Views: 9
ប្រែសម្រួល : កញ្ញាដាលីស (ដេល្លីម៉េល) ៖ ប្រព័ន្ធត្រួតពិនិត្យសុវត្ថិភាពបានចេញការព្រមានថា វ៉ាក់សាំងកូវីដអាប់ដេតថ្មីរបស់ក្រុមហ៊ុនផលិតឱសថអាម៉េរិក Pfizer Inc និងដៃគូអាល្លឺម៉ង់ BioNTech អាចត្រូវបានផ្សារភ្ជាប់ទៅនឹងប្រភេទនៃជំងឺដាច់សរសៃឈាមខួរក្បាល ហៅថា អាស្គីម៉ិកស្ត្រូក (Ischemic stroke) ចំពោះមនុស្សចាស់នេះបើយោងតាមទិន្នន័យបឋមដែលបានវិភាគដោយអាជ្ញាធរសុខាភិបាលអាម៉េរិក។
មជ្ឈមណ្ឌលគ្រប់គ្រងនិងបង្ការជំងឺ (CDC)និងរដ្ឋបាលចំណីអាហារនិងឱសថ (FDA)របស់សហរដ្ឋអាម៉េរិកបាននិយាយកាលពីថ្ងៃសុក្រទី១៣មករាថា មូលដ្ឋានទិន្នន័យវ៉ាក់សាំងរបស់ CDCបានរកឃើញបញ្ហាសុវត្ថិភាពដែលអាចកើតមាន ដែលក្នុងនោះមនុស្សអាយុចាប់ពី ៦៥ ឆ្នាំឡើងទៅទំនងជានឹងមានអាស្គីម៉ិកស្ត្រូកនៅ ២១ ថ្ងៃក្រោយទទួលវ៉ាក់សាំង Pfizer/BioNTech។
អេស្គីម៉ិកស្ត្រូក ដែលគេស្គាល់ផងដែរថា កំណកឈាមក្នុងខួរក្បាល គឺបណ្តាលមកពីការស្ទះនៅក្នុងសរសៃឈាមដែលនាំឈាមទៅកាន់ខួរក្បាល។
FDA និង CDC បាននិយាយថា ការសិក្សាធំៗផ្សេងទៀត ប្រព័ន្ធរាយការណ៍អំពីផលវិបាកនៃវ៉ាក់សាំងរបស់ CDC មូលដ្ឋានទិន្នន័យរបស់ប្រទេសផ្សេងទៀត និងមូលដ្ឋានទិន្នន័យរបស់ក្រុមហ៊ុន Pfizer-BioNTech មិនបានព្រមានអំពីបញ្ហាសុវត្ថិភាពមួយនេះនោះទេ ដោយបន្ថែមថា វាទាមទារការស៊ើបអង្កេតបន្ថែមទៀត។
អាជ្ញាធរសុខាភិបាលទាំងពីរបាននិយាយថា “ទោះបីជាចំនួនសរុបនៃទិន្នន័យនាពេលបច្ចុប្បន្ននេះបង្ហាញថា វាមិនទំនងទាល់តែសោះដែលថាសញ្ញានៅក្នុងទិន្នន័យ VSD (Vaccine Safety Datalink) តំណាងឱ្យហានិភ័យគ្លីនិកពិតប្រាកដក៏ដោយ ក៏យើងនៅតែជឿថាវាមានសារៈសំខាន់ក្នុងការចែករំលែកព័ត៌មាននេះជាមួយសាធារណជន”។
ក្រុមហ៊ុន Pfizer និង BioNTech បាននិយាយនៅក្នុងសេចក្តីថ្លែងការណ៍មួយថា ពួកគេបានទទួលដំណឹងអំពីរបាយការណ៍មួយចំនួនតូចអំពីអាស្គីម៉ិកស្ត្រូកចំពោះមនុស្សអាយុចាប់ពី ៦៥ ឆ្នាំឡើងទៅ បន្ទាប់ពីការចាក់វ៉ាក់សាំងថ្មីៗរបស់ពួកគេ។
ក្រុមហ៊ុនទាំងពីរបានបន្ថែមថា “ទាំង Pfizer និង BioNTech និង CDC ឬ FDAមិនបានសង្កេតឃើញលទ្ធផលស្រដៀងគ្នានេះនៅទូទាំងប្រព័ន្ធត្រួតពិនិត្យផ្សេងទៀតនៅក្នុងសហរដ្ឋអាម៉េរិកនិងនៅទូទាំងពិភពលោកនោះទេ ហើយមិនមានភស្តុតាងណាមួយដើម្បីសន្និដ្ឋានថា អាស្គីម៉ិកស្ត្រូកត្រូវបានផ្សារភ្ជាប់ជាមួយនឹងការប្រើប្រាស់វ៉ាក់សាំងកូវីដ១៩របស់ក្រុមហ៊ុននោះដែរ”។
ក្តីបារម្ភអំពីសុវត្ថិភាពនេះមិនត្រូវបានរកឃើញជាមួយរបបវ៉ាក់សាំងពីរដូសរបស់ក្រុមហ៊ុន Modernaនោះទេ ហើយទាំង CDC និង FDA បន្តណែនាំឱ្យមនុស្សគ្រប់រូបដែលមានអាយុចាប់ពី ៦ ខែឡើងទៅ ត្រូវបន្តធ្វើបច្ចុប្បន្នភាពជាមួយនឹងការចាក់វ៉ាក់សាំងកូវីដ១៩របស់ពួកគេ៕
វ៉ាក់សាំងកូវីដអាប់ដេតថ្មីរបស់ក្រុមហ៊ុន Pfizer Inc អាចត្រូវបានផ្សារភ្ជាប់ទៅនឹងអាស្គីម៉ិកស្ត្រូកក្នុងចំណោមមនុស្សវ័យចាស់
