Views: 2
ដោយ: សុខុម / ស្ទឹងត្រែង: មន្ត្រីខណ្ឌរដ្ឋបាលព្រៃឈើ បានចុះបង្ក្រាបគំនរឈើ ជាច្រើនកំណាត់ ដែលឈ្មោះ វុន បានដឹកយកមកលាក់ទុក នៅក្បែរផ្ទះប្រជាពលរដ្ឋ ត្រង់ចំណុចដុងតាដាំ ភូមិស្រែពោធិ៍ សង្កាត់ស្រះឫស្សី ក្រុងស្ទឹងត្រែង កាលពីរសៀល ថ្ងៃទី១១ ខែសីហា ឆ្នាំ២០២២។
មន្ត្រីខណ្ឌរដ្ឋបាលព្រៃឈើ បានឲ្យដឹងនៅព្រឹកថ្ងៃទី១២ សីហា នេះ ថាៈ ឈើទាំងអស់ ដែលបង្ក្រាបបាន ពីថ្ងៃម្សិលមិញនោះ មានចំនួន ៧១ ដុំ ក្នុងនោះមាន ឈើលេខមួយ ប្រភេទសុក្រំ និងឈើក្រៅលំដាប់ថ្នាក់។ ក្រោយពីបង្ក្រាប សមត្ថកិច្ច ក៏បានរឹបអូសយក មករក្សាទុកនៅផ្ទះ ខណ្ឌរដ្ឋបាលព្រៃឈើ ក្បែរគាល់ស្ពានសេកុង ខេត្តស្ទឹងត្រែង។ សមត្ថកិច្ច រកមិនឃើញអ្នកទទួលខុសត្រូវ បទល្មើសខាងលើនេះតម្លៃទេ។
ក៏ប៉ុន្តែប្រជាពលរដ្ឋ បានឲ្យដឹងថាៈ ឈើទាំងអស់នោះ គឺមេឈ្មួញម្នាក់ ឈ្មោះ វុន តែងតែដឹកជញ្ជូនឈើតាមផ្លូវទឹក ពីឃុំស្ដៅ ស្រុកសេសាន តាមទូក មកលើកស្តុកទុក នៅចំណុចដុងតាដាំ ភូមិស្រែពោធិ៍ ស្ទើររាល់យប់ ដោយទូកក្នុងមួយគ្រឿង មិនក្រោម ៥ ម៉ែត្រ ទៅ ១០ ម៉ែត្រគូបទេ។
ប្រភពបានឲ្យដឹងទៀតថាៈ មេឈ្មួញរូបនោះ តែងតែត្រូវរ៉ូវជាមួយសមត្ថកិច្ចមួយចំនួន ដឹកជញ្ជូនឈើតាមម៉ូតូរ៉ឺម៉ក នៅពេលយប់ ចែកចាយក្នុងសិប្បកម្មកែច្នៃឈើធំៗ ក្នុងក្រុងស្ទឹងត្រែង។ សិប្បកម្ម ធំជាងគេ ដែលឈ្មោះ វុន តែងតែដឹកជញ្ជូនយកទៅ ចែកចាយ លក់ភាគច្រើន អ្នកស្ទឹងត្រែង ហៅថា ឈ្មោះយាយ បូង ជនជាតិវៀតណាម។ សិប្បកម្មឈ្មោះយាយបូង គឺនៅមិនឆ្ងាយពីច្រមុះខណ្ឌរដ្ឋបាលព្រៃឈើឡើយ ហើយមានការអនុញ្ញាត បើកអាជីវកម្មសិប្បកម្មកែច្នៃ ក្នុងខេត្តផង។ ប៉ុន្តែការទទួលទិញ ឈើនោះ បែបអនាធិបតេយ្យ មិនមានប្រភពច្បាស់លាស់ យកមកកែច្នៃនៅក្នុងសិប្បកម្ម របស់ខ្លួន៕/V