Views: 1
ដោយ៖ សុវណ្ណកុម្ភៈ / ភ្នំពេញ៖ ល្ងាចថ្ងៃទី៨ សីហា ម្សិលមិញនេះ ព្រឹត្តិការណ៍ប្រកួត កីឡាប៊ីយ៉ា និងស្នូកឃ័រ ដណ្ដើមពានរង្វាន់ King Snooker Cup 2022 បានចាប់ផ្ដើមការប្រកួតផ្លូវការ ដោយទទួលបានការគាំទ្រពេញទំហឹង ពីអគ្គនាយកដ្ឋានកីឡា នៃក្រសួងអប់រំ យុវជន និងកីឡា ដើម្បីជំរុញការអភិវឌ្ឍ និងផលិតធនធាន កីឡាករឆ្នើមៗ ត្រៀមស៊ីហ្គេម ឆ្នាំ២០២៣។
អគ្គលេខាធិការ សហព័ន្ធកីឡាប៊ីយ៉ា និងស្នូកឃ័រកម្ពុជា លោក ម៉ារ៉ា សុជាតិ បានឲ្យដឹងថាៈ ពាននេះ រៀបចំឡើង ក្រោមកិច្ចសហការ រវាងសហព័ន្ធ និងក្លិប King Snooker Sport ក្នុងគោលបំណងជំរុញការអភិវឌ្ឍវិស័យកីឡានេះ ឲ្យកាន់តែរីកចម្រើន ក៏ដូចជា ស្វែងរកកីឡាករល្អៗ ត្រៀមស៊ីហ្គេមនៅកម្ពុជា។ ការប្រកួត មានកីឡាករជើងខ្លាំង ១៦ រូប ចូលរួម និងចែកចេញជា ៤ ពូល ដោយគ្រោងចំណាយពេលប្រកួត ៣ សប្ដាហ៍។
លោក អ៊ុក សិទ្ធិជាតិ អគ្គនាយក នៃអគ្គនាយកដ្ឋានកីឡា បានបង្ហាញនូវការគាំទ្រពេញទំហឹង ចំពោះការរៀបចំព្រឹត្តិការណ៍នេះ ហើយលោកបានលើកទឹកចិត្ត ដល់កីឡាករទាំងអស់ ត្រូវខំប្រឹងនិងបញ្ចេញឲ្យអស់ពីសមត្ថភាព ដើម្បីដណ្ដើមជ័យលាភីផង និងដើម្បីជាឱកាសគណៈកម្មការបច្ចេកទេស របស់សហព័ន្ធ ធ្វើការសម្រិតសម្រាំង កីឡាករឆ្នើមៗ ចូលរួមការប្រកួតអន្ដរជាតិនានាផង ពិសេសស៊ីហ្គេម ឆ្នាំ២០២៣ នៅកម្ពុជាតែម្ដង។
លោកអគ្គនាយកកីឡា បានចាត់ទុកជាឱកាសដុះខាត់ សមត្ថភាពមន្ដ្រីបច្ចេកទេស ឲ្យកាន់តែមុតស្រួច ស្របតាមនិយាមអន្ដរជាតិ ដើម្បីមានលទ្ធភាពចូលរួមកាត់សេចក្ដី ក្នុងនាមជាម្ចាស់ផ្ទះស៊ីហ្គេម ឆ្នាំក្រោយផងដែរ។ ហេតុនេះ លោកបានគាំទ្រ និងជំរុញឲ្យ គ្រប់ភាគីពាក់ព័ន្ធ ពិសេសសហព័ន្ធ ត្រូវយកចិត្តទុកដាក់ខ្ពស់ លើការរៀបចំនេះ។
អនុប្រធានសហព័ន្ធលោក ហេង សុវណ្ណ បានលើកឡើងថាៈ ដើម្បីត្រៀមស៊ីហ្គេម ឆ្នាំ២០២៣ សហព័ន្ធបានទាមទារលើល័ក្ខខ័ណ្ឌគុណភាពសមត្ថភាព របស់កីឡាករ -កីឡាការិនី ក្នុងគោលបំណងចម្បង ដើម្បីដណ្តើមមេដាយជូនជាតិ។ ដូច្នេះសហព័ន្ធ នឹងបន្តការខិតខំរៀបចំការប្រកួត ឲ្យបានកាន់តែច្រើន ដើម្បីឲ្យកាន់តែស្ទាត់ជំនាញ លើផ្នែកបច្ចេកទេស អាចឈានទៅប្រកួតប្រជែងមេដាយ ក្នុងឋានៈជាម្ចាស់ផ្ទះព្រឹត្តិការណ៍ ជាប្រវត្តិសាស្ដ្រ នាឆ្នាំក្រោយ៕/V