Views: 3
ដោយ៖ សុវណ្ណកុម្ភៈ / ភ្នំពេញ៖ ការប្រកួតកីឡាខ្សោយបញ្ញា នៅខេត្តបាត់ដំបង បានបញ្ចប់ហើយលោក សែម សុខា អនុប្រធាន ក្នុងនាមគណ:កម្មាធិការជាតិ ស្ប៉េស្យាល់អូឡាំពិកកម្ពុជា បានអញ្ជើញចូលរួម ក្នុងពិធីប្រគល់ពានដល់ជ័យលាភី។
សម្រាប់ការប្រកួតកីឡាជនបញ្ញាខ្សោយ ដែលមាន ៣ វិញ្ញាសា គឺ វិញ្ញាសាអត្តពលកម្ម ប៊ូល និងបាល់ទាត់ មានគ្រូបង្វឹក គណៈកម្មការបច្ចេកទេស អាណាព្យាបាល និងកីឡាករ កីឡាការិនី សុរបប្រមាណ ១៥០ នាក់ មកពីខេត្តបន្ទាយមានជ័យ និងស្រុកជុំវិញ ខេត្តបាត់ដំបង ។ កីឡាករសរុប មានចំនួន ៤៩នាក់ ស្រី១៣នាក់ ក្នុងនោះកីឡា បាល់ទាត់មាន ៣ ក្រុម ២៤នាក់ រួមមាន បាត់ដំបងអក្សរ A បាត់ដំបងអក្សរ B និងខេត្តបន្ទាយមានជ័យ ចំពោះកីឡាអត្តពលកម្ម មាន ៥ នាក់ និងកីឡា-ប៊ូលឈើ ២០ នាក់ ។
លទ្ធផលសម្រាប់ប្រភេទកីឡាអត្តពលកម្ម៖ ចំណាត់ថ្នាក់លេខ១ បានទៅលើខេត្តបាត់ដំបង ចំណាត់ថ្នាក់លេខ២ បានទៅលើខេត្តបន្ទាយមានជ័យ និងចំណាត់ថ្នាក់លេខ៣ បានទៅលើខេត្តបាត់ដំបង ។ កីឡាប៊ូលឈើ៖ ចំណាត់ថ្នាក់លេខ១ បានទៅលើ ខេត្តបន្ទាយមានជ័យ និងចំណាត់ថ្នាក់ លេខ២ បានទៅលើខេត្តបាត់ដំបង។ រីឯកីឡាបាល់ទាត់៖ ចំណាត់ថ្នាក់លេខ១ បានទៅលើខេត្តបាត់ដំបង A ចំណាត់ថ្នាក់លេខ២ បានទៅលើបាត់ដំបង B និងចំណាត់ថ្នាក់លេខ៣ បានទៅលើ ខេត្តបន្ទាយមានជ័យ ។
លោក សែម សុខា បានវាយតម្លៃខ្ពស់ ចំពោះកិច្ចខិតខំប្រឹងប្រែង អាណាព្យាបាលទាំងអស់ ដែលបានលះបង់ពេលវេលា មកចូលរួម ដើម្បីលើកស្ទួយ និងរួមចំណែកជួយលើ វិស័យពិការភាព ជាពិសេសវិស័យកីឡា ស្ប៉េស្យាល់ អូឡាំពិកកម្ពុជា ជានិច្ចកាល គណៈកម្មាធិការជាតិ ស្បេស្បាល់អឡាំពិកកម្ពុជា តែងតែយកចិត្តទុកដាក់ ពង្រឹងពង្រីក ចលនាស្ប៉េស្យាល់អូឡាំពិក ដល់បណ្តាខេត្តនានា ព្រមទាំងបានបណ្តុះបណ្តាល មន្ត្រីជំនាញ ធ្វើការហ្វឹកហាត់ ដល់ជនពិការ ខ្សោយសតិបញ្ញា ក្នុងគោលបំណង ផ្ដល់ឱកាសឲ្យពួកគាត់ បានចូលរួម ក្នុងសកម្មភាពសង្គម៕/V
