Views: 10
ប្រែសម្រួល : កញ្ញាដាលីស (ដេល្លីម៉េល) ៖ កែវយឺតអវកាស James Webb (JWST)របស់អង្គការណាសាបានរកឃើញភពដំបូងរបស់ខ្លួន ហើយភពថ្មនេះមានទំហំប្រហាក់ប្រហែលនឹងផែនដីរបស់យើង។
មានឈ្មោះផ្លូវការថា LHS 475 b ភពនេះមានអង្កត់ផ្ចិតដូចផែនដី ៩៩ ភាគរយ ហើយខណៈភពក្រៅប្រព័ន្ធសុរិយគតិនេះមានសភាពស្ងួតហួតហែងអ្នកវិទ្យាសាស្ត្រនៅមិនទាន់ដឹងថាតើវាមានបរិយាកាសដូចផែនដីឬអត់នោះទេ។
ទោះបីជាក្រុមអ្នកវិទ្យាសាស្ត្រមិនអាចសន្និដ្ឋានអំពីអ្វីដែលមានវត្តមាននៅទីនោះក៏ដោយ ក៏ប៉ុន្តែពួកគេបានច្រានចោលនូវបរិយាកាសដែលគ្របដណ្ដប់ដោយមេតានស្រដៀងទៅនឹងព្រះចន្ទ Titan របស់ភពសៅរ៍។
កែវយឹត JWSTបានបង្ហាញថា ភពដែលស្ថិតនៅចម្ងាយ៤១ឆ្នាំពន្លឺពីផែនដីនេះ គឺក្តៅជាងផែនដីប្រហែលពីរបីរយអង្សាសេ ហើយបញ្ចប់គន្លងគោចររបស់វាក្នុងរយៈពេលពីរថ្ងៃ។
ភពក្រៅប្រព័ន្ធសុរិយគតិនេះនៅតែ “មិនអាចមើលឃើញ” ចំពោះកែវយឺតអវកាសជាច្រើន ប៉ុន្តែកែវយឹត JWSTបានសបញ្ជាក់ម្តងទៀតថាតើបច្ចេកវិជ្ជារបស់វាមានឥទ្ធិពលខ្លាំងកម្រិតយ៉ាងណា។
លោក ម៉ាក ក្លាមភីន (Mark Clampin)នាយកផ្នែករូបវិទ្យានៅទីស្នាក់ការកណ្តាលអង្គការណាសាក្នុងទីក្រុងវ៉ាស៊ីនតោន បាននិយាយនៅក្នុងសេចក្តីថ្លែងការណ៍មួយថា”លទ្ធផលសង្កេតដំបូងទាំងនេះពីភពថ្មទំហំប៉ុនផែនដីនេះ បានបើកទ្វារឆ្ពោះទៅរកលទ្ធភាពជាច្រើននាពេលអនាគតសម្រាប់ការសិក្សាបរិយាកាសភពថ្មជាមួយកែវយឹត Webb”។
“កែវយឹត Webb កំពុងនាំយើងឱ្យកាន់តែខិតជិតការយល់ដឹងថ្មីអំពីភពដូចផែនដីនៅខាងក្រៅប្រព័ន្ធសុរិយគតិរបស់យើង ហើយបេសកកម្មទើបតែចាប់ផ្តើមប៉ុណ្ណោះ”៕
ភព LHS 475 b ត្រូវបានថតជាប់ដោយកែវយឹត Webb