Views: 3
ដោយ៖ សុវណ្ណកុម្ភៈ / ភ្នំពេញ៖ ព្រឹត្តិការណ៍ប្រកួតប្រដាល់គុនខ្មែរ ដណ្ដើមខ្សែក្រវាត់ ពានរង្វាន់សម្ដេចពិជ័យសេនា ទៀ បាញ់ ទម្ងន់ ៦០ គីឡូក្រាម លើសង្វៀនទូរទស្សន៍ ប៉ុស្ដិ៍លេខ៥ (TV5) ថ្ងៃទី២ តុលា យប់ម្សិលមិញនេះ អ្នកប្រដាល់ សូត្រ វាសនា ក្លិបបក្សីស្លាបដែក និង ឃុន បូរ៉ា ក្លិបរស្មីភូមិគាបខេត្តបន្ទាយមានជ័យ បានទទួលជ័យជំនះ លើគូប្រកួតដូចគ្នា។
សូត្រ វាសនា នឹងជួបប្រកួតជាមួយអ្នកប្រដាល់ ពុទ្ធ សំបូរ ក្លិបពុទ្ធសេរីវង្ស ។ អ្នកប្រដាល់ទាំង ២ រូបនេះ សុទ្ធតែខ្លាំងៗដូចគ្នា។ ស្ថានភាពនៃការប្រកួត វាសនា បានបង្ហាញពី ការមានប្រៀបលើ សំបូរ តាំងពីដើមទឹកទី១ មកម្ល៉េះ។ សំបូរ ទោះបីគេជាអ្នកប្រដាល់ ដែលមានកណ្ដាប់ដៃធ្ងន់ និងរហ័ស ក៏ពិតមែន តែ វាសនា ដែលខ្ពស់ជាងនោះ គេបានប្រើជើងធាក់ ដើម្បីរារាំងមិនឲ្យ សំបូរ ចូលកៀកខ្លួន ដើម្បីប្រើកណ្ដាប់ដៃ បានឡើយ។
ទឹកទី១ និងទឹកទី២ សំបូរ មិនមានឱកាសច្រើន ដើម្បីវាយសងលើលើ វាសនា ឡើយ លុះ មកដល់ទឹកទី៣ វាសនា បួង ក សំបូរ ជាប់ ហើយបញ្ចេញមួយជង្គង់ ចំឆ្អឹងជំនី ធ្វើឲ្យ សំបូរ ដួលសន្លប់ មិនអាចបន្តការប្រកួតបានឡើយ។ ក្នុងព្រឹត្តិការណ៍នេះ ទាំង សំបូរ ទាំង វាសនា ទើបតែប្រកួតបានមួយប្រកួតនេះ ដូចគ្នាតែមួយប្រកួតរបស់ វាសនា បានទទួលជ័យជំនះ ចំពោះ សំបូរ ទទួលបានបរាជ័យ ។
ចំពោះជំនួបក្នុងព្រឹត្តិការណ៍នេះដែរ អ្នកប្រដាល់ជើងរន្ទះ គង់ ហ៊ូវ ក្លិបគុហារព្រហ្មជ័យខេត្តសៀមរាប ប្រកួតចាញ់អ្នកប្រដាល់ជើងខ្លាំង ឃុន បូរ៉ា ក្លិបរស្មីភូមគាប ខេត្តបន្ទាយមានជ័យ ដោយពិន្ទុ។ ទោះបីការប្រកួតអូសបន្លាយ រហូតដល់ចប់ទឹកទី៥ ក៏ពិតមែន តែស្ថានភាពនៃការប្រកួត ភាគច្រើនគឺ បូរ៉ា ជាអ្នកមានប្រៀប ។
គង់ ហ៊ូវ មិនសូវពូកែកណ្ដាប់ដៃឡើយ តែកែងរបស់គេ និងស្នៀតទាត់របស់គេ អស្ចារ្យណាស់ តែក្នុងជំនួបជាមួយ បូរ៉ា គង់ហ៊ូវ បញ្ចេញជើងមិនរួចឡើយ។ ចំពោះ បូរ៉ា គេវ៉ៃដោយប្រយ័ត្នប្រយែងបំផុត ព្រោះគេក៏ញញើតជើងរបស់ គង់ ហ៊ូវ ដែរ។ ពួកគេ ប្រកួតគ្នារហូតចប់ទឹកទី៥ ដោយ ឃុន បូរ៉ា បានទទួលជ័យជំនះ លើ គង់ ហ៊ូវ ដោយពិន្ទុ ។ នេះជាការប្រកួតលើកដំបូងរបស់ពួកគេ ក្នុងព្រឹត្តិការណ៍នេះ ។
ក្នុងព្រឹត្តិការណ៍នេះ មានអ្នកប្រដាល់ ៤រូបហើយដែលចាញ់ ក្នុងការប្រកួតដំបូង ហើយក៏មានអ្នកប្រដាល់ ៤រូបដែរ ដែលឈ្នះក្នុងការប្រកួតដំបូង។ អ្នកចាញ់ទាំង ៤រូបនោះ មាន សៀវ ង៉ុយ ក្លិបអភិវឌ្ឍន៍គុនខ្មែររ៉ុងរឿង រិន ដេវីដ ក្លិបនាគរាជចតុមុខ គង់ ហ៊ូវ ក្លិបគុហារគុនខ្មែរ និង ពុទ្ធ សំបូរ ក្លិបពុទ្ធសេរីវង្ស ។
ចំពោះអ្នកឈ្នះទាំង ៤ រូបវិញនោះ មានប្រដាល់ វ៉ាន់ វឿន ឈុត សេរីវ៉ាន់ថង ក្លិបរាហ៊ូកីឡា សូត្រ វាសនា និង ឃុន បូរ៉ា ៕ V / N
