Views: 2
ប្រែសម្រួលៈបំណង(បាងកកប៉ុស្តិ៍)៖ ហុងកុងនឹងចែកសំបុត្រយន្តហោះដល់ទៅ៥០០.០០០សន្លឹកដោយឥតគិតថ្លៃចាប់ពីខែមីនាតទៅក្នុងកិច្ចខិតខំមួយដើម្បីទាញ់ទាញភ្ញៀវទេសចរមកកាន់ដែនដីចិនដែលធ្លាប់តែជាទីតាំងទាក់ទាញទេសចរណ៍មួយនៅមុនពេលផ្ទុះកូវីដ១៩ មួយនេះឡើងវិញ។
ទីក្រុងនេះបានបន្ធូរបន្ថយការរឹតបន្តឹងលើការធ្វើដំណើរនៅប៉ុន្មានខែចុងក្រោយនេះ រួមមានលុបចោលការធ្វើចត្តាឡីស័កដោយកាតព្វកិច្ចនៅពេលអ្នកដំណើរមូលមកដល់។
ឥឡូវ អាជ្ញាធរក្រុងសង្ឃឹមថា ចំណាត់ការរបស់ខ្លួននឹងរុញវិស័យទេសចរណ៍របស់ខ្លួនអោយមានជីវិតឡើងវិញ។ផ្នែកមួយនៃវិធានការរបស់ក្រុងហុងកុងរួមមានការចែកសំបុត្រយន្តហោះ៥០០.០០០សន្លឹកដែលមានតំលៃជាង២៥០លានអឺរ៉ូ(២៧២លានដុល្លារ)។
កាលពីថ្ងៃពុធទី២កុម្ភៈ នាយកប្រតិបត្តិហុងកុងលោក ចន លី បានចាប់ផ្តើមយុទ្ធនាការ«Hello Hong Kong»ដែលមានតំលៃ២ពាន់លានដុល្លារមួយដើម្បីទាក់ទាញទេសចរណ៍ រួមមានការចែកសំបុត្រយន្តហោះដោយឥតគិតថ្លៃ។
ការធ្វើដំណើររវាងហុងកុងនិងចិនដីគោកក៏នឹងលែងទាមទារការធ្វើតេស្តិ៍រកកូវីដ១៩ទៀតហើយ នេះបើតាមការប្រកាសរបស់អាជ្ញាធរហុងកុងកាលពីថ្ងៃសុក្រ នៅពេលទឹកដីទាំងពីរកំពុងព្យាយាមជំរុញកំណើនសេដ្ឋកិច្ច។
សូមបញ្ជាក់ថា ឧស្សាហកម្មទេសចរណ៍ហុងកុងបានទទួលរងគ្រោះខ្លាំងចាប់តាំងពីឆ្នាំ២០១៩ ក្រោយចលាចលនយោបាយអស់ពេលរាប់ខែដែលពេលខ្លះបានក្លាយជាការប្រឈមុខដោយហិង្សារវាងអ្នកប្រឆាំងតវ៉ានិងកងកម្លាំងប៉ូលីស ហើយបន្ទាប់មករងផលពីការបិទខ្ទប់ដោយសារការផ្ទុះជំងឺកូវីដ១៩។
នាយកប្រតិបត្តិហុងកុងលោកចន លី (John Lee)បាននិយាយក្នុងសន្និសីទកាសែតមួយកាលពីថ្ងៃសុក្រថា« ចាប់ពីថ្ងៃចន្ទ នឹងមានការធ្វើដំណើរពេញលេញរវាងហុងកុងនិងមហាចិនដីគោក»។
តាមពិតចិនបានបន្ធូរបន្ថយការរឹតត្បិតការធ្វើដំណើរជាមួយពិភពលោក រួមទាំងហុងកុងកាលពីថ្ងៃ៨មករា ដោយលុបចោលចត្តាឡីស័កសំរាប់អ្នកដំណើរមកដល់ចិន តែចំនួនអ្នកដំណើរទៅពីហុងកុងនៅកំហិតត្រឹម៥០.០០០ក្នុងមួយថ្ងៃ។ទោះជាយ៉ាងណាលោកលីបាននិយាយនៅថ្ងៃនេះថា «កូតាសំរាប់អ្នកដំណើរនឹងត្រូវលុបចោល ហើយច្រកព្រំដែនទាំងអស់នឹងបើកឡើងវិញនៅសប្តាហ៍ក្រោយ»៕
អ្នកដំណើរពាក់ម៉ាស់អូសវ៉ាលីសរបស់គេតម្រង់ទៅកាន់បញ្ជអន្តោប្រវេសន៍នៅច្រកមួយរវាងហុងកុងនិងចិន កាលពីថ្ងៃ៨មករា
