Views: 3
ប្រែសម្រួល : កញ្ញាដាលីស (ដេល្លីម៉េល) ៖ សាច់ញាតិនិងគ្រូពេទ្យបាននិយាយកាលពីថ្ងៃអង្គារទី៧កុម្ភៈថា អ្នកស្រុកដែលកំពុងជីកកកាយអគារបាក់រលំក្នុងទីប្រជុំជនមួយនៅភាគពាយព្យនៃប្រទេសស៊ីរី បានរកឃើញទារិកាកំពុងយំម្នាក់ ដែលម្តាយរបស់វាហាក់បានផ្តល់កំណើតឱ្យវា ខណៈត្រូវបានកប់នៅក្រោមគំនរបាក់បែកពីគ្រោះរញ្ជួយដីដ៏អាក្រក់នៅសប្តាហ៍នេះ។
ពួកគេបាននិយាយថា ទងផ្ចិតរបស់ក្មេងស្រីទើបនឹងកើតនេះគឺនៅជាប់នឹងម្តាយរបស់នាង ឈ្មោះ អាហ្វ្រា អាប៊ូ ហាឌីយ៉ា (Afraa Abu Hadiya) ដែលបានស្លាប់ទៅហើយ។ លោក រ៉ាម៉ាដាន ស្លីម៉ាន់ (Ramadan Sleiman) ដែលជាសាច់ញាតិបានប្រាប់ទីភ្នាក់ងារសារព័ត៌មាន The Associated Pressថា ទារិកានេះគឺជាសមាជិកតែម្នាក់គត់នៃគ្រួសាររបស់នាងដែលបានរួចរស់ជីវិតពីការដួលរលំអគារកាលពីថ្ងៃចន្ទនៅក្នុងទីប្រជុំជនតូចមួយឈ្មោះ ជីនឌឺរីស (Jinderis) ជាប់ព្រំដែនតួកគី។
រញ្ជួយដីកម្រិត ៧,៨ រិច្ឆទ័រកាលពីព្រឹកព្រលឹមថ្ងៃចន្ទអមដោយរលករញ្ជួយជាច្រើនដងទៀតបានបណ្តាលឱ្យមានការបំផ្លិចបំផ្លាញយ៉ាងទូលំទូលាយនៅទូទាំងប្រទេសតួកគី និងភាគខាងជើងប្រទេសស៊ីរី។ មនុស្សជាង៧.៨០០នាក់ត្រូវបានសម្លាប់ ដោយចំនួនអ្នកស្លាប់នៅតែបន្តកើនឡើង ខណៈសាកសពច្រើនទៀតត្រូវបានរកឃើញ។ ប៉ុន្តែការសង្គ្រោះដ៏ខ្លាំងក្លាក៏កំពុងកើតឡើងផងដែរ។ នៅកន្លែងផ្សេងទៀតក្នុងទីប្រជុំជនជីនឌឺរីស ក្មេងស្រីវ័យក្មេងម្នាក់ត្រូវបានរកឃើញនៅរស់ ដោយកប់នៅក្នុងបេតុងនៅក្រោមគំនរបាក់បែកនៃផ្ទះរបស់នាង។
ទារិកាទើបនឹងកើតខាងលើត្រូវបានជួយសង្គ្រោះកាលពីរសៀលថ្ងៃចន្ទ គឺជាង១០ម៉ោងបន្ទាប់ពីរញ្ជួយដីបានវាយប្រហារ។ លោកហានី ម៉ារ៉ូហ្វ (Hani Maarouf)ជាគ្រូពេទ្យដែលកំពុងព្យាបាលទារកនេះបាននិយាយថា បន្ទាប់ពីអ្នកជួយសង្គ្រោះបានជីកយកនាងចេញមកក្រៅ អ្នកជិតខាងស្រីម្នាក់បានកាត់ទងផ្ចិតហើយស្ត្រីនោះនិងអ្នកដទៃទៀតបានប្រញាប់បញ្ជូនទារកនេះទៅកាន់មន្ទីរពេទ្យកុមារមួយក្នុងទីក្រុងអាហ្វ្រីន (Afrin)ក្បែរនោះ កន្លែងដែលនាងត្រូវបានរក្សាទុកក្នុងកែវចិញ្ចឹម។
វីដេអូនៃការសង្គ្រោះដែលកំពុងល្បីនៅលើបណ្តាញសង្គមបានបង្ហាញគ្រាមួយបន្ទាប់ពីទារកត្រូវបានយកចេញពីគំនរបាក់បែកភ្លាមគេឃើញបុរសម្នាក់លើកនាងឡើងដោយទងផ្ចិតនៅជាប់នឹងពោះនាងនៅឡើយ ហើយប្រញាប់យកនាងចេញភ្លាម ខណៈបុរសម្នាក់ទៀតបានបោះភួយឱ្យគាត់រុំនាង។
គាត់បាននិយាយថា សីតុណ្ហភាពរាងកាយរបស់ទារិកាបានធ្លាក់ចុះត្រឹម ៣៥ អង្សាសេ ហើយនាងមានស្នាមជាំ រួមទាំងស្នាមដៅខ្មៅធំមួយនៅលើខ្នងរបស់នាងប៉ុន្តែនាងស្ថិតក្នុងស្ថានភាពនឹងនរធម្មតាទេ៕
ទារិកាមហាសំណាងត្រូវបានជួយយកចេញពីគំនរបាក់បែកទាំងនៅរស់
រហូតមកទល់ពេលនេះ មនុស្សជិត៨.០០០នាក់បានស្លាប់ដោយរញ្ជួយដីនៅតួកគីនិងស៊ីរី