Views: 3
ដោយៈសុផល/ភ្នំពេញ៖ កាល១០ឆ្នាំមុន គឺនៅឆ្នាំ២០១២ ធនាគារអេស៊ីលីដា ភីអិលស៊ី និងធនាគារជប៉ុន Sumitomo Mitsui Banking Corporation (SMBC)បានចុះកិច្ចព្រមព្រៀងសហប្រតិបត្តិការបង្កើតការិយាល័យសារជីវកម្មអន្តរជាតិរបស់ធនាគារអេស៊ីលីដាដើម្បីអាចឱ្យធនាគារផ្តល់សេវាកម្មដល់សហគ្រាសធំៗពិសេសសហគ្រាសជប៉ុន។
ឥឡូវនៅឆ្នាំ២០២២នេះ គឺជាគម្រប់ខួប១០ឆ្នាំនៃកិច្ចសហប្រតិបត្តិការរវាងធនាគារទាំងពីរ ហើយបន្ទាប់ពីសម្រេចបានសមិទ្ធិផលដ៏ល្អនិងជោគជ័យគួរឱ្យកត់សម្គាល់ភាគីទាំងពីរបានយល់ព្រមបន្តពង្រឹងកិច្ចសហប្រតិបត្តិការជាមួយគ្នាឱ្យកាន់តែប្រសើរឡើងថែមទៀតជាពិសេសការការពារបរិស្ថាន សង្គមនិងអភិបាលកិច្ចសារជីវកម្ម។
ថ្លែងក្រោយការចូលរួមអបអរខួប១០ឆ្នាំភាពជាដៃគូរវាងអេស៊ីលីដានិងធនាគារជប៉ុន SMBCនៅព្រឹកថ្ងៃទី១២សីហានៅការិយាល័យកណ្តាល លោក បណ្ឌិត អ៊ិន ចាន់នី ប្រធាននាយកប្រតិបត្តិរបស់ធនាគារអេស៊ីលីដាបានមានប្រសាសន៍ថារយៈពេល១០ឆ្នាំហើយដែលធនាគារជប៉ុនSMBCសហការជាមួយធនាគារអេស៊ីលីដាដែលបានចុះកិច្ចព្រមព្រៀងសហប្រតិបត្តិការមួយគឺបង្កើតការិយាល័យសារជីវកម្មអន្តរជាតិរបស់ធនាគារអេស៊ីលីដាដើម្បីអាចឱ្យធនាគារផ្តល់សេវាកម្មដល់សហគ្រាសធំៗពិសេស សហគ្រាសជប៉ុននៅថ្ងៃទី១២ខែសីហាឆ្នាំ២០១២កន្លងទៅ។
បណ្ឌិត អ៊ិន ចាន់នី បានបន្តថាគោលដៅសហប្រតិបត្តិការរវាងធនាគារទាំងពីរគឺដើម្បីពង្រឹងសមត្ថភាពវិជ្ជាជីវៈមន្ត្រីក្រុមប្រឹក្សាភិបាលរហូតដល់ភាគទុនិកដោយយើងបានសហការគ្នាបានល្អណាស់។
បណ្ឌិត អ៊ិន ចាន់នី បានបន្តទៀតថាបន្ទាប់ពីចុះអនុស្សារណៈជាមួយគ្នារួចហើយធនាគារជប៉ុនSMBCបានចូលហ៊ុននិងបានកាន់កាប់ភាគហ៊ុនចំនួន១២.២៥ភាគរយនៅឆ្នាំ២០១៤និងបង្កើនហ៊ុនរហូតដល់ទៅ១៨.២៥ភាគរយរហូតមកដល់បបច្ចុប្បន្ន។ចំពោះការិយាល័យសារជីវកម្មអន្តរជាតិនៅពេលចុះអនុស្សារណៈនៅឆ្នាំ២០១២មានអតិថិជនតែ៩ពាន់ខ្នាតសារជីវកម្មដែលមានទឹកប្រាក់ប្រមាណ៤០០លានដុល្លារអាមេរិក។ប៉ុន្តែមកដល់សព្វថ្ងៃចំនួនអតិថិជនបានកើនដល់២១ពាន់ខ្នាតសាជីវកម្មមានទឹកប្រាក់២ពាន់លានដុល្លារអាមេរិក។
បណ្ឌិតអ៊ិនចាន់នីបានឱ្យដឹងទៀតថាក្រៅពីពង្រឹងធនធានតាំងពីថ្នាក់វិជ្ជាជីវៈរហូតដល់ភាគទុនិកយើងបានបង្កើតនូវហេដ្ឋារចនាសម្ព័ន្ធឌីជីថល។ដោយខាងភាគីជប៉ុនបា ន រៀបចំទស្សនកិច្ចមួយឱ្យខាងធនាគារអេស៊ីលីដាទៅមើលធនគារBPTNមួយដែលគាត់បានកាន់កាប់ភាគហ៊ុនច្រើននៅប្រទេសឥណ្ឌូនេស៊ីក្នុងការបង្កើតអេបឌីជីថល។
បណ្ឌិត អ៊ិន ចាន់នី បានគូសបញ្ជាក់ថា« ការជួបជុំគ្នាថ្ងៃនេះគឺដើម្បីអបអរសាទរនូវសមិទ្ធិផលដែលធនាគារយើងទាំងពីរបានសហការគ្នាបានល្អ»។
បណ្ឌិតអ៊ិន ចាន់នី បន្ទាប់ពីបានពិភាក្សាគ្នារួចមកធនាគារទាំងពីរបានប្តេជ្ញាពង្រឹងភាពជាដៃគូជាមួយគ្នាបន្ថែមទៀតដើម្បីបង្កើនដៃគូយុទ្ធសាស្ត្រដោយផ្តោតលើចំណុចធំៗដូចជាមូលនិធិការផ្គត់ផ្គង់ការលូតលាស់និងពិនិត្យមើលបន្ថែមទៀតពាក់ព័ន្ធនិងហេដ្ឋារចនាសម្ព័ន្ធឌីជីថលឱ្យកាន់តែទំនើបឡើងក៏ដូចជាពិនិត្យមើលហិរញ្ញប្បទានពាណិជ្ជ កម្មអន្តរជាតិដើម្បីពង្រីកបន្ថែមទៀត។
បណ្ឌិត អ៊ិន ចាន់នីបានឱ្យដឹងទៀតថាក្រៅពីនេះធនាគារទាំងពីរក៏បានេកភាពគ្នាទៅលើការងារចំនួន៣សំខាន់ៗគឺទី១ បរិស្ថាន ទី២ សង្គមនិងទី៣អភិបាលកិច្ចសារជីវកម្ម។លោកបានបន្តថាការងារបរិស្ថាននេះធនាគារទាំងពីរនឹងរៀបចំយ៉ាងណាក្នុងការផ្តល់ហិរញ្ញវត្ថុជូនដល់អតិថិជនរក្សាបាននូវបរិស្ថានល្អ និងមិនបំពានបរិស្ថាន។
បណ្ឌិតអ៊ិនចាន់នីបានបន្ថែមថា«ការផ្តល់សេវាកម្មធនាគារនិងហិរញ្ញវត្ថុមិនមែនចេះតែផ្តល់បានទទួលផលចំណេញតែមួយមុខនោះទេគឺគិតអំពីបរិស្ថានថាតើអ្នកទទួលសេវាពីយើងទៅប្រើប្រាស់នឹងបានប្រើទៅតាមអ្វីដែលបានឯកភាពគ្នាដែរឬទេតើមានផលប៉ះពាល់អ្វីខ្លះដល់បរិស្ថានគឺយើងពិនិត្យមើលចំណុចបរិស្ថាននេះ»។
បណ្ឌិតអ៊ិនចាន់នីបានបន្តទៀតថាចំពោះសង្គមយើងពិនិត្យមើលទាំងអ្នកពាក់ព័ន្ធសហការីនិងអតិថិជនរបស់យើងចូលរួមជាមួយគ្នានិងកម្មវិធីសង្គមផ្សេងៗដែលយើងធ្លាប់ធ្វើកន្លងមកបានល្អនិងបង្កើនការចូលរួមបន្ថែមទៀត។
បណ្ឌិតអ៊ិនចាន់នីបានឱ្យដឹងថាចំណែកអភិបាលកិច្ចសារជីវកម្មទោះបីជាយើងមានចំណាត់ថ្នាក់បានល្អហើយក៏ដោយក៏ត្រូវគិតគូរបន្តទៀតដើម្បីក្លាយជាក្រុមហ៊ុនដែលមានលក្ខណៈអន្តរជាតិជាសាកល។ នៅក្នុងការចំណាត់ថ្នាក់E&Sគេឱ្យពិន្ទុ៥។ប៉ុន្តែយើងសព្វថ្ងៃទទួលបានពិន្ទុ៣លើមធ្យមអីចឹងបង្កើវាឱ្យដល់៤ក្នុងរយៈពេលមិនលើសពី២ឆ្នាំទេ។ចំណែកចំណាត់ថ្នាក់អភិបាលកិច្ចសារជីវកម្មវាអាស្រ័យលើចំណាត់ថ្នាក់លើប្រទេសបើប្រទេសនឹងកើនយើងនឹងមានកំណើនទៅតាមនឹងដែរ»។
គួររម្លឹកថា៖អនុស្សរណៈនៃការយោគយល់គ្នាកាលពី១០ឆ្នាំមុនធនាគារទាំងពីរផ្តល់ការគាំទ្រគ្នាទៅវិញទៅមក ចំពោះអតិថិជនរបស់ខ្លួន ក៏ដូចជាសហប្រតិបត្តិការសេដ្ឋកិច្ចរវាងប្រទេសកម្ពុជា និងប្រទេសជប៉ុន លើសកម្មភាពដូចជា ៖ ឥណទានសម្រាប់មុខជំនួញ សេវាបញ្ញើ-សន្សំ សេវាផ្ទេរប្រាក់ សេវាចាត់ចែងសាច់ប្រាក់ ហិរញ្ញប្បទានពាណិជ្ជកម្ម និងសេវាធនាគារជាច្រើនទៀត ។ ម្យ៉ាងវិញទៀតធនាគារទាំងពីរ នឹងផ្លាស់ប្តូរព័ត៌មានទូទៅដែលទាក់ទងទៅនឹងសេដ្ឋកិច្ច, ឧស្សាហកម្ម, ផលិតផលហិរញ្ញវត្ថុ, ទីផ្សារហិរញ្ញវត្ថុ និងធនាគារ, ពាណិជ្ជកម្មអន្តរជាតិ, ប្រព័ន្ធផ្សេងៗ និងច្បាប់ស្តីពីឧស្សាហកម្មធនាគារ និងហិរញ្ញវត្ថុ ក៏ដូចជាព័ត៌មានរបស់អតិថិជន ដែលប្រើប្រាស់សេវាឥណទានរបស់ប្រទេសទាំងពីរជាមួយគ្នា៕Ph