុខដាក់គ្នាក្នុងតំបន់។
អ្នកនាំពាក្យក្រសួងការបរទេសចិនលោកស្រី ម៉ៅ នីង (Mao Ning)បានធ្វើការកត់សម្គាល់បែបនេះនៅក្នុងសន្និសីទសារព័ត៌មានប្រចាំថ្ងៃដើម្បីឆ្លើយតបទៅនឹងសំណួរអំពីសេចក្តីថ្លែងការណ៍រួមដែលចេញដោយជប៉ុននិងអង្គការណាតូ។ ភាគីទាំងពីរបានសម្តែងការព្រួយបារម្ភអំពីការវិវឌ្ឍនៃកិច្ចសហប្រតិបត្តិការយោធារវាងចិននិងរុស្ស៊ី។
លោកស្រីម៉ៅបាននិយាយថា ប្រទេសចិនតែងតែបម្រើជាអ្នកការពារពិភពលោកនិងសន្តិភាពព្រមទាំងស្ថិរភាពក្នុងតំបន់ ហើយរឿងនេះត្រូវបានទទួលស្គាល់យ៉ាងទូលំទូលាយ។
លោកស្រីបាននិយាយថា ចំណាត់ការយោធានិងសន្តិសុខរបស់ជប៉ុនត្រូវបានឃ្លាំមើលយ៉ាងដិតដល់ដោយប្រទេសជិតខាងអាស៊ីនានានិងសហគមន៍អន្តរជាតិ ដោយបន្ថែមថាជប៉ុនគួរតែទាញមេរៀនពីប្រវត្តិសាស្ត្រ ប្រកាន់ខ្ជាប់នូវមាគ៌ានៃការអភិវឌ្ឍដោយសន្តិភាព និងធ្វើឱ្យប្រាកដថា វាមិនធ្វើឱ្យខូចដល់ទំនុកចិត្តរវាងប្រទេសសនានា និងធ្វើឱ្យប៉ះពាល់ដល់សន្តិភាពនិងស្ថិរភាពក្នុងតំបន់។
ឆ្លើយតបទៅនឹងសំណួរអំពីការលើកឡើងរបស់អគ្គលេខាធិការអង្គការណាតូ លោក ជែន ស្តូលធិនបឺក អំពីអ្វីដែលគេហៅថាការគំរាមកំហែងផ្នែកសន្តិសុខពីប្រទេសចិន លោកស្រីម៉ៅបាននិយាយថា ខណៈអះអាងថានៅតែជាសម្ពន្ធភាពការពារក្នុងតំបន់ ណាតូបានព្យាយាមឥតឈប់ឈរដើម្បីទៅហួសពីតំបន់ការពារជាប្រពៃណីនិងវិសាលភាពរបស់ខ្លួនដោយពង្រឹងយោធានិងទំនាក់ទំនងសន្តិសុខជាមួយបណ្តាប្រទេសអាស៊ីប៉ាស៊ីហ្វិក ហើយប្រឌិតរឿងអំពី “ការគំរាមកំហែងរបស់ចិន”។
លោកស្រីម៉ៅបានបន្ថែមថា “ការវិវត្តន៍បែបនេះកំពុងអំពាវនាវឱ្យមានការប្រុងប្រយ័ត្នខ្ពស់ឡើងក្នុងចំណោមប្រទេសក្នុងតំបន់”។
លោកស្រីបាននិយាយថា ចិនបានជំរុញកិច្ចចរចាសន្តិភាពយ៉ាងសកម្មនិងព្យាយាមបន្ថយបញ្ហាក្តៅជាច្រើន។ ណាតូគួរតែគិតគូរឱ្យខ្លាំងអំពីតួនាទីដែលខ្លួនបានដើរអំពីសន្តិសុខនៅអឺរ៉ុប។
លោកស្រីម៉ៅបាននិយាយថា “អាស៊ីប៉ាស៊ីហ្វិកមិនមែនជាសមរភូមិសម្រាប់ការប្រកួតប្រជែងភូមិសាស្ត្រនយោបាយទេហើយមិនស្វាគមន៍ផ្នត់គំនិតសង្គ្រាមត្រជាក់និងការប្រឈមមុខដាក់គ្នាជាប្លុកនេះឡើយ”៕
អ្នកនាំពាក្យក្រសួងការបរទេសចិនលោកស្រី ម៉ៅ នីង
