Views: 4
ដោយៈប.ខុន / ភ្នំពេញៈ ទឹកទន្លេមេគង្គ បន្តងើបឡើងជាលំដាប់ តែមិនទាន់ឈានដល់ កម្រិតជំនន់នៅឡើយទេ ទោះបីមានភ្លៀងរហូតដល់លិចលង់ផ្នែកខ្លះ នៃទីក្រុងវៀងច័ន្ទ ប្រទេសឡាវ ក៏ដោយ ព្រោះវានៅឆ្ងាយណាស់។ ទឹកទន្លេ នៅគ្រប់ស្ថានីយជលសាស្ត្រ បានងើបឡើង តែមិនទាន់ដល់កម្រិតជំនន់នោះទេ។ នៅបឹងទន្លេសាប ទឹកបានឡើងដល់ កម្រិតកម្ពស់ ៣,៧៩ ម៉ែត្រ (ថ្ងៃទី៨ សីហា) និងនៅចតុមុខ ទឹកទន្លេមេគង្គ អាចឡើងដល់ កម្រិតកម្ពស់ ៦,០២ ម៉ែត្រ នៅថ្ងៃទី១១ ខែសីហា។
លោក ចាន់ យុត្ថា អ្នកនាំពាក្យ និងជារដ្ឋលេខាធិការ ក្រសួងធនធានទឹក និងឧតុនិយម បានប្រាប់ឱ្យរស្មីកម្ពុជាដឹង នៅថ្ងៃទី៨ ខែសីហា ឆ្នាំ២០២២ថាៈ ទឹកទន្លេមេគង្គ នៅ ក្នុងសប្តាហ៍នេះ បន្តងើបឡើងជាលំដាប់ តែវាមិនទាន់ឈានទៅដល់កម្រិតជំនន់ ត្រូវព្រួយបារម្ភនៅឡើយទេ ទោះបីជាពីរថ្ងៃមុននេះ មានភ្លៀងធ្លាក់ ដល់កម្រិតជាង ១០០ មីលីម៉ែត្រ ធ្វើឱ្យមានជំនន់លិចលង់ផ្នែកខ្លះ នៃទីក្រុងវៀងច័ន្ទ ប្រទេសឡាវ ហើយមកដល់ថ្ងៃចន្ទ ទី៨ ខែសីហានេះ កន្លែងខ្លះ មិនទាន់ស្រកអស់នៅឡើយទេ។
អ្នកនាំពាក្យក្រសួងជំនាញ ខាងលើ បាននិយាយឱ្យដឹងទៀតថាៈ ភ្លៀងធ្លាក់នៅក្រុងវៀងច័ន្ទ វាហូរធ្លាក់ចូលទន្លេមេគង្គ តែទីក្រុងនេះ វាស្ថិតនៅឆ្ងាយពីប្រទេសកម្ពុជា ទំរាំហូរមកដល់ វាចុះខ្សោយហើយ។ តែវាបានធ្វើឱ្យទឹកទន្លេមេគង្គ ងើបឡើង នៅគ្រប់ស្ថានីយជលសាស្ត្រ ហើយនឹងបន្តឡើងថែមទៀត នៅក្នុងសប្តាហ៍នេះ បន្ទាប់ពីវិសម្ពាធ ឬជាកូនព្យុះ ដែលពេលនេះ ស្ថិតនៅក្នុងកម្រិតសម្ពាធទាបសកម្ម នៅក្នុងសមុទ្រចិនខាងត្បូង មានដំណើរឡើង ខាងលើ (ជើង) កោះហៃណាំ ចូលទៅក្នុងឈូងសមុទ្រតុងកឹង មុននឹងឡើងគោក លើឆ្នេរប្រទេសវៀតណាម ខាងជើង។
លោក ចាន់ យុត្ថា បានបញ្ជាក់ថាៈ បាតុភូខាងលើនេះ ធ្វើឱ្យនៅក្នុងប្រទេសកម្ពុជា មានខ្យល់កើនឡើងខ្លាំងបន្តិច ជាពិសេសនៅតំបន់មាត់សមុទ្រ។ ភ្លៀងបន្តមានធ្លាក់ រាយប៉ាយ ក្នុងកម្រិតពីតិចទៅច្រើន ជាពិសេស នៅតំបន់ខ្ពង់រាប អាចមានភ្លៀងធ្លាក់ច្រើន។ ទឹកទន្លេមេគង្គ ក្នុងប្រទេសកម្ពុជា នៅគ្រប់ស្ថានីយជលសាស្ត្រ មិនទាន់មានទឹកឡើងខ្ពស់ ដល់កម្រិតព្រួយបារម្ភនៅឡើយទេ។
យោងតាមព្រឹត្តិប័ត្រព៍ត័មានមេគង្គ ស្តីពីកម្ពស់ទឹក ពីថ្ងៃទី៦ ដល់ថ្ងៃទី៧ ខែសីហា និងការព្យាករ នៅតាមស្ថានីយជលសាស្ត្រ តាមដងទន្លេមេគង្គ ទន្លេសាប និងទន្លេបាសាក់ ពីថ្ងៃទី៨ ដល់ ១២ ខែសីហា បង្ហាញឱ្យឃើញថាៈ ទឹកនៅគ្រប់ស្ថានីយ ទាំងនៅក្នុងប្រទេសឡាវ ថៃ កម្ពុជា និង វៀតណាម បានងើបឡើងជាលំដាប់ ដោយនៅចតុមុខ ទឹកអាចនឹងឡើង ដល់កម្ពស់ ៥,៩២ ម៉ែត្រ នៅថ្ងៃទី១២ ខែសីហា។
ឯព្រឹត្តិប័ត្រព៍ត័មាន និងព្យាករកម្ពស់ទឹករបស់ ក្រសួងធនធានទឹក និងឧតុនិយម ថ្ងៃទី៨ ខែសីហា បង្ហាញឱ្យឃើញថាៈ ស្ថានភាពទឹក នៅគ្រប់ស្ថានីយជលសាស្ត្រ បានបន្តងើបឡើង ជាលំដាប់ ដោយនៅថ្ងៃទី៨ ខែសីហា នៅចតុមុខ មានកម្ពស់ ៥,៣៥ ម៉ែត្រ ខ្ពស់ជាងថ្ងៃទី៧ ខែសីហា ០,១៣ ម៉ែត្រ ហើយវានឹងឡើងដល់កម្ពស់ ៦,០២ ម៉ែត្រ នៅថ្ងៃទី១១ ខែសីហា។ ទឹកបឹង ទន្លេសាប នៅក្រគរ កំពង់លួង ថ្ងៃទី៨ ខែសីហា បានឡើងដល់កម្រិតកម្ពស់ ៣,៧៩ ម៉ែត្រ ខ្ពស់ជាងថ្ងៃទី៧ ខែសីហា ០,០៤ ម៉ែត្រ៕/V
