Views: 1
ដោយ:សុខុម/ស្ទឹងត្រែង:មន្ទីរវប្បធម៌និងវិចិត្រសិល្បៈខេត្តស្ទឹងត្រែងនិង គណៈកម្មការថ្នាក់ខេត្តបានសម្រេចជ្រើសរើសយកនំអន្សមជ្រូកខ្មែរឆ្ងាញ់ពិសេសប្រចាំតំបន់ក្នុងចំណោមផលិតផលផ្សេងទៀតដើម្បីត្រៀមប្រកួតប្រជែងទីផ្សារលក់ក្នុងកម្មវិធីភូមិមួយផលិតផលមួយនៅពេលខាងមុខ។នំអន្សមនោះកើតចេញពីស្នាដៃរបស់អ្នកស្រី ង៉ែត សុភា ជាភរិយារបស់ លោក ឈាង ឡាក់ ប្រធានក្រុមប្រឹក្សាខេត្តស្ទឹងត្រែង។
លោក ឡា ពុទ្ធី អនុប្រធានមន្ទីរវប្បធ៌មនិងវិចិត្រសិល្បៈខេត្តបានបញ្ជាក់កាលពីពេលកន្លងទៅថាគណៈកម្មការថ្នាក់ខេត្តបាន ចុះស្រង់ផលិតផលជាច្រើនមុខក្នុងនោះមាននំអន្សមជ្រូកដាក់ពងទាប្រៃផងដែរដើម្បីប្រកួតប្រជែងទីផ្សារក្នុងភូមិមួយផលិតផលមួយ។នំអន្សមឆ្ងាញ់លោកអ្នកស្រីង៉ែតសុធានៅភូមិព្រែកសង្កាត់ស្ទឹងត្រែងក្រុងស្ទឹងត្រែងគឺបានត្រៀមទុកហើយ។
អ្នកស្រី ង៉ែត សុភា បានរៀបរាប់ថា មុខរបរវេចនំអន្សមលក់ជិតប្រាំឆ្នាំមកនេះ មានអតិថិជនបញ្ជាទិញយកទៅលក់បន្តនៅតាមបណ្តាខេត្តនានាជាច្រើន។លោកស្រីបន្ថែមថាបើមានការប្រកួតប្រជែងលើទីផ្សារភូមិមួយផលិតផលមួយទៀតពិតជាប្រសើរណាស់។ រីឯតម្លៃវិញនោះនំមួយត្រឹម១០.០០០រៀលប៉ុណ្ណោះ។
អ្នកស្រី នឹងបង្កើតស្តង់លក់មួយប្រចាំនៅក្នុងភូមិតែម្តងសម្រាប់បម្រើឱ្យអតិថិជននៅក្នុងខេត្តទិញ ។
បច្ចុប្បន្នអ្នកស្រីក៏បានបង្ហាត់បង្រៀនក្មេងជំនាន់ក្រោយឱ្យចេះវេចនំ ដើម្បីមានមុខរបរសម្រាប់លក់ដូរ រកប្រាក់ចំណូលដោះស្រាយជីវភាពប្រចាំថ្ងៃផងដែរ៕សរន
