Views: 4
ដោយ: បូកគោ/កំពត: ខេត្តកំពតគ្រោងនឹងចុះបញ្ជីនូវភូមិមួយ ផលិតផលមួយ ចំនួន២៦មុខបន្ថែមទៀត ខណ:ដែលផលិតផលប្រមាណ២១មុខបានចុះបញ្ជីរួចរាល់។
កាលពីថ្ងៃទី១ ខែធ្នូ ឆ្នាំ២០២២ នៅសាលប្រជុំសាលាខេត្តកំពតមានបើកកិច្ចប្រជុំដើម្បីត្រួតពិនិត្យពាក់កណ្ដាលអាណត្តិគោលនយោបាយ ជាតិស្តីពីការជំរុញចលនាភូមិមួយ ផលិតផលមួយ ឆ្នាំ២០១៦-ឆ្នាំ២០២៦។
កិច្ចប្រជុំក៏បានផ្តោតលើផែនការយុទ្ធសាស្ត្រជាតិស្តីពីការជំរុញចលនាភូមិមួយផលិតផលមួយរយ:ពេល៥ឆ្នាំ លើកទីមួយចាប់ពីឆ្នាំ២០១៩ដល់ឆ្នាំ២០២៣ផងដែរ។
ថ្លែងក្នុងកិច្ចប្រជុំខាងលើ លោកពេញ ធារម្យ អភិបាលរងខេត្តកំពតបានមានប្រសាសន៍ថា កិច្ចការងារជំរុញចលនាភូមិមួយផលិតផលមួយ ខេត្តកំពតមានដំណើរការល្អ និងទទួលបានលទ្ធផលគួរឱ្យមោទកៈ។ រដ្ឋបាលខេត្តតែងបានក្រើនរំលឹកដល់ក្រុមការងារលេខាធិការដ្ឋាន ក៏ដូចជាអាជ្ញាធរ និងមន្ទីរពាក់ព័ន្ធត្រូវចូលរួមសហការគ្នាធ្វើយ៉ាងណាឲ្យការងារជំរុញចលនាភូមិមួយ ផលិតផលមួយទទួលបានលទ្ធផលល្អប្រសើរបន្ថែមទៀតសម្រាប់ឆ្នាំក្រោយៗ។
លោកអភិបាលរងខេត្តបានបញ្ជាក់ថារយៈពេលអនុវត្ត៥ឆ្នាំនៃការជំរុញចលនាភូមិមួយផលិតផលមួយ ខេត្តកំពតបានចុះបញ្ជីផលិតផលជូនផលិតករ កសិករ សមាគម សហគមន៍ និងសេវាករបម្រើសេវាកម្មផ្សេងៗបានចំនួន ២១មុខដែលជាចំនួនច្រើនជាងបណ្តាខេត្តនានា។ បច្ចុប្បន្ន រដ្ឋបាលខេត្តកំពុងត្រៀមបម្រុងផលិតផលចំនួន២៦មុខបន្ថែមទៀតដើម្បីដាក់បញ្ជូលក្នុងបញ្ជីភូមិ១ផលិតផល១។
លោកម៉ែន សារ៉ុម ប្រធានគម្រោងត្រួតពិនិត្យពាក់កណ្ដាលអាណត្តិគោលនយោបាយជាតិស្តីពីការជំរុញចលនាភូមិមួយផលិតផលមួយបានថ្លែងថា ក្នុងនាមប្រធានគម្រោង លោកសូមកោតសរសើរចំពោះរដ្ឋបាលខេត្តកំពតដែលកន្លងទៅបានបំពេញការងារប្រកបដោយលទ្ធផលគាប់ប្រសើរ។ កិច្ចការងារនេះពិតជាជូបបញ្ហាប្រឈម និងមានក្តីលំបាកមួយចំនួនក្នុងការអនុវត្តជាទូទៅ។
លោកប្រធានបានបញ្ជាក់ថាតាមរយ:កិច្ចប្រជុំនេះ លោកសូមឲ្យសមាជិកសមាជិកាទាំងអស់លើកជាមតិយោបល់អំពីបញ្ហាប្រឈមនានាដែលបានជួបប្រទះនាពេលកន្លងមកដើម្បីរួមគ្នារកវិធីដោះស្រាយ៕
