Views: 1
ដោយៈ គង់ហេង/ កំពង់ចាមៈ សាខាកាកបាទក្រហមកម្ពុជា ខេត្តកំពង់ចាមដឹកនាំដោយលោក អ៊ុន ចាន់ដា បាននាំយកអំណោយសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជាផ្ទះមួយខ្នងប្រគល់ជូនពលរដ្ឋមួយគ្រួសារ ធ្លាប់ស្នាក់នៅសំយាបផ្ទះអ្នកដទៃ និងអំណោយមនុស្សធម៌ជូនជនងាយរងគ្រោះចំនួន ៨០ គ្រួសារ ក្នុងឃុំមហាលាភ ស្រុកកោះសូទិន នៅព្រឹកថ្ងៃទី២៧ ខែមករានេះ។
លោក ទូច ឆៃ នាយកប្រតិបត្តិគណៈកម្មាធិការសាខាកាកបាទក្រហមកម្ពុជា ខេត្តកំពង់ចាមបានឱ្យដឹងថា អំណោយមនុស្សធម៌ដែលបាន ប្រគល់ជូនពលរដ្ឋងាយរងគ្រោះ ទាំង ៨០គ្រួសារ, ក្នុង ១ គ្រួសារ ទទួលបាន ៖ អង្ករ ២៥ គីឡូក្រាម, មី១កេស, ត្រីខ ១០ កំប៉ុង , ទឹកស៊ីអ៊ីវ ១យួរ, ទឹកត្រី ១យួរ, ឃីត (សារុង មុង ភួយ ក្រមា) ១កញ្ចប់ សាប៊ូ ៦ដុំ, អាវយឺត ៤, ម៉ាស់ ១០បន្ទះ និង ថវិកាចំនួន ៥០,០០០រៀល។ ក្នុងឱកាសនោះ លោក អ៊ុន ចាន់ដា និង សហការី ក៏បានអញ្ជើញ ប្រគេនទេយ្យវត្ថុ ព្រះចៅអធិការ គង់នៅ វត្តមហាលាភ នូវ អង្ករ ១០០ គីឡូក្រាម , ទឹកសុទ្ធ ២កេស, មី ៤កេស, ត្រីខ ៤០កំប៉ុង និងបច្ច័យ មួយចំនួន ផងដែរ។
ជាមួយគ្នានោះ ក៏បានប្រគល់ផ្ទះមនុស្សធម៌មួយខ្នងទំហំ ៤ម៉ែត្រគុណនឹង៦ ម៉ែត្រតម្លៃប្រមាណ ១០លាន រៀលដែលជាអំណោយរបស់សម្តេចកិត្តិព្រឹទ្ធបណ្ឌិត ដល់គ្រួសារលោក ជួន សាវឿន អាយុ ៤២ ឆ្នាំមានសមាជិកសរុបចំនួន បី នាក់រស់នៅភូមិដំណាក់ព្រីងកើត ឃុំមហាលាភ ស្រុកកោះសូទិន។
លោកនាយកប្រតិបត្តិឱ្យដឹងទៀតថា ដើម្បីជួយសម្រាលជីវភាពរស់នៅ សាខាបានផ្តល់សម្ភារៈគ្រឿង ឧបភោគបរិភោគ ជូនគ្រួសារ លោក ជួន សាវឿន សម្រាប់សង្កត់ផ្ទះថ្មីនេះ រួមមាន អង្ករ, ត្រីខ, ទឹកត្រី, ទឹកស៊ីអ៊ីវ, មី, ឃីត, អាវយឺត, ម៉ាស់, សម្ភារៈផ្ទះបាយមួយចំនួន និង ថវិកា ២០០.០០០រៀល ។ ដោយឡែកលោកយាយលោកតា ដែលចូលរួមជាសាក្សី ក្នុងពិធីប្រគល់-ទទួលផ្ទះថ្មីនេះ ចំនួន ១២នាក់ ក្នុងម្នាក់ៗ ទទួលបាន អង្ករ ត្រីខ ឃីត មី ទឹកត្រី ទឹកស៊ីអ៊ីវ និង អាវយឺត ម៉ាស់ ព្រមទាំង ថវិកាចំនួន ២០.០០០ រៀល ផងដែរ៕/R