Views: 5
ប្រែសម្រួល : កញ្ញាដាលីស (ដេល្លីម៉េល) ៖ ជប៉ុនបានប្រកាសកាលពីថ្ងៃព្រហស្បតិ៍ទី២២កញ្ញាថា ខ្លួននឹងលុបចោលការរឹតបន្តឹងកូវីដដ៏តឹងរ៉ឹងលើភ្ញៀវទេសចរបរទេសដោយបើកព្រំដែនឡើងវិញបន្ទាប់ពីបិទអស់រយៈពេលពីរឆ្នាំកន្លះ។
ថ្លែងនៅឯផ្សារហ៊ុនញូវយ៉ក នាយករដ្ឋមន្ត្រី ហ្វ៊ុយមីអូ គីស៊ីដា បាននិយាយថា ជំងឺរាតត្បាតបានរំខានដល់លំហូរដោយសេរីនៃមនុស្ស ទំនិញនិងមូលធន ដែលបានជួយប្រទេសជាតិឱ្យរីកចម្រើន។
លោកគីស៊ីដា ដែលកំពុងនៅទីក្រុងញូវយ៉កសម្រាប់មហាសន្និបាតអង្គការសហប្រជាជាតិ បាននិយាយថា “ប៉ុន្តែចាប់ពីថ្ងៃទី ១១ ខែតុលាជប៉ុននឹងបន្ធូរបន្ថយវិធានការត្រួតពិនិត្យព្រំដែនដើម្បីឱ្យស្មើភាពនឹងសហរដ្ឋអាម៉េរិក ក៏ដូចជាបន្តការធ្វើដំណើរដោយគ្មានទិដ្ឋាការនិងការធ្វើដំណើរជាលក្ខណៈបុគ្គល”។
ជប៉ុន រួមជាមួយនឹងចិន គឺជាប្រទេសដែលបន្តប្រកាន់ខ្ជាប់ការរឹតបន្តឹងយ៉ាងតឹងរ៉ឹងលើភ្ញៀវទេសចរ ខណៈពិភពលោកភាគច្រើនបានចាប់ផ្តើមរស់នៅជាមួយជំងឺកូវីដ។
ប៉ុន្តែខុសពីចិន ជប៉ុនមិនដែលបិទខ្ទប់តឹងរ៉ឹងក្នុងអំឡុងពេលវិបត្តិកូវីដនោះទេ៕
លោកគីស៊ីដា (ឆ្វេងទី២) ឈរជាមួយ ចន ថាត់ធិល (John Tuttle) (ស្តាំ) អនុប្រធាននៃ NYSE Group មុនពេលបន្លឺកណ្ដឹងបិទនៅផ្សារហ៊ុនញូវយ៉កកាលពីថ្ងៃទី ២២ ខែកញ្ញាឆ្នាំ ២០២២
