Views: 2
ដោយៈមុនីរ័ត្ន/ភ្នំពេញៈការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ដែលបានប្រព្រឹត្តនៅព្រឹកថ្ងៃអាទិត្យ ទី៥ ខែមិថុនានេះ ចាប់ពីម៉ោង ៧ព្រឹកដល់ម៉ោង ៣នេះ រសៀលបានបិទបញ្ចប់ហើយ ប្រកបដោយជោគជ័យ។ ខណៈនេះនៅតាមការិយាល័យបោះឆ្នោតកំពុងតែដំណើការរាប់សន្លឹកឆ្នោត ។
លោក ឌឹម សុវណ្ណារុំ សមាជិកគណៈកម្មាធិការជាតិរៀបចំការបោះឆ្នោត(គ.ជ.ប)និងប្រធានប្រតិកម្មព័ត៌មាន គ.ជ.បបានប្រាប់បណ្តាញសារព័ត៌មានថាការសន្និដ្ឋានបឋមថា «ការបោះឆ្នោតក្រុមប្រឹក្សាឃុំសង្កាត់ ទទួលបានលទ្ធផលប្រមាណជាង៧០ភាគរយ»។
ចំណែលោក សោម សូរីដា អគ្គលេខាធិការរងគ.ជ.ប បានបញ្ជាក់ថា ដំណើរការបោះឆ្នោតជ្រើសរើសក្រុមប្រឹក្សាឃុំ- សង្កាត់ អាណត្តិទី៥ នៅថ្ងៃទី៥ ខែមិថុនានេះនៅតាមបណ្តាការិយាល័យបោះឆ្នោតទាំង ២៣.៦០២ការិយាល័យពុំមានភាពមិនប្រក្រតីកើតឡើងនោះទេ ។
បើយោងតាមរបាយការណ៍របស់ គ.ជ.ប បានបញ្ជាក់ថា នៅក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ មានអ្នកបោះឆ្នោត ៩.២០៥.៦៨១នាក់ និងមានការិយាល័យបោះឆ្នោតសរុប ២៣.៦០២ការិយាល័យ។ សន្លឹកឆ្នោតដែលត្រូវប្រើប្រាស់មានចំនួន ១១.៦១១.៤០០សន្លឹក និងសន្លឹកឆ្នោតបម្រុងជាង ១,២លានសន្លឹក (១.២៣៩.០០០សន្លឹក)។ ទឹកខ្មៅលុបលាងមិនជ្រះ មានចំនួន ៥២.០០០ដប។
ផ្អែកតាមរបាយការណ៍ផ្លូវការនៃការចុះបញ្ជីបេក្ខជននៃគណបក្សនយោបាយឈរឈ្មោះបោះឆ្នោតដែលទទួលបានពីគណៈកម្មការរាជធានី ខេត្តរៀបចំការបោះឆ្នោត គណបក្សនយោបាយ ចំនួន ១៧ និងមានបេក្ខជនសរុបចំនួន ៨៦.០៩២ នាក់ ក្នុងនោះស្ត្រីមានចំនួន ២៧.៨១៣ នាក់ ត្រូវបានចុះបញ្ជីសម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២៕សរន
