Views: 3
ប្រែសម្រួលៈបំណង(ស្ត្រេតថែមស៍)៖ មេដឹកនាំកូរ៉េខាងជើងលោក គីម ជុងអ៊ុន បាននិយាយថា គោលដៅចុងក្រោយបំផុតរបស់ប្រទេសលោកគឺការមានកងកម្លាំងនុយក្លេអ៊ែរដ៏មានអំណាចខ្លាំងបំផុតនៅក្នុងលោក នេះបើតាមការផ្សាយរបស់សារព័ត៌មានរដ្ឋកាលពីថ្ងៃអាទិត្យ។
លោកក៏បានដំឡើងឋានៈនាយទាហានជាច្រើនដែលបានចូលរួមពាក់ព័ន្ធនឹងការបាញ់សាកល្បងកាំជ្រួចកាលពីពេលថ្មីៗ។
ការប្រកាសអំពីបំណងរបស់មេដឹកនាំកូរ៉េខាងជើងនេះកើតឡើងក្រោយពីលោកគីមបាននាំទាំងប្រពន្ធនិងកូនទៅមើលការបាញ់បង្ហោះកាំជ្រួច Hwasong-17 ដែលជាកាំជ្រួចផ្លោងឆ្លងទ្វីប(ICBM)ថ្មីបំផុតរបស់ប្រទេស និងបានសន្យាទប់ទល់នឹងការគំរាមប្រើនុយក្លេអ៊ែរពីអាម៉េរិកកាលពីថ្ងៃ១៨វិច្ឆិកា។
ក្នុងពិធីដំឡើងឋានៈនាយទាហាន លោកគីមបាននិយាយថាការស្ថាបនាកងកម្លាំងនុយក្លេអ៊ែរគឺសំរាប់ការពារសេចក្តីថ្លៃថ្នូរនិងអធិបតេយ្យភាពរបស់រដ្ឋនិងប្រជាជន ហើយ«គោលដៅចុងក្រោយបំផុតរបស់វាគឺកូរ៉េខាងជើងជាមួយនឹងកងកម្លាំងយុទ្ធសាស្ត្រដ៏មានឥទ្ធិពលបំផុតនៅក្នុងលោក ជាកងកម្លាំងដាច់ខាតដែលមិនធ្លាប់មាននៅក្នុងសតវត្សរ៍នេះ»។
លោកបានហៅកាំជ្រួចHwasong-17ជា«សព្វាវុធយុទ្ធសាស្ត្រខ្លាំងបំផុតក្នុងលោក»និងថាវាបានបង្ហាញអំពីការតាំងចិត្តនិងលទ្ធភាពរបស់កូរ៉េខាងជើងក្នុងការស្ថាបនាកងទ័ពខ្លាំងបំផុតលើកលោកនៅទីបំផុតទៅ។
គីមក៏បានអួតអាងថា ក្រុមអ្នកវិទ្យាសាស្ត្រកូរ៉េខាងជើងបានធ្វើអោយមានការរីកចំរើនមហាលោតផ្លោះនៅក្នុងការអភិវឌ្ឍបច្ចេកវិទ្យាបំពាក់ក្បាលគ្រាប់នុយក្លេអ៊ែរលើកាំជ្រួចផ្លោង។
ដោយឈរថតជាមួយក្រុមអ្នកវិទ្យាសាស្ត្រ វិស្វករនិងនាយទាហានដែលបានចូលរួមការសាកល្បងកាំជ្រួចនាពេលកន្លងមក លោកគីមបាននិយាយថាលោករំពឹងថាពួកគេបន្តពង្រឹងពង្រីកកម្លាំងនុយក្លេអ៊ែររារាំងសត្រូវក្នុងល្បឿនឆាប់រហ័សយ៉ាងពិសេស៕
គីម ជុងអុន អួតថា ការសាកល្បងនាពេលកន្លងមកបញ្ជាក់ថាកូរ៉េខាងជើងមានសមត្ថភាពពេញលេញក្នុងការឈរតតតាំងនឹងឧត្តមភាពនុយក្លេអ៊ែររបស់អាម៉េរិក និងបញ្ជាក់ថាកូរ៉េខាងជើងជារដ្ឋមានកាំជ្រួចICBMដ៏មានអានុភាពបំផុតក្នុងលោក
