Views: 9
ប្រែសម្រួលៈបំណង(ស្ត្រេតថែម)៖ ការធ្លាក់ភ្លៀងខ្លាំងបានពន្លិចតំបន់រដ្ឋធានីសេអ៊ូលរបស់កូរ៉េខាងត្បូងកាលពីយប់ថ្ងៃចន្ទដោយប្រែក្លាយបណ្តាដងវិថីក្នុងសង្កាត់ហ្កាងណាម(Gangnam )របស់រដ្ឋធានីសេអ៊ូលទៅជាទន្លេ ពន្លិចរថយន្តជាច្រើនគ្រឿងនិងធ្វើអោយស្ទះចរាចរណ៍។មនុស្សយ៉ាងហោចណាស់៧នាក់ត្រូវបានរាយការណ៍ថាស្លាប់និងប្រាំមួយនាក់ទៀតបាត់ខ្លួនដោយជំនន់និងឧបទ្ទវហេតុទាក់ទងទឹកភ្លៀងនៅកូរ៉េខាងត្បូង។
អ្នកដំណើរបានវិលទៅធ្វើការវិញបណ្តើរៗនៅព្រឹកថ្ងៃអង្គារក្រោយបុគ្គលិកគ្រាអាសន្នធ្វើការទាំងយប់ដើម្បីសម្អាតភក់និងសម្រាម តែនៅមានការព្រួយបារម្ភដោយសារការព្យាករណ៍បង្ហាញថាភ្លៀងនឹងបន្តធ្លាក់ដល់ថ្ងៃទីពីរជាប់គ្នា។
នៅពេលភាគច្រើននៃសេវាផ្លូវក្រោមដីក្នុងទីក្រុងសេអ៊ូលវិលមកដំណើរការធម្មតាវិញ ផ្លូវថ្នល់ប្រមាណ៨០និងនិងកន្លែងចតរថយន្តតាមមាត់ទន្លេជាច្រើននៅបិទនៅឡើយដោយសារបារម្ភអំពីសុវត្ថិភាព។
ក្នុងពេលជាមួយគ្នា ប្រធានាធិបតី យូន ស៊ុកយ៉ូល បានអំពាវនាវអោយនិយោជិតសាធារណៈនិងក្រុមហ៊ុនឯកជនកែសម្រួលម៉ោងធ្វើដំណើររបស់គេនិងបញ្ជាអោយផ្នែកពាក់ព័ន្ធចាត់វិធានការស្តារបណ្តាហេដ្ឋារចនាសម្ពន្ធខូចខាត ហើយជម្លៀសមនុស្សនៅតាមតំបន់គ្រោះថ្នាក់ដើម្បីកុំអោយមានជនរងគ្រោះដល់ជីវិតទៀត។
ភ្លៀងបានចាប់ផ្តើមកាលពីព្រឹកថ្ងៃចន្ទ និងធ្លាក់កាន់តែខ្លាំងនៅពេលល្ងាច។អាគារជិត៨០០នៅក្រុងសេអ៊ូលនិងបណ្តាទីក្រុងក្បែរៗរងការខូចខាត នៅពេលមនុស្សជាង៤០០នាក់ត្រូវបង្ខំអោយភៀសខ្លួនចេញពីផ្ទះរបស់គេ។
មនុស្សដើរក្នុងវិថីដែលជន់លិចក្នុងសង្កាត់ហ្កាងណាមក្នុងក្រុងសេអ៊ូលកាលពីល្ងាចថ្ងៃចន្ទ
សេអ៊ូលនៅព្រឹកថ្ងៃអង្គារ ក្រោយការធ្លាក់ភ្លៀងខ្លាំងកាលពីថ្ងៃចន្ទ
អ្នកជួយសង្គ្រោះមិនអាចចូលទៅជួយមនុស្សបីនាក់ដែលទូរស័ព្ទមកសុំជំនួយមុនពេលពួកគេលង់ទឹកស្លាប់ក្នុងអាគារជាន់ជាប់ដីក្នុងសង្កាត់មួយនៅក្រុងសេអ៊ូលខាងត្បូងកាលពីយប់ថ្ងៃចន្ទ។ស្ត្រីម្នាក់ទៀតបានលង់ទឹកស្លាប់នៅក្នុងផ្ទះរបស់ខ្លួនក្នុងសង្កាត់ជាប់គ្នានោះ។
មនុស្សពីរនាក់ក៏ត្រូវបានរកឃើញស្លាប់ក្នុងគំនរបាក់បែកនៃស្ថានីយរថភ្លើងដួលរលំបាក់មួយនិងការបាក់ដីនៅក្នុងទីក្រុងក្វាងជូ(Gwangju)។
ទីភ្នាក់ងារអាកាសធាតុរបស់ប្រទេសបានព្រមានថាការធ្លាក់ភ្លៀខ្លាំងនឹងបន្តនៅថ្ងៃអង្គារនេះសំរាប់តំបន់ក្រុងសេអ៊ូល៕
