Views: 3
ប្រែសម្រួល : កញ្ញាដាលីស (The Drive) ៖ ក្រុមទាហានអ៊ុយក្រែនកំពុងតាមប្រមាញ់ដ្រូនរុស្ស៊ី រួមទាំងប្រភេទដ្រូនអត្តឃាត (Kamikaze) ផលិតដោយអ៊ីរ៉ង់ដោយមានជំនួយពីប្រព័ន្ធកាំភ្លើងវែងបំពាក់ដោយឧបករណ៍បាញ់ឡាស៊ែរកម្រិតយោធា ដែលជាធម្មតាត្រូវបានប្រើដើម្បីសម្គាល់គោលដៅនិងវត្ថុចាប់អារម្មណ៍ផ្សេងទៀតនៅលើដីសម្រាប់អ្នកបើកយន្តហោះក៏ដូចជាអុបទិកកម្ដៅ។
ក្នុងករណីនេះ ឡាស៊ែរត្រូវបានប្រើដើម្បីនាំផ្លូវសម្រាប់ការបាញ់កាំភ្លើងចេញពីដីគោក រួមទាំងពីអាវុធធុនតូចដែលបាញ់ពីលើស្មា កាំភ្លើងយន្តដែលដាក់នៅលើរថយន្តភីកអាប់និងរថយន្តធុនស្រាលផ្សេងទៀត (ក៏ដូចជារថយន្តពាណិជ្ជកម្មនិងរថយន្តដឹកអីវ៉ាន់កែច្នៃ) សំដៅលើដ្រូនដែលហោះពីលើក្បាល។
ក្រុមប្រឆាំងដ្រូនទាំងនេះនឹងត្រូវជូនដំណឹងជាលើកដំបូងចំពោះការគំរាមកំហែងដែលហោះចូលមកដោយអ្នកស្ម័គ្រចិត្តដោយប្រើឧបករណ៍ដូចថេប្លេត ដែលចែករំលែកការពើបប្រទះនឹងដ្រូននិងព័ត៌មានអំពីទីតាំងពាក់ព័ន្ធយ៉ាងឆាប់រហ័ស។
សាច់រឿងនាពេលថ្មីៗពីកាសែត The Washington Post បានបង្ហាញសកម្មភាពរបស់អ្នកប្រមាញ់ដ្រូនអ៊ុយក្រែនមួយចំនួន។ ដ្រូនជាច្រើនប្រភេទរួមទាំងប្រភេទប្រដាប់អាវុធដែលមានទំហំតូចនិងសមត្ថភាពកាន់តែប្រសើរឡើង គឺជាអាវុធសំខាន់មួយសម្រាប់ភាគីទាំងពីរនៃជម្លោះក្នុងប្រទេសអ៊ុយក្រែន ចាប់តាំងពីរុស្ស៊ីបានចាប់ផ្តើមធ្វើការលុកលុយលើកដំបូងក្នុងខែកុម្ភៈ។ ទោះយ៉ាងណាការប្រើប្រាស់ដ្រូនអត្តឃាតរបស់រុស្ស៊ីដែលផលិតដោយអ៊ីរ៉ង់ ដែលចាប់ផ្តើមក្នុងអំឡុងខែកញ្ញា បានដាក់ការចាប់អារម្មណ៍ថ្មីទាំងស្រុងលើការគំរាមកំហែងដែលគ្មានមនុស្សបើកបរនិងសមត្ថភាពរបស់អ៊ុយក្រែនក្នុងការកម្ចាត់ពួកវា។ ការវាយប្រហារដោយដ្រូនអត្តឃាតទាំងនោះភាគច្រើនបានកើតឡើងនៅពេលយប់ ដើម្បីជួយកែលម្អលទ្ធភាពរស់រានមានជីវិតរបស់ដ្រូនដែលហោះយឺតៗដោយបង្ខំឱ្យអ្នកការពារតាមប្រមាញ់ទាំងងងឹតផងដែរ។
អត្ថបទកាសែត Washington Post សរសេរថា “សមាជិកអង្គភាពមួយជាធម្មតាប្រើឧបករណ៍ចាប់សញ្ញាកម្ដៅដូចកាំភ្លើងដើម្បីកត់សម្គាល់ដ្រូន Shahed (ពាក្យទូទៅនៅអ៊ុយក្រែនសម្រាប់ដ្រូន Shahed-136 kamikaze របស់អ៊ីរ៉ង់) មុនពេលបើកភ្លើងឡាស៊ែរដើម្បីបំភ្លឺវា ដូច្នេះទើបអ្នកផ្សេងទៀតអាចបាញ់វាទម្លាក់។ នៅពេលណាដែលដ្រូនត្រូវបានបាញ់ឡាស៊ែរបំភ្លឺ គ្រាប់ដែលបាញ់តាមពីក្រោយគឺពិតជាសន្ធាប់ខ្លាំងណាស់ ដូច្នេះជារឿយៗគេពិបាកក្នុងការដឹងណាស់ថា អង្គភាពណាជាអ្នកបំផ្លាញដ្រូន”៕
ឡាស៊ែរនិងកាំភ្លើងបំពាក់លើឡានត្រូវបានប្រើដោយទាហានអ៊ុយក្រែនដើម្បីប្រមាញ់ដ្រូនរុស្ស៊ី
