Views: 2
ប្រែសម្រួល : កញ្ញាដាលីស (ដេល្លីម៉េល) ៖ ប្រព័ន្ធផ្សព្វផ្សាយក្នុងស្រុកបានរាយការណ៍ថា យ៉ាងហោចណាស់មនុស្ស ១៧ នាក់ត្រូវបានសម្លាប់ខណៈភាពចលាចលសង្គមបានផ្ទុះឡើងកាលពីថ្ងៃព្រហស្បតិ៍ទី២២កញ្ញានៅទូទាំងប្រទេសអ៊ីរ៉ង់ជុំវិញការស្លាប់ស្ត្រីជាប់ឃុំជនជាតិឃឺដ ឈ្មោះ ម៉ាសា អាមីនី (Mahsa Amini)ខណៈសេវាកម្មអនឡាញត្រូវបានកាត់ផ្តាច់នៅក្នុងការបង្ក្រាបសន្តិសុខ។
នាងអាមីនីអាយុ ២២ ឆ្នាំបានស្លាប់កាលពីសប្តាហ៍មុន បន្ទាប់ពីការចាប់ខ្លួនរបស់នាងពីសំណាក់ប៉ូលិសសីលធម៌ដ៏គួរឱ្យខ្លាចរបស់សាធារណរដ្ឋអ៊ីស្លាមដោយចោទប្រកាន់នាងថាបានពាក់កន្សែងជួតក្បាលហ៊ីចាបតាមរបៀប “មិនសមរម្យ” ហើយព័ត៌មាននៃការស្លាប់របស់នាងបានបង្កឱ្យមានកំហឹងពេញផ្ទៃប្រទេស។
បាតុករត្រូវគេស្តាប់ឮស្រែកថា “ស្លាប់ទៅជនផ្តាច់ការ” និង “ស្ត្រី ជីវិត សេរីភាព”នៅក្នុងវីដេអូដែលត្រូវបានចែកចាយយ៉ាងទូលំទូលាយតាមប្រព័ន្ធអនឡាញក្នុងអំឡុងពេលនៃរលកបាតុកម្មធំបំផុតដែលអង្រួនប្រទេសក្នុងរយៈពេលជិតបីឆ្នាំ។
ក្រសួងរតនាគារអាម៉េរិកបានដាក់ប៉ូលិសសីលធម៌នៅក្នុងបញ្ជីខ្មៅទណ្ឌកម្មរបស់ខ្លួន ដោយចាប់ប៉ូលិសនេះឱ្យទទួលខុសត្រូវចំពោះការស្លាប់របស់នាងអាមីនី និងបានលើកឡើងពី”ការរំលោភបំពាននិងអំពើហិង្សាលើស្ត្រីអ៊ីរ៉ង់ និងការរំលោភសិទ្ធិរបស់អ្នកតវ៉ាអ៊ីរ៉ង់ដោយសន្តិវិធី”។
ស្ត្រីជនជាតិអ៊ីរ៉ង់មួយចំនួនបានដុតកន្សែងជួតក្បាលនិងកាត់សក់ជានិមិត្តរូបដើម្បីតវ៉ាចំពោះច្បាប់ស្លៀកពាក់ដ៏តឹងរ៉ឹង ដើម្បីបន្ទរតាមការតវ៉ាពីទីក្រុងញូវយ៉ករហូតដល់ទីក្រុងអ៊ីស្តង់ប៊ុល។
យោងតាមប្រព័ន្ធផ្សព្វផ្សាយក្នុងស្រុកបានឱ្យដឹងថា ចំនួនអ្នកស្លាប់ជាផ្លូវការបានកើនឡើងដល់យ៉ាងហោចណាស់១៧ នាក់ រួមទាំងបុគ្គលិកសន្តិសុខប្រាំនាក់ផងដែរ។ប៉ុន្តែអង្គការសិទ្ធិមនុស្សអ៊ីរ៉ង់ (IHR) ដែលជាអង្គការក្រៅរដ្ឋាភិបាលមានមូលដ្ឋាននៅទីក្រុងអូស្លូ បាននិយាយថា ខ្លួនបានរាប់ការស្លាប់ជនស៊ីវិលយ៉ាងតិច ៣១ នាក់។
នាយកប្រតិបត្តិអង្គការ លោក ម៉ាមូដ អាមីរី ម៉ូហ្គាដដាម (Mahmood Amiry-Moghaddam) បាននិយាយថា ប្រជាជនអ៊ីរ៉ង់បានប្រមូលផ្តុំគ្នា”ដើម្បីសម្រេចបាននូវសិទ្ធិជាមូលដ្ឋាននិងសេចក្តីថ្លៃថ្នូររបស់មនុស្ស…ហើយរដ្ឋាភិបាលកំពុងឆ្លើយតបទៅនឹងការតវ៉ាដោយសន្តិវិធីរបស់ពួកគេជាមួយគ្រាប់កាំភ្លើង”។
អង្គការលើកលែងទោសអន្តរជាតិនិងអង្គការសិទ្ធិមនុស្សដទៃទៀតបាននិយាយថា កងកម្លាំងសន្តិសុខបានបាញ់ទៅលើហ្វូងមនុស្សជាមួយគ្រាប់បាញ់ចាបនិងគ្រាប់ដែកហើយបានដាក់ពង្រាយឧស្ម័នបង្ហូរទឹកភ្នែកនិងកាណុងបាញ់ទឹក។
ទីភ្នាក់ងារសារព័ត៌មាន IRNA ផ្លូវការបាននិយាយថា ក្រុមបាតុករបានគប់ដុំថ្មដាក់ប៉ូលិស ដុតរថយន្តប៉ូលិស និងស្រែកពាក្យស្លោកប្រឆាំងរដ្ឋាភិបាល។
រូបភាពដែលមិនធ្លាប់មានពីមុនមកបានបង្ហាញក្រុមបាតុករកម្ទេចឬដុតរូបភាពមេដឹកនាំកំពូល លោក អាយ៉ាតូឡា អាលី ខាមេនី (Ayatollah Ali Khamenei) និងមេបញ្ជាការកងឆ្មាំបដិវត្តន៍លោក កាសេម សូឡីម៉ានី (Qasem Soleimani)។
ប្រព័ន្ធផ្សព្វផ្សាយអ៊ីរ៉ង់បាននិយាយថា កាលពីថ្ងៃព្រហស្បតិ៍ អាជ្ញាធរបានចាប់ខ្លួនអ្នកថតរូបជាស្ត្រីពីរនាក់គឺ នាង នីលូហ្វា ហាមេឌី (Niloufar Hamedi) នៃកាសែតកំណែទម្រង់ Shargh និងនាង យ៉ាល់ដា ម៉ៅយេរី (Yalda Moayeri) ដែលធ្វើការឱ្យសារព័ត៌មានក្នុងស្រុក ក៏ដូចជាសកម្មជនឈ្មោះ ម៉ូហាម៉េត រីហ្សា ចាឡៃពួ (Mohammad-Reza Jalaipour) ។
Iran International ដែលជាប៉ុស្តិ៍ទូរទស្សន៍មានមូលដ្ឋាននៅទីក្រុងឡុងដ៍ បាននិយាយថា អ្នកធ្វើយុទ្ធនាការសេរីភាពបញ្ចេញមតិដ៏លេចធ្លោ ហូសសេន រ៉ូណាហ្គី (Hossein Ronaghi) ត្រូវបានចាប់ខ្លួន ខណៈគាត់កំពុងផ្តល់បទសម្ភាសន៍ដល់ពួកគេ៕
ស្ត្រីជនជាតិអ៊ីរ៉ង់មួយចំនួនបានដុតកន្សែងជួតក្បាលនិងកាត់សក់ជានិមិត្តរូបដើម្បីតវ៉ាចំពោះច្បាប់ស្លៀកពាក់ដ៏តឹងរ៉ឹង