Views: 1
ប្រែសម្រួល : កញ្ញាដាលីស (ដេល្លីម៉េល) ៖ គ្រូបង្វឹកប្រេស៊ីលលោកទីតេ (Tite)ជឿជាក់ថា នីម៉ា ដែលរងរបួស នឹងអាចចូលលេងម្តងទៀតនៅវើខាប់កាតា ខណៈគាត់និយាយថាការទាត់ធាក់លើកីឡាករឱ្យរបួស “ត្រូវតែបញ្ឈប់”។
នីម៉ាបានរបួសចុងម៉ោង នៅពេលប្រេស៊ីលបើកយុទ្ធនាការពូល G របស់ពួកគេជាមួយនឹងជ័យជម្នះ ២-០ លើសែប៊ីកាលពីថ្ងៃព្រហស្បតិ៍។ហើយកាលពីថ្ងៃសុក្រ គ្រូពេទ្យរបស់ក្រុមជម្រើសជាតិបានបង្ហើបថា ទាំងខ្សែប្រយុទ្ធ Paris St Germain រូបនេះ និងខ្សែការពារ ដានីឡូ (Danilo) នឹងខកខានការប្រកួតនៅថ្ងៃចន្ទជាមួយស្វីស ដោយសារបញ្ហាកជើង។
នីម៉ាត្រូវគេនិយាយថាមានរបួសសរសៃពួរចំហៀងនៅកជើងស្តាំរបស់គេរួមនឹងការហើមឆ្អឹងតូច។
លោកទីតេបានប្រាប់សន្និសីទសារព័ត៌មានកាលពីថ្ងៃអាទិត្យថា “ខ្ញុំជឿថា នីម៉ានិងដានីឡូនឹងលេងវើលខាប់”។
“នោះជាគំនិតរបស់ខ្ញុំ។ ខាងផ្នែកវេជ្ជសាស្ត្រនិងគ្លីនិក ខ្ញុំមិនស្ថិតក្នុងជំហរត្រូវនិយាយអំពីរឿងទាំងនោះទេ។ ប៉ុន្តែខ្ញុំក៏មានរបាយការណ៍វេជ្ជសាស្ត្រនៅខាងខ្ញុំដែរ”។
“ខ្ញុំអាចបន្តនិយាយបានថា មិនត្រឹមតែនីម៉ាប៉ុណ្ណោះទេ ថែមទាំងដានីឡូទៀតផង ដែលពីដំបូងហាក់ស្ថិតក្នុងស្ថានភាពស្រួលបួលទេ។ ស្ថានភាពរបស់ពួកគេទាំងពីរឥឡូវមានការវិវត្ត។ ប៉ុន្តែសម្រាប់ពួកគេទាំងពីរ យើងជឿថាពួកគេនឹងអាចលេងវើលខាប់នៅប្រកួតខាងមុខ”៕
នីម៉ារបួសកជើងស្តាំ តែគ្រូបង្វឹកជឿថារូបគេនឹងអាចលេងនៅប្រកួតបន្តបន្ទាប់បាន
