Views: 7
ប្រែសម្រួល : កញ្ញាដាលីស (ស្ត្រេតថែមស៍) ៖ តារាសម្ដែងកូរ៉េខាងត្បូង នាង ស៊ុន យ៉េជីន (Son Ye-jin) និង លោក យុន ប៊ីន (Hyun Bin) ដែលបានរៀបការជាមួយគ្នាកាលពីខែមីនា បានស្វាគមន៍កូនដំបូងរបស់ពួកគេ ដែលជាកូនប្រុសកាលពីថ្ងៃអាទិត្យទី២៧វិច្ឆិកា។
ទីភ្នាក់ងារគ្រប់គ្រងរបស់តារាទាំងពីរបានបញ្ជាក់ពីដំណឹងដ៏រីករាយនេះ ដោយទីភ្នាក់ងាររបស់នាងស៊ុន គឺផលិតកម្ម MSteam Entertainment បាននិយាយនៅក្នុងសេចក្តីថ្លែងការណ៍មួយថា ទាំងម្តាយនិងកូនមានសុខភាពល្អ។
ទារកគ្រោងកើតនៅខែធ្នូ ប៉ុន្តែបានកើតមុនពេលកំណត់បន្តិច។
សារព័ត៌មានកូរ៉េខាងត្បូង JTBCបានរាយការណ៍ថា នាងស៊ុនអាយុ ៤០ ឆ្នាំកំពុងសម្រាកនៅមជ្ឈមណ្ឌលថែទាំក្រោយសម្រាលនៅសង្កាត់យ៉ូកសាម (Yeoksam) ក្នុងទីក្រុងសេអ៊ូល។
លោក យុន ប៊ីន អាយុ ៤០ ឆ្នាំ នឹងចំណាយពេលប្រហែលមួយខែជាមួយកូនប្រុសថ្មីថ្មោងរបស់គាត់ មុនពេលគាត់ចេញទៅក្រៅប្រទេសក្នុងខែមករា ដើម្បីថតខ្សែភាពយន្តថ្មីរយៈពេលមួយខែកន្លះ។
តារា K-drama ដែលលង់ស្នេហ៍នឹងគ្នាមែនទែនក្នុងពេលកំពុងថតរឿងភាគដ៏ល្បី Crash Landing On You (២០១៩ ដល់ ២០២០) បានប្រកាសទំនាក់ទំនងរបស់ពួកគេជាសាធារណៈក្នុងខែមករា ឆ្នាំ ២០២១។
ពួកគេបានប្រារព្ធពិធីមង្គលការដ៏ស្និទ្ធស្នាលកាលពីខែមីនា ដោយមានតារាកូរ៉េខាងត្បូងជាច្រើនចូលរួម ហើយបានប្រកាសពីការមានផ្ទៃពោះនៅបីខែក្រោយមក៕
នាង ស៊ុន យ៉េជីន និង លោក យុន ប៊ីន រៀបការនឹងគ្នាកាលពីខែមីនា ឆ្នាំ២០២២