Views: 10
ប្រែសម្រួលៈបំណង(ដេល្លីម៉េល,ស្ត្រេតថែមស៍)៖ ក្រសួងការបរទេសចិននៅថ្ងៃអង្គារទី៣១មករា បានថ្កោលទោសការនិយាយទូរស័ព្ទរវាងប្រធានាធិបតីទើបជាប់ឆ្នោតថ្មីរបស់ឆែក លោកភេតត្រ៍ ផាវ៉ែល(Petr Pavel)និងប្រធានាធិបតីតៃវ៉ាន់លោកស្រី សាយ អ៊ីង-វិន ដោយចោទលោកផាវ៉ែល ថាជាមនុស្សមិនគោរពសម្តីនិងខ្វះភាពអាចជឿទុកចិត្តបាន។
លោកស្រីសាយ បាននិយាយទូរស័ព្ទជាមួយលោកផាវ៉ែលកាលពីថ្ងៃចន្ទ ទោះជារដ្ឋាភិបាលទីក្រុងតៃប៉ិះមិនមានទំនាក់ទំនងការទូតជាមួយរដ្ឋាភិបាលទីក្រុងប្រាកក៏ដោយ។
អ្នកនាំពាក្យក្រសួងការបរទេសចិនលោកស្រី ម៉ៅ និញ(Mao Ning)បនាប្រាប់សន្និសីទកាសែតមួយថាចិនសម្តែងការមិនសប្បាយចិត្តខ្លាំងនិងសូមធ្វើការប្រឆាំងយ៉ាងមុតមាំចំពោះការទាក់ទងបែបនេះនិងថាខ្លួនបានផ្ញើការតវ៉ាប្រឆាំងទៅកាន់ភាគីឆែក។
ម៉ៅក៏បានចោទសួរអំពីភាពអាចជឿទុកចិត្តបានរបស់លោកផាវ៉ែល ចំពោះអ្វីដែលលោកស្រីបានពណ៌នាថាជាការផ្លាស់ប្តូរជំហររបស់លោក ដែលពីមុនថា ការអះអាងរបស់រដ្ឋាភិបាលទីក្រុងប៉េកាំងលើកោះសេរីនិយមនេះ គួរត្រូវបានគោរពនោះ។
ប្រធានាធិបតីតៃវ៉ាន់ សាយ អ៊ីន-វិន កាលពីថ្ងៃចន្ទបានសន្ទនាតាមទូរស័ព្ទជាមួយប្រធានាធិបតីឆែកលោក ផេតត្រ៍ ផាវ៉ែល ដែលបណ្តាលអោយចិនច្រឡោតខឹង
ការិយាល័យប្រធានាធិបតីទាំងពីរបាននិយាយថា មេដឹកនាំទាំងពីរបានសង្កត់ធ្ងន់ថា សាធារណរដ្ឋឆែកនិងតៃវ៉ាន់ចែករំលែកតំលៃនៃសេរីភាពលទ្ធិប្រជាធិបតេយ្យនិងសិទ្ធិមនុស្សរួមគ្នា ក្នុងអំឡុងការសន្ទនាអស់១៥នាទីរបស់អ្នកទាំងពីរ ហើយលោកផាវ៉ែលបាននិយាយថាលោកសង្ឃឹមថានឹងបានជួបលោកស្រីសាយនៅពេលអនាគត។
សូមបញ្ជាក់ថា ប្រទេសភាគច្រើនបំផុតក្នុងលោកជៀសវាងការទាក់ទងជាសាធារណៈជាមួយតៃវ៉ាន់ និងប្រធានាធិបតីនៃកោះនេះ ដោយមិនចង់បង្កបញ្ហាជាមួយចិន ដែលមានសេដ្ឋកិច្ចធំបំផុតទីពីរក្នុងលោក។
រំលឹកថា កាលពីឆ្នាំ២០១៦ ប្រធានាធិបតីដូណាល់ ត្រាំ បាននិយាយទូរស័ព្ទជាមួយលោកស្រីសាយមួយភ្លែតក្រោយលោកឈ្នះឆ្នោត ជាហេតុនាំអោយកើតព្យុះប្រឆាំងតវ៉ាពីចិន។
រដ្ឋាភិបាលចិនប៉េកាំងម់លឃើញតៃវ៉ាន់ជាផ្នែកមួយនៃទឹកដីរបស់ខ្លួន និងទាមទារអោយប្រទេសនានាគោរពអធិបតេយ្យភាពរបស់ខ្លួន តែរដ្ឋាភិបាលក្រុងតៃប៉ិះបដិសេធការអះអាងរបស់ចិនប៉េកាំងហើយថាមានតែប្រជាជនតៃវ៉ាន់មានសិទ្ធិសំរេចជោគវាសនារបស់គេ៕