Views: 2
ប្រែសម្រួលៈបំណង(វ៉េអិនអិចស្ព្រេស)៖ ការធ្លាក់ភ្លៀងខ្លាំងបង្កទឹកជំនន់ពន្លិចផ្ទះរាប់រយនៅក្នុងទីប្រជុំជន មឿង សិន(Muong Xen)ក្នុងខេត្តង៉េអាន(Nghe An)កាលពីថ្ងៃអាទិត្យនៅពេលរថយន្តនិងរបស់របរផ្សេងៗត្រូវទឹកហូរនាំយកទៅគួរអោយខ្លាច។តាំងពីមុនមក មនុស្សប្រាំពីរនាក់នៅក្នុងខេត្តនេះត្រូវបានរាយការណ៍ថាបានស្លាប់ដោយឧបទ្ទវហេតុផ្សេងៗពាក់ព័ន្ធនឹងព្យុះណូរុ រួមទាំងការលង់ទឹកជំនន់ផង។
ភ្លៀងបានចាប់ផ្តើមកាលពីយប់ថ្ងៃសៅរ៍នៅស្រុកគីសឺន ជាប់ព្រំដែនឡាវ ដោយបង្កការលិចលង់ខ្លាំងបំផុតតាំងពីម៉ោងបួនជិតភ្លឺ នៅពេលទឹកហូរចុះមកពីខ្សែទឹកខាងលើ។ត្រឹមម៉ោងប្រាំបីព្រឹក ទឹកបានឡើងកំពស់ពីរម៉ែត្រ ដោយបង្ខំអោយអ្នកស្រុកភៀសខ្លួនទៅកាន់ទីខ្ពស់ៗ។
យ៉ាងហោចណាស់រថយន្តតូចពីរត្រូវទឹកហូរនាំយកទៅ តែមិនមានមនុស្សនៅក្នុងរថយន្តទេ។
ដោយសារព្យុះណូរុ ទឹកភ្លៀងធ្លាក់នៅក្នុងខេត្តង៉េអានកំពស់៣០០ទៅ៦០០មីលីម៉ែត្រចាប់ពីថ្ងៃ២៧ដល់២៩កញ្ញា ដោយពន្លិចផ្ទះប្រមាណ១១.០០០ខ្នងនៅ១៣ស្រុក៕