Views: 8
ប្រែសម្រួល : កញ្ញាដាលីស (ដេល្លីម៉េល) ៖ ហ្វូស៊ីលសត្វល្មូនសមុទ្រអាយុ ១៨០ លានឆ្នាំត្រូវគេសន្មតថានឹងលក់ក្នុងតម្លៃជាង ៥០០.០០០ ផោន (ជាង៦០ម៉ឺនដុល្លារ) នៅឯការលក់ដេញថ្លៃ។
វាគឺជាគ្រោងឆ្អឹងរបស់អ៊ីចធីយ៉ូស័រ (ichthyosaur) ជាសត្វមំសាសីពូជជូរ៉ាសស៊ីក (Jurassic) ប្រវែងប្រហែល ២,៤ ម៉ែត្រ ហើយត្រូវបានរក្សាទុកក្នុងភក់ទន់ៗបានយ៉ាងល្អ មុនពេលគេជីកកកាយឃើញវា។
សំណាកឆ្អឹងនេះត្រូវបានរកឃើញនៅក្នុងតំបន់ភូគព្ភសាស្ត្រក្នុងទីក្រុងឡូរេន (Lorraine) ប្រទេសបារាំងនៅដើមទសវត្សរ៍ឆ្នាំ ២០០០ ក្នុងអំឡុងពេលសាងសង់ខ្សែរថភ្លើងល្បឿនលឿន TGV។
ដោយសារហ្វូស៊ីលអ៊ីចធីយ៉ូស័រពេញលេញភាគច្រើនជាកម្មសិទ្ធិរបស់សារមន្ទីរ ចឹងគ្រោងឆ្អឹងដែលលេចឡើងនៅលើទីផ្សារឯកជនជាធម្មតាមានតម្លៃខ្ពស់ណាស់។
គ្រោងឆ្អឹងមួយនេះនឹងដាក់លក់ដេញថ្លៃនៅបុនហាម (Bonhams) ក្នុងទីក្រុងប៉ារីសនៅថ្ងៃទី ១៣ ខែធ្នូហើយត្រូវគេរំពឹងថានឹងមានតម្លៃរាប់សែនដុល្លារ។
លោកស្រី ក្លោឌា ផ្លរៀន (Claudia Florian) នាយកប្រឹក្សានៃនាយកដ្ឋានប្រវត្តិសាស្ត្រធម្មជាតិបុនហាម (Bonhams) បាននិយាយថា “គ្រោងឆ្អឹងនេះគឺពេញលេញបំផុត ជាមួយនឹងឆ្អឹងដើមនៅសល់សរុបជាង ៨០ ភាគរយ”។
“វាជាលើកទីមួយហើយ ដែលសំណាកពេញលេញបែបនេះ ដែលរកឃើញនៅក្នុងប្រទេសបារាំង នឹងត្រូវដាក់លក់ដេញថ្លៃ”៕
គ្រោងឆ្អឹងសត្វល្មូនសមុទ្រ អ៊ីចធីយ៉ូស័រ នឹងលក់ដេញថ្លៃនៅថ្ងៃទី ១៣ ខែធ្នូ