Views: 8
ប្រែសម្រួល : កញ្ញាដាលីស (ដេល្លីម៉េល) ៖ បណ្តាទីភ្នាក់ងារសារព័ត៌មានរុស្ស៊ីបានដកស្រង់សម្តីមេធាវីរបស់លោកអេដវ៉ាដ ស្នូវដិន (Edward Snowden)កាលពីថ្ងៃសុក្រទី២ធ្នូថាអតីតអ្នកម៉ៅការផ្នែកចារកម្មសម្ងាត់អាម៉េរិកស្នូវដិន ដែលបានរត់ចេញពីការកាត់ទោសបន្ទាប់ពីបានលាតត្រដាងកម្មវិធីឃ្លាំមើលសម្ងាត់បំផុតនៅទូទាំងពិភពលោករបស់អាម៉េរិកនោះ បានទទួលលិខិតឆ្លងដែនរុស្ស៊ី និង បានស្បថចូលសញ្ជាតិ។
មេធាវី អាណាតូលី គូឆេរីណា (Anatoly Kucherena) ត្រូវបានរាយការណ៍ដោយនិយាយថា លោកស្នូវដិនបានទទួលលិខិតឆ្លងដែនហើយបានស្បថកាលពីថ្ងៃព្រហស្បតិ៍ពោលប្រហែលបីខែបន្ទាប់ពីប្រធានាធិបតីរុស្ស៊ីលោក វ្ល៉ាឌីមៀ ពូទីន បានផ្តល់សញ្ជាតិដល់គាត់។
របាយការណ៍មិនបានបញ្ជាក់ថាតើស្នូវដិនបានបោះបង់សញ្ជាតិអាម៉េរិករបស់គាត់ឬអត់នោះទេ។ សហរដ្ឋអាម៉េរិកបានដកហូតលិខិតឆ្លងដែនរបស់គាត់ក្នុងឆ្នាំ ២០១៣ដែលនាំឱ្យស្នូវដិនត្រូវជាប់គាំងនៅក្នុងអាកាសយានដ្ឋានទីក្រុងមូស្គូអស់រយៈពេលជាច្រើនសប្តាហ៍ បន្ទាប់ពីបានមកដល់ពីទីក្រុងហុងកុងក្នុងគោលបំណងឆ្ពោះទៅប្រទេសអេក្វាឌ័រ។
នៅទីបំផុតរុស្ស៊ីបានផ្តល់សិទ្ធិស្នាក់នៅអចិន្ត្រៃយ៍ដល់គាត់។ គាត់បានរៀបការជាមួយស្ត្រីអាម៉េរិកឈ្មោះ លីនសេ មីល (Lindsay Mills)ក្នុងឆ្នាំ ២០១៧ ហើយប្តីប្រពន្ធនេះមានកូនពីរនាក់។
នៅទីក្រុងវ៉ាស៊ីនតោន អ្នកនាំពាក្យក្រសួងការបរទេសលោក ណេត ប្រាយ (Ned Price) បាននិយាយកាលពីថ្ងៃសុក្រថាសហរដ្ឋអាម៉េរិកបានដឹងពីរបាយការណ៍ដែលលោកស្នូវដិនបានស្បថចូលសញ្ជាតិរុស្ស៊ីហើយ ប៉ុន្តែមិនអាចបញ្ជាក់បានឡើយ ហើយបានរុញសំណួរអំពីស្ថានភាពរបស់គាត់ទៅរដ្ឋាភិបាលរុស្ស៊ី។ ទោះយ៉ាងណា លោកប្រាយបាននិយាយថា រដ្ឋបាលបៃដិននឹងមិនភ្ញាក់ផ្អើលទេ ប្រសិនបើរបាយការណ៍នេះត្រឹមត្រូវ។
លោកប្រាយបានប្រាប់អ្នកយកព័ត៌មានថា “លោកស្នូវដិនបានបង្ហាញពីភក្តីភាពរបស់គាត់ចំពោះរុស្ស៊ីជាយូរមកហើយ ហើយជំហាននេះនឹងនៅចាំតែធ្វើឱ្យក្លាយជាផ្លូវការប៉ុណ្ណោះ”៕
លោកស្នូវដិននិយាយទៅកាន់ទស្សនិកជនតាមអនឡាញនៅសន្និសីទកំពូលស្តីពីបច្ចេកវិជ្ជាវេបសាយនៅទីក្រុងលីសប៊ន ថ្ងៃទី៤វិច្ឆិកា ឆ្នាំ២០១៩