Views: 3
ដោយ៖ សុវណ្ណកុម្ភៈ / ភ្នំពេញ៖ ទង់អាស៊ានប៉ារ៉ាហ្គេម បានដង្ហែមកដល់កម្ពុជាហើយ កាលពីល្ងាចថ្ងៃទី៧ សីហា ម្សិលមិញនេះ ។
សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិ រៀបចំស៊ីហ្គេម និងអាស៊ានប៉ារ៉ាហ្គេម បានទៅចូលរួមស្វាគមន៍ និងទទួលទង់ សម្រាប់ព្រឹត្តិការណ៍អាស៊ានប៉ារ៉ាហ្គេម លើកទី១២ ឆ្នាំ២០២៣ ដែលកម្ពុជា ធ្វើជាម្ចាស់ផ្ទះ ពីលោក ហ៊ុន ម៉ានី ដោយផ្ទាល់ នៅអាកាសយានដ្ឋានអន្តរជាតិភ្នំពេញ។
ជាមួយគ្នានេះ ក្បួនរថយន្ដស៊ីរ៉ែន និងម៉ូតូ ស បានអមជាកិត្តិយសដង្ហែ ដល់ក្រុមជ័យលាភី កាត់តាមមហាវិថីសំខាន់ៗនានា ក្នុងរាជធានីភ្នំពេញ មុននឹងចូលទៅស្ដាប់មតិសំណេះសំណាលជាមួយ សម្ដេចពិជ័យសេនា នៅទីស្នាក់ការគណៈកម្មាធិការជាតិ អូឡាំពិកកម្ពុជា។
សូមបញ្ជាក់ថា ព្រឹត្តិការណ៍អាស៊ានប៉ារ៉ាហ្គេម លើកទី១១ នៅប្រទេសឥណ្ឌូណេស៊ី បានចាប់ផ្ដើមពីថ្ងៃទី៣០ កក្កដា ដល់ថ្ងៃទី៦ សីហា នៅទីក្រុងសូឡូ ប្រទេសឥណ្ឌូណេស៊ី។ កម្ពុជា បានបញ្ជូនកីឡា ១១ ប្រភេទ ក្នុងចំណោម ១៤ ប្រភេទកីឡា ទៅចូលរួមប្រកួត។
ជាលទ្ធផល កម្ពុជា ដណ្ដើមបានមេដាយ ចំនួន ២៨ គ្រឿង ដែលក្នុងនោះ មានមេដាយ មាស ៧ គ្រឿង មេដាយប្រាក់ ១០ គ្រឿង និងមេដាយសំរិទ្ធ ចំនួន ១១ គ្រឿង។ មានតែ ៤ ប្រភេទកីឡាប៉ុណ្ណោះ ដែលមិនទទួលបានមេដាយ៕/V
