Views: 9
ប្រែសម្រួល : កញ្ញាដាលីស (ដេល្លីម៉េល) ៖ មន្ត្រីម្នាក់បានប្រាប់ទីភ្នាក់ងារសារព័ត៌មាន AFPថាប៉ូលិសជប៉ុនកាលពីថ្ងៃសុក្រទី២៦ឧសភាបានឃុំខ្លួនជនសង្ស័យម្នាក់ដែលពួននៅក្នុងអគារមួយបន្ទាប់ពីសម្លាប់មនុស្សបួននាក់ រួមទាំងមន្ត្រីប៉ូលិសពីរនាក់នៅក្នុងការវាយប្រហារដោយកាំភ្លើងនិងកាំបិត។
បុរសនេះត្រូវបាននាំទៅឃុំឃាំងនៅខាងក្រៅផ្ទះកសិដ្ឋានមួយក្បែរទីក្រុងណាកាណូ (Nakano) ក្នុងតំបន់ណាហ្គាណូ (Nagano) ដោយប៉ូលិសបានបញ្ជាក់ពីអ្នកស្លាប់ទីបួនកាលពីយប់មិញពោលជាស្ត្រីចំណាស់ម្នាក់ដែលគេប្រទះឃើញរងរបួសនៅកន្លែងកើតហេតុ ហើយក្រោយមកត្រូវបានប្រកាសស្លាប់។
អ្នកនាំពាក្យប៉ូលិសបានប្រាប់ AFPថា ជនសង្ស័យត្រូវបានឃាត់ខ្លួននៅម៉ោងប្រហែល ៤៖៣០ នាទីព្រឹកថ្ងៃសុក្រនេះ។
វាជាករណីដ៏កម្រនៃឧក្រិដ្ឋកម្មហិង្សានៅក្នុងប្រទេសជប៉ុន ដែលមានអត្រាឃាតកម្មទាបនិងច្បាប់កាំភ្លើងដ៏តឹងរ៉ឹងបំផុតមួយចំនួនលើពិភពលោក។
ទីភ្នាក់ងារសារព័ត៌មានក្យូដូបាននិយាយថា ជនសង្ស័យបានលាក់ខ្លួនជាច្រើនម៉ោងនៅក្នុងផ្ទះ ដែលជាកម្មសិទ្ធិរបស់ឪពុកគាត់ ដែលជាប្រធានសភាក្រុងណាកាណូ។
រូបគេបានចាក់ជនរងគ្រោះដោយកាំបិតធំ មុនពេលប្រើកាំភ្លើងបរបាញ់ទៅលើប៉ូលិសពីរនាក់ ដែលឆ្លើយតបនឹងការហៅទូរស័ព្ទបន្ទាន់។
អាជ្ញាធរបានជំរុញប្រជាជនឱ្យស្នាក់នៅក្នុងផ្ទះក្នុងតំបន់ពាក់កណ្តាលជនបទភាគកណ្តាលប្រទេសជប៉ុន បន្ទាប់ពីការសម្លាប់នេះបានចាប់ផ្តើមកាលពីរសៀលថ្ងៃព្រហស្បតិ៍។
មន្ត្រី ដែលត្រូវគេសម្លាប់ ត្រូវបានកំណត់អត្តសញ្ញាណថាមានឈ្មោះថា យ៉ូស៊ីគី តាម៉ៃ (Yoshiki Tamai)អាយុ ៤៦ ឆ្នាំ និង តាគូអូ អ៊ីកេអ៊ូឈី (Takuo Ikeuchi) អាយុ ៦១ ឆ្នាំ។
ស្ត្រីពីរនាក់ រួមទាំងម្តាយរបស់ជនសង្ស័យ បានរត់គេចខ្លួនចេញពីផ្ទះ កន្លែងដែលជនសង្ស័យលាក់ខ្លួន ដោយម្នាក់គេចខ្លួននៅម៉ោងប្រហែល ៨៖៣៥ នាទីយប់ និងម្នាក់ទៀតនៅពាក់កណ្តាលអធ្រាត្រ៕
ស្ត្រីពីរនាក់និងប៉ូលិសពីរនាក់ត្រូវបានសម្លាប់នៅភាគកណ្តាលប្រទេសជប៉ុន
