Views: 1
ប្រែសម្រួល : កញ្ញាដាលីស (ដេល្លីម៉េល) ៖ ការផ្ទុះដ៏ខ្លាំងក្លាបានអង្រួនមូលដ្ឋានទ័ពអាកាសរុស្ស៊ីនៅគ្រីមេ ហើយបានបញ្ជូនពពកផ្សែងហុយពេញមេឃកាលពីថ្ងៃអង្គារទី៩សីហានៅក្នុងអ្វីដែលអាចបង្ហាញពីការកើនឡើងនៃសង្គ្រាមនៅអ៊ុយក្រែន។ អាជ្ញាធរបាននិយាយថា យ៉ាងហោចណាស់មនុស្សម្នាក់បានស្លាប់និងជាច្រើននាក់ទៀតបានរងរបួស។
ក្រសួងការពារជាតិរុស្ស៊ីបានបដិសេធថា មូលដ្ឋានសាគី (Saki)នៅសមុទ្រខ្មៅ មិនត្រូវបានបាញ់ផ្លោងដាក់ទេ ហើយនិយាយជំនួសមកវិញថា គ្រាប់យុទ្ធភណ្ឌបានផ្ទុះនៅទីនោះ។ ប៉ុន្តែបណ្តាញសង្គមអ៊ុយក្រែនមានការភ្ញាក់ផ្អើលជាមួយនឹងការសន្និដ្ឋានថាវាត្រូវបានបាញ់ដោយកាំជ្រួចរយៈចម្ងាយឆ្ងាយរបស់អ៊ុយក្រែន។
វីដេអូដែលបានបង្ហោះនៅលើបណ្តាញសង្គមបានបង្ហាញ អ្នកដេកហាលថ្ងៃនៅលើឆ្នេរក្បែរនោះកំពុងរត់គេចខ្លួន ខណៈអណ្តាតភ្លើងដ៏ធំនិងផ្សែងហុយឡើងលើមេឃពីចំណុចជាច្រើនអមដោយការផ្ទុះយ៉ាងខ្លាំង។ វេបសាយព័ត៌មាន Crimea Today News បាននិយាយនៅលើ Telegram ថាសាក្សីបានរាយការណ៍ថាមានភ្លើងឆេះនៅលើផ្លូវរត់និងការខូចខាតដល់ផ្ទះនៅក្បែរៗនោះដែលជាលទ្ធផលនៃអ្វីដែលគេនិយាយថាជាការផ្ទុះរាប់សិប។
ទីភ្នាក់ងារសារព័ត៌មានរដ្ឋ Tass របស់រុស្ស៊ីបានដកស្រង់ប្រភពក្រសួងដោយមិនបញ្ចេញអត្តសញ្ញាណថា មូលហេតុចម្បងនៃការផ្ទុះហាក់មកពី “ការរំលោភលើលក្ខខណ្ឌតម្រូវអំពីសុវត្ថិភាពអគ្គិភ័យ” ។ ក្រសួងបាននិយាយថា គ្មានយន្តហោះចម្បាំងណាមួយរងការខូចខាតទេ។
ក្រសួងការពារជាតិរុស្ស៊ីបាននិយាយបែបចម្អកនៅលើ Facebook ថា “ក្រសួងការពារជាតិអ៊ុយក្រែនមិនអាចបង្កើតមូលហេតុនៃអគ្គិភ័យនេះបានទេប៉ុន្តែជាថ្មីម្តងទៀតសូមរំលឹកឡើងវិញនូវច្បាប់សុវត្ថិភាពអគ្គិភ័យនិងការហាមឃាត់ការជក់បារីនៅកន្លែងដែលមិនបានបញ្ជាក់នានា”។
ទីប្រឹក្សាប្រធានាធិបតីអ៊ុយក្រែន លោក អូឡេកស៊ី អារ៉េស្តូវិច (Oleksiy Arestovych) បាននិយាយជាសម្ងាត់នៅក្នុងបទសម្ភាសន៍តាមអ៊ីនធឺណិតជាប្រចាំរបស់គាត់ថាការផ្ទុះនេះអាចបណ្តាលមកពីអាវុធរយៈចម្ងាយឆ្ងាយដែលផលិតដោយអ៊ុយក្រែន ឬជាស្នាដៃរបស់គូបក្ខដិបក្ខនានាដែលកំពុងធ្វើប្រតិបត្តិការនៅគ្រីមេ៕
ផ្សែងហុយពីមូលដ្ឋានសាគីកាលពីថ្ងៃអង្គារ