Views: 1
ប្រែសម្រួល : កញ្ញាដាលីស (ដេល្លីម៉េល) ៖ អ្នកវិទ្យាសាស្ត្របីនាក់បានទទួលរង្វាន់ណូបែលគីមីវិទ្យាប្រចាំឆ្នាំរួមគ្នាកាលពីថ្ងៃពុធទី៥តុលាសម្រាប់ការបង្កើតវិធី “ភ្ជាប់ម៉ូលេគុលជាមួយគ្នា”ដែលអាចត្រូវបានប្រើដើម្បីរុករកកោសិកា គូសផែនទី DNAនិងរចនាថ្នាំ ដែលអាចកំណត់គោលដៅលើជំងឺដូចជា មហារីកបានយ៉ាងជាក់លាក់។
ជនជាតិអាម៉េរិក លោកស្រី ខារ៉ូលីន អរ បឺតូសហ្ស៊ី (Carolyn R. Bertozzi) លោក ខេ បារី សាបឡេស (K. Barry Sharpless) និងអ្នកវិទ្យាសាស្ត្រជនជាតិដាណឺម៉ាកលោក ម៉ូថិន មែលដាល់ (Morten Meldal) បានឈ្នះពានសម្រាប់ស្នាដៃរបស់ពួកគេលើគីមីវិទ្យាសំយោគ ដែលធ្វើការ “ដូចម៉ូលេគុល Lego”។
លោក ចូហាន អាក់វីស (Johan Aqvist) សមាជិករាជបណ្ឌិត្យសភាវិទ្យាសាស្ត្រស៊ុយអែត ដែលប្រកាសអ្នកឈ្នះនៅវិទ្យាស្ថានការ៉ូលីនស្កា (Karolinska) ក្នុងទីក្រុងស្តុកខុល បាននិយាយថា “អ្វីៗទាំងអស់គឺអំពីការភ្ជាប់ម៉ូលេគុលរួមគ្នា”។
លោកសាបឡេសអាយុ ៨១ ឆ្នាំ ដែលពីមុនបានឈ្នះរង្វាន់ណូបែលក្នុងឆ្នាំ ២០០១ ហើយឥឡូវនេះគឺជាមនុស្សទីប្រាំ ដែលទទួលបានរង្វាន់ណូបែលពីរដងនោះដំបូងឡើយបានលើកឡើងអំពីគំនិតនៃការភ្ជាប់ម៉ូលេគុលដោយប្រើ “កន្លាស់” គីមីនៅអំឡុងដើមសហស្សវត្សរ៍នេះ។
លោកបានបន្តថា “បញ្ហាគឺត្រូវរកកន្លាស់គីមីល្អ។ ពួកវាត្រូវតែប្រតិកម្មជាមួយគ្នាយ៉ាងងាយស្រួលនិងយ៉ាងពិសេស”។
លោកមែលដាល់ អាយុ ៦៨ ឆ្នាំដែលមានមូលដ្ឋាននៅសាកលវិទ្យាល័យកូប៉ិនហាក និង លោកសាបឡេស ដែលមានទំនាក់ទំនងជាមួយវិទ្យស្ថានស្រាវជ្រាវស្គ្រីប (Scripps Research)នៅរដ្ឋកាលីហ្វ័រញ៉ា បានរកឃើញដោយឯករាជ្យនូវម៉ូលេគុលបែបនេះដំបូងគេ ដែលងាយស្រួលភ្ជាប់គ្នាទៅវិញទៅមក ជាហេតុនាំឱ្យមានការអនុវត្តក្នុងការផលិតឱសថ និងប៉ូលីមែរ (polymers)៕
លោកស្រី ខារ៉ូលីន អរ បឺតូសហ្ស៊ី (រាប់ពីឆ្វេងទៅស្តាំ) លោក ខេ បារី សាបឡេស និងលោក ម៉ូថិន មែលដាល់ ឈ្នះពានណូបែលគីមី