រាជធានីភ្នំពេញ ៖ ថ្លែងក្នុងសន្នីសីទសារព័ត៌មានឯកឧត្តម គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកនៃអគ្គនាយកដ្ឋានគយ និងរដ្ឋាករកម្ពុជាបានឱ្យដឹងថា គិតមកទល់មកពេលនេះ អគ្គនាយកដ្ឋានគយ និងរដ្ឋាករកម្ពុជាប្រមូលពន្ធពីរថយន្តគ្មានពន្ធជ្រកក្រោមផ្លាកលេខផ្សេងៗទាំងចង្កូតឆ្វេង និងចង្កូតស្តាំបានជាង១០៦លានដុល្លារពីរថយន្តជិត២ម៉ឺនគ្រឿង។
ឯកឧត្តម គុណ ញឹម ធ្វើឡើងនៅក្នុងកម្មវិធីសន្និសីទសារព័ត៌មាន បង្ហាញលទ្ធផល«បិទបញ្ចប់ការងារប្រមូលពន្ធអាករលើរថយន្តគ្មានពន្ធ មានស្រាប់ក្នុងប្រទេស» នារសៀលថ្ងៃទី១២ ខែមករា ឆ្នាំ២០២៣ នៅអគ្គនាយកដ្ឋានគយបានលើកឡើងថា ក្នុងយុទ្ធនាការប្រមូលពន្ធពីរថយន្តគ្មានពន្ធដែលជ្រកក្រោមផ្លាកលេខផ្សេងៗត្រូវបានបែងចែកជាពីរដំណាក់កាលដោយមានរថយន្តទាំងចង្កូតស្តាំ និងឆ្វេង ចំនួន ២០០៤៩គ្រឿងបានមកបង់ពន្ធកក់ប្រាក់ និងចុះបញ្ជីតែក្នុងនោះមានតែរថយន្តចំនួន១៨ ៤១៤គ្រឿងទេដែលបានបង់ពន្ធតាមនិតិវិធីច្បាប់ ដោយទទួលបានប្រាក់ពន្ធអាករចំនួន១០៦លានដុល្លារ និងនៅសល់ជិត២ពាន់គ្រឿងទៀត ដែលមិនបានមកបង់ពន្ធតាមនិតិវិធី។
ឯកឧត្តមគុណ ញឹម ក្នុងយុទ្ធនាការដំណាក់កាលទី១មានរថយន្តសរុបចំនួន៩៧៥៣គ្រឿងបានមកបំពេញកាតព្វកិច្ចពន្ធ និងកក់ប្រាក់ ដោយទទួលបានចំណូលប្រមាណជាង៧៦លានដុល្លារ។ ក្នុងនោះរថយន្តចង្កូតឆ្វេងចំនួន២៧១៣គ្រឿង និងរថយន្តចង្កូតស្តាំដែលមកកក់ប្រាក់មានចំនួន៧០៤០គ្រឿង (តែរថយន្តដែលកក់ប្រាក់ ហើយបង្វែរប្រាក់កក់ទៅជាប្រាក់ពន្ធមានចំនួន៧០២៧ និងនៅសល់ចំនួន១៣គ្រឿងទៀត មិនបានមកបញ្ចប់និតិបង្វែរប្រាក់កក់ទៅជាប្រាក់បង់ពន្ធ) ។
ចំណែកក្នុងយុទ្ធការដំណាក់កាលទី២ ដែលចាប់ផ្តើមពីថ្ងៃ៧ ដល់ថ្ងៃទី៣១ខែកក្កដា និងបានពន្យារហូតដល់៣១ធ្នូ ឆ្នាំ២០២២ គយប្រមូលពន្ធជាង៣០លានដុល្លារពីរថយន្តចង្កូតស្តាំ និងចង្កូតឆ្វេង។
ឯកឧត្តមក៏បានឱ្យដឹងថា ក្នុងដំណាក់កាលទី២នេះ គឺជាដំណាក់ផ្តោតទៅលើការប្រមូលរថយន្តចង្កូតស្តាំដែលមិនកែចង្កូតក្នុងនោះមានរថយន្តចំនួនជាង៩៨៥៥គ្រឿងបានមកចុះបញ្ជី។គិតមកដល់ថ្ងៃឱសានវាទ គឺថ្ងៃទី៣១ ខែធ្នូ ឆ្នាំ២០២២ មានរថយន្តចំនួន ៧៩១០គ្រឿង ដែលម្ចាស់បានមកបំពេញកាតព្វកិច្ចពន្ធ ដោយប្រមូលបានថវិកាជាង២៦ លានដុល្លារ ដូច្នេះនៅសល់១៩៤៥គ្រឿងទៀត មិនបានមកបំពេញកាតព្វកិច្ចពន្ធទេ។
ទន្ទឹមគ្នានេះ នៅក្នុងដំណាក់កាលទី២នេះគយក៏បានប្រមូលពន្ធពីរថយន្តចង្វេតផងដែរដោយសារម្ចាស់បានខកខានក្នុងការមកបំពេញកាតព្វពន្ធ កាលពីដំណាក់កាលទី១ដែលមានចំនួន៤៤១គ្រឿង និងទទួលបានថវិកាប្រមាណជិត៤លានដុល្លារ។
ឯកឧត្តមក៏បានឱ្យដឹងថា ចំពោះរថយន្តដែលនៅសល់មិនបានមកបំពេញកាតព្វកិច្ចពន្ធទាំងជិត២ពាន់គ្រឿងនេះត្រូវបានប៉ាន់ប្រមាណថា រថយន្តមួយគ្រឿងជាប់កាតព្វកិច្ចពន្ធជាង៣ពាន់ដុល្លារដូច្នេះសុរបទាំងអស់ស្មើនឹងជាង៦លានដុល្លារ។
ជាមួយគ្នានោះដែរ ឯកឧត្តមបានឲ្យដឹងថា រថយន្តដែលនៅសល់មិនមកបំពេញកាតព្វកិច្ចអាចមកពីម្ចាស់រថយន្តនៅមានភាពស្ទាក់ស្ទើរក្នុងការសម្រេចចិត្តមកបង់ដោយសារជាប្រភេទរថយន្តស៊េរីចាស់ៗហើយរថយន្តខ្លះត្រូវបានបុកបណ្តាលឱ្យខូចហើយរថយន្តខ្លះទៀតបានដោះជាគ្រឿងបន្លាស់ និងមួយចំនួនត្រូវបានលក់បន្តទៅឱ្យអ្នកផ្សេងបន្តជាដើម។
ឯកឧត្តមអគ្គនាយករដ្ឋានគយបានគូសបញ្ជាក់ថា ៖«យើងបានចាត់ចែងកម្លាំងផ្សព្វផ្សាយផងចុះទៅដល់ទីតាំងការដ្ឋានការងារផង និងបានទាក់ទងតាមទូរស័ព្ទទៅម្ចាស់ផង ប៉ុន្តែមានមូលហេតុផ្សេងៗគ្នាដែលធ្វើឱ្យម្ចាស់ខកខានមិនបានចូលខ្លួនមកបំពេញកាតព្វកិច្ចពន្ធ និងអាករ។
ជារួមនៅក្នុងដំណាក់កាលទី២នេះយើងប្រឹងប្រែងប្រមូល និងចំណាយកម្លាំងយ៉ាងច្រើនពេលវេលាក៏ច្រើននៅក្នុងដំណាក់កាលទី២នេះពីព្រោះសុទ្ធសឹងតែជាប្រភេទរថយន្តដឹកដី ដឹកថ្មី ដឹកខ្សាច់ អ៊ីចឹងហើយត្រូវការកម្លាំងចុះទៅដល់ការដ្ឋានចុះទៅដល់ស្រុក ឃុំ និងខ្នងផ្ទះជាដើម»។
ក្នុងសន្និសីទកាសែតនោះដែរ ឯកឧត្តម គុណ ញឹម បានវា.យតម្លៃយុទ្ធនាការប្រមូលពន្ធពីរថយន្តដែលគ្មានពន្ធទាំងពីរដំណាក់កាលនេះ ជាជោគជ័យមួយរបស់អគ្គនាយកដ្ឋានគយ និងរដ្ឋាករកម្ពុជាដែលបានប្រមូលចំណូលចូលរដ្ឋ ពោល គឺយុទ្ធនាការនេះចំណេញទាំងអស់គ្នា ដោយរដ្ឋទទួលបានចំណូល ចំណែកអ្នកកាន់កាប់រថយន្តខុសច្បាប់ ទទួលបាននូវការប្រើប្រាស់រថយន្តដែលស្របច្បាប់វិញ៕
