Views: 10
ប្រែសម្រួលៈបំណង(ដេល្លីម៉េល)៖ ជនប៉ាឡេស្ទីនពីរនាក់ រួមមានមេបញ្ជាការសកម្មប្រយុទ្ធជាន់ខ្ពស់ម្នាក់ ត្រូវបានសម្លាប់កាលពីថ្ងៃអង្គារ នៅពេលកងកម្លាំងអ៊ីស្រាអែលសំរុកវាយចូលផ្ទុះមួយនៅក្នុងទីក្រុងណាប្លូស(Nablus)ក្នុងតំបន់វេសប៊ែង(West Bank)ដែលខ្លួនកាន់កាប់។
អំពើហិង្សាចុងក្រោយនេះកើតឡើងតែពីរថ្ងៃគត់ក្រោយអ៊ីស្រាអែលនិងពួកសកម្មប្រយុទ្ធក្នុងក្រុមអ៊ីស្លាមជីហាដ(IJ) បានប្រកាសកិច្ចព្រមព្រៀងផ្អាកការប្រយុទ្ធគ្នានៅក្នុងបរិពន្ធភូមិហ្កាហ្សា។
នៅក្នុងទីក្រុងណាប្លូស អ្នកយកព័ត៌មានបារាំងបានរាយការណ៍អំពីការបាញ់គ្នារវាងជនប៉ាឡរស្ទីនជាមួយកងកម្លាំងអ៊ីស្រាអែល។យ៉ាងហោចណាស់ពួកប៉ាឡេស្ទីន៤០នាក់រងរបួស ដោយបួននាក់រងរបួសធ្ងន់។
យុវជនប៉ាឡេស្ទីនប៉ះទង្គិចជាមួយកងកម្លាំងអ៊ីស្រាអែលនៅវេសប៊ែងកាលពីថ្ងៃអង្គារ
យោធាអ៊ីស្រាអែលក្នុងពេលជាមួយគ្នាបានប្រកាសថា «ភេរវករ អ៊ីប្រាហ៊ីម អាល់-ណាប៊ុលស៊ី(Ibrahim al-Nabulsi )ត្រូវបានសម្លាប់នៅក្នុងទីក្រុងណាប្លូស។ភេរវករម្នាក់ទៀតក៏ត្រូវបានសម្លាប់នៅក្នុងផ្ទះតែមួយ»។
ណាប៊ុលស៊ី ជាមេបញ្ជាការក្រុមអាល់-អាក់សា ម៉ាធៀ(Al-Aqsa Martyrs) ជាក្រុមសកម្មប្រយុទ្ធមួយដែលធ្វើសកម្មភាពនៅក្នុងតំបន់វេសប៊ែង ក្រោមគណបក្សហ្វាតា(Fatah)។
ការប៉ះទង្គិចជាមួយកងកម្លាំងអ៊ីស្រាអែលក៏កើតមាននៅផ្នែកផ្សេងៗនៃទីក្រុងណាប្លូស ដោយជនប៉ាឡេស្ទីនចោលដុំថ្មដាក់ទាហានអ៊ីស្រាអែល។យោធាអ៊ីស្រាអែលបាននិយាយថា «ការប៉ះទង្គិចហិង្សាបានកើតឡើងនៅពេលកុបករជាច្រើនចាប់ផ្តើមគប់ដុំថ្មនិងគ្រឿងផ្ទុះដាក់កងកម្លាំង ដែលបានបាញ់បំបែកហ្វូងអ្នកតវ៉ា។មនុស្សជាច្រើនបានរងរបួស»។
សូមបញ្ជាក់ថា កងកម្លាំងសន្តិសុខអ៊ីស្រាអែលបានធ្វើប្រតិបត្តិការស្ទើររាល់ថ្ងៃនៅតំបន់វេសប៊ែងនៅប៉ុន្មានខែចុងក្រោយនេះដោយផ្តោតលើពួកសកម្មប្រយុទ្ធទៅពីក្រុមIJ។ជនប៉ាឡេស្ទីនយ៉ាងតិច៥៧នាក់ត្រូវបានសម្លាប់ចាប់តាំងពីចុងខែមីនា ភាគច្រើននៅវេសប៊ែង។
ការវាយប្រហារលើគោលដៅអ៊ីស្រាអែលក្នុងពេលជាមួយគ្នាបានសម្លាប់មនុស្ស១៩នាក់ ភាគច្រើនជាជនស៊ីវិល។
កាលពីថ្ងៃសុក្រសប្តាហ៍មុន អ៊ីស្រាអែលបានចាប់ផ្តើមការវាយប្រហារតាមអាកាសដើម្បីជាការបង្ការទុកជាមុននៅហ្កាហ្សាស្ទ្រីប លើទីតាំងពួកIJ ជាហេតុនាំអោយពួកសកម្មប្រយុទ្ធបាញ់រ៉ុក្កែតជាង១ពាន់គ្រាប់ជាការតតបវិញ។ការប្រយុទ្ធគ្នានោះ ត្រូវបានផ្អាកកាលពីថ្ងៃអាទិត្យក្រោមកិច្ចព្រមព្រៀងមួយសម្របសម្រួលដោយអេហ្សីប។ការប្រយុទ្ធគ្នាបីថ្ងៃនេះនាំអោយជនប៉ាឡេស្ទីនស្លាប់៤៦នាក់និងរបួស៣៦០នាក់៕
ជនប៉ាឡេស្ទីននាំគ្នាសែងយុទ្ធជនសកម្មប្រយុទ្ធដែលត្រូវបាញ់អោយរងរបួសដោយកងកម្លាំងអ៊ីស្រាអែល
