Views: 1
ប្រែសម្រួល : កញ្ញាដាលីស,បំណង (ដេល្លីម៉េល) ៖ ឥស្សរជនជប៉ុននិងបរទេសបានចូលរួមគោរពវិញ្ញាណក្ខន្ធអតីតនាយករដ្ឋមន្ត្រី ស៊ីនហ្សូ អាបេ ដែលត្រូវគេសម្លាប់នៅក្នុងពិធីបុណ្យសពថ្នាក់រដ្ឋដ៏ចម្រូងចម្រាសមួយកាលពីថ្ងៃអង្គារទី២៧កញ្ញា ខណៈមនុស្សជាច្រើនបានប្រមូលផ្តុំគ្នាដើម្បីដាក់ផ្កានិងបួងសួង។
ធាតុរបស់លោកអាបេ ដែលកាន់ដោយស្ត្រីមេម៉ាយរបស់គាត់គឺលោកស្រីអាគី (Akie)បានមកដល់សាលប៊ូដូកាន (Budokan) ក្នុងទីក្រុងតូក្យូ កន្លែងដែលកាំភ្លើង ១៩ដើមត្រូវបានបាញ់បន្លឺឡើងជាកិត្តិយសដល់អតីតមេដឹកនាំដែលគេសម្លាប់នេះ។
នៅក្នុងវិយោគកថា នាយករដ្ឋមន្ត្រី ហ្វ៊ុយមីអូ គីស៊ីដា បានពណ៌នាអ្នកនយោបាយរូបនេះថាជា “មនុស្សក្លាហាន” ដោយរាយបញ្ជីស្នាដៃរបស់គាត់ជាច្រើនរួមមានទាំងកិច្ចខិតខំប្រឹងប្រែងដើម្បីពង្រឹងទំនាក់ទំនងការទូតរបស់ជប៉ុន។
លោកគីស៊ីដាបាននិយាយខណៈគាត់បែរមុខទៅរករូបថតរបស់លោកអាបេ ដែលព្យួរនៅពីលើរចនាសម្ពនផ្កាដ៏ធំដែលប្រើសម្រាប់បង្ហាញធាតុ មេដាយ និងទង់ជាតិជប៉ុនរបស់គាត់ យ៉ាងដូច្នេះថា”ខ្ញុំមានអារម្មណ៍សោកសៅជាពន់ពេក”។
លោកអាបេគឺជានាយករដ្ឋមន្ត្រីដែលកាន់តំណែងយូរបំផុតរបស់ជប៉ុននិងជាឥស្សរជននយោបាយដ៏ល្បីបំផុតរបស់ប្រទេស ដែលល្បីល្បាញខាងការបណ្តុះសម្ពន្ធភាពអន្តរជាតិ និងយុទ្ធសាស្ត្រសេដ្ឋកិច្ច “Abenomics” របស់គាត់។
គាត់បានលាលែងពីតំណែងនៅឆ្នាំ ២០២០ ដោយសារបញ្ហាសុខភាពចាស់របស់គាត់ ប៉ុន្តែនៅតែជាសំឡេងនយោបាយដ៏សំខាន់ និងបានកំពុងធ្វើយុទ្ធនាការសម្រាប់គណបក្សកាន់អំណាចនៅពេលដែលខ្មាន់កាំភ្លើងតែម្នាក់ឯងបានសម្លាប់គាត់ដោយអាវុធកែច្នៃកាលពីថ្ងៃទី ៨ ខែកក្កដា។
ការបាញ់ប្រហារនេះបានធ្វើឱ្យមានការភ្ញាក់ផ្អើលពេញប្រទេសមួយដែលមានឧក្រិដ្ឋកម្មកាំភ្លើងទាបបំផុត និងបានជំរុញឱ្យមានការថ្កោលទោសជាអន្តរជាតិ។
ប៉ុន្តែការសម្រេចចិត្តផ្តល់ឱ្យគាត់នូវពិធីបុណ្យសពថ្នាក់រដ្ឋ ដែលជាបុណ្យសពថ្នាក់រដ្ឋលើកទីពីរសម្រាប់អតីតនាយករដ្ឋមន្ត្រីក្នុងសម័យក្រោយសង្គ្រាមលោកលើកទីពីរ បានធ្វើឱ្យមានការប្រឆាំងដោយជនជាតិជប៉ុន៦០ភាគរយប្រឆាំងនឹងព្រឹត្តិការណ៍នេះនៅក្នុងការស្ទង់មតិនាពេលថ្មីៗនេះ។
បុណ្យសពរបស់អាបេកាលពីថ្ងៃអង្គារ មានការចូលរួមពីភ្ញៀវប្រមាណ៤.៣០០នាក់ ក្នុងនេះ៧០០នាក់ទៅពីបរទេស
ពិធីលាគ្នាចុងក្រោយបានចាប់ផ្តើមនៅម៉ោង២រសៀល ដោយធាតុរបស់លោកអាបេ ស្ថិតក្នុងប្រអប់មួយកាន់ដោយភរិយាមេម៉ាយរបស់លោក ដែលស្លៀកពាក់ក្នុងឈុយកាន់ទុក្ខគីម៉ូណូពណ៌ខ្មៅ
ភ្លេងបានលេងជាមួយនឹងការបាញ់កាំភ្លើងផ្តល់កិត្តិយស១៩ដង
មុននេះក្នុងថ្ងៃដដែល ប្រជាជនជប៉ុនរាប់ពាន់នាក់បានជម្នះនឹងព្រះអាទិត្យដ៏ក្តៅដើម្បីតម្រង់ជួរនៅក្រៅអាគារប៊ូដូកានដើម្បីដាក់បាច់ផ្កានិងគោរព។អ្នកតម្រង់ជួរខ្លះត្រូវរង់ចាំដល់ពីរម៉ោង
សន្តិសុខត្រូវបានពង្រឹងនៅទូទាំងរដ្ឋធានីដើម្បីបញ្ចៀសហេតុការណ៍អាក្រក់ ដោយប៉ូលិសរាប់ពាន់នាក់ត្រូវបានបញ្ជូនមកកាន់ទីក្រុងតូក្យូ។
ពួកអ្នកជំនាញការច្បាប់និយាយថា ពិធីបុណ្យសពថ្នាក់ជាតិនេះមិនត្រឹមត្រូវតាមច្បាប់ធម្មនុញ្ញ និងជាលើកទីពីរនៅក្រោយសង្គ្រាមលោកលើកទីពីរចាប់តាំងពីបុណ្យសពអតីតនាយករដ្ឋមន្ត្រី ស៊ីហ្គេរុ យ៉ូស៊ីដា (Shigeru Yoshida )នៅឆ្នាំ១៩៦៧។អតីតនាយរដ្ឋមន្ត្រី អ៊ីសាគុ សាតូ(Eisaku Sato) ដែលជានាយករដ្ឋមន្ត្រីក្រោយសម័យសង្គ្រាមយូរជាងគេលំដាប់ទីពីរហើយបានទទួលរង្វាន់ណូបែលសន្តិភាពផង មិនទទួលបានកិត្តិយសដូច្នេះទេ។
អ្នកជំនាញការនយោបាយនិយាយថា លោកគីស៊ីដាបានសំរេចធ្វើបុណ្យសពដ៏ធំនេះដោយមិនបានឆ្លងកាត់សភាទេ ខណៈប្រជាជនជប៉ុនមានមតិខ្វែងគ្នាដោយក្នុងការស្ទង់មតិមួយ អ្នកឆ្លើយដល់ទៅ៦០ភាគរយប្រឆាំងវា។គេថា ចំណាយលើពិធីបុណ្យនេះអស់ប្រមាណ១,៦៦ពាន់លានយេន(១២លានដុល្លារ)៕