Views: 8
ដោយ សុវណ្ណកុម្ភៈ/ភ្នំពេញ៖ការចុះអនុស្សរណៈនៃការយោគយល់គ្នា(MoU)នឹងអាចធ្វើឡើងរវាងកម្ពុជានិងប្រទេសអ៊ីរ៉ង់លើវិស័យទេសចរណ៍និងកីឡានាពេលខាងមុខឆាប់ៗនេះស្របពេលដែលកម្ពុជាកំពុងតម្រង់ទិសយ៉ាងមោះមុតឆ្ពោះទៅធ្វើម្ចាស់ផ្ទះការប្រកួតកីឡាស៊ីហ្គេមលើកទី៣២និងអាស៊ានប៉ារ៉ាហ្គេមលើកទី១២ឆ្នាំ២០២៣។
លោក វ៉ាត់ ចំរើន រដ្ឋលេខាធិការក្រសួងទេសចរណ៍ អគ្គលេខាធិការគណៈកម្មាធិការជាតិ អូឡាំពិកកម្ពុជា (NOCC) និងជាអគ្គលេខាធិការ គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC)បានបញ្ជាក់អំពីចំណុចនេះ បន្ទាប់បញ្ចប់ជំនួបរវាងលោកបណ្ឌិត ថោង ខុន រដ្ឋមន្ត្រីក្រសួងទេសចរណ៍និងជាប្រធានគណៈកម្មាធិការជាតិអូឡាំពិកកម្ពុជា(NOCC)ជាមួយប្រធានគណៈកម្មាធិការជាតិអូឡាំពិកអ៊ីរ៉ង់ លោក Mahmoud Khosravi Vafa នាថ្ងៃទី២៩ ខែកញ្ញាឆ្នាំ២០២២ម្សិលមិញ នេះ។
លោក វ៉ាត់ ចំរើន បាននិយាយថា ក្នុងឱកាសចូលរួមមហាសន្និបាតក្រុមប្រឹក្សាកីឡាអាស៊ីអាគ្នេយ៍ លើកទី៤១ ពីថ្ងៃទី០១-០៥ ខែតុលានៅភ្នំពេញ ប្រធានគណៈកម្មាធិការជាតិអូឡាំពិកអ៊ីរ៉ង់បានស្នើសុំជួបប្រធាន NOCC លោកបណ្ឌិត ថោង ខុនដើម្បីពិភាក្សាការងារមួយចំនួនលើកិច្ចសហប្រតិបត្តិការគ្នាលើវិស័យកីឡាក៏ដូចជាផ្លាស់ ប្តូរយោបល់រិតចំណងសាមគ្គីភាពមិត្តភាពនៃគណៈកម្មាធិការជាតិនៃប្រទេសទាំងពីរ កម្ពុជា-អ៊ីរ៉ង់។
ក្នុងជំនួបបណ្ឌិត ថោង ខុន ក៏បានថ្លែងអំណរគុណដល់អូឡាំពិកអ៊ីរ៉ង់ដែលតែងតែផ្តល់ការគាំទ្រដល់កម្ពុជានា ពេលកន្លងមក។ជាក់ស្តែងគ្រូបង្វឹកការ៉ាតេមកពីប្រទេសអ៊ីរ៉ង់និងគ្រូចំបាប់ដែលមានគុណវុឌ្ឍខ្ពស់មកចែករំលែកដល់អត្តពលិកជម្រើសជាតិកម្ពុជា។ការផ្លាស់ប្តូរយោបល់នេះផ្តោតសំខាន់លើវិស័យទេសចរណ៍ផងនិងកីឡា ផង។កិច្ចពិភាក្សាគ្នានេះនឹងឈានដល់អនុស្សរណៈនៃការយោគយល់គ្នា(MoU)ក្នុងពេលវេលាសមស្របណាមួយ នាពេលខាងមុខឆាប់ៗនេះ។
ប្រធានគណៈកម្មាធិការជាតិអូឡាំពិកអ៊ីរ៉ង់ បានអញ្ជើញលោកបណ្ឌិត ថោង ខុន ទៅធ្វើទស្សនកិច្ចនៅប្រទេស អ៊ីរ៉ង់នាពេលខាងមុខដើម្បីស្វែងរកពេលវេលាសមស្របណាមួយចុះអនុស្សរណៈនៃប្រទេសទាំងពីរលើវិស័យកីឡា-ទេសចរណ៍។ការចុះអនុស្សរណៈនេះនឹងអាចធ្វើឡើងក្រោយទទួលបានការអនុញ្ញាតដ៏ខ្ពង់ខ្ពស់ពីសម្តេចតេជោនាយករដ្ឋមន្ត្រី ហ៊ុន សែន។
លោក វ៉ាត់ ចំរើន បានបញ្ជាក់ថា អ្វីជាការកត់សម្គាល់គឺប្រទេសអ៊ីរ៉ង់មានសក្តានុពលខ្លាំងលើប្រភេទកីឡា ប្រយុទ្ធ។ដូច្នេះហើយទើបបណ្ឌិតថោងខុនបានស្នើឲ្យភាគីអ៊ីរ៉ង់ជួយឧបត្ថម្ភគាំទ្របន្ថែមលើការអភិវឌ្ឍវិស័យកីឡាជូនដល់កម្ពុជាឱ្យកាន់តែល្អប្រសើរខណៈកម្ពុជាកំពុងត្រៀមខ្លួនយ៉ាងក្លៀវក្លាត្រៀមឆ្ពោះទៅទទួលធ្វើម្ចាស់ផ្ទះការប្រកួតកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ ជាប្រវត្តិសាស្ត្រដំបូងរបស់ខ្លួន។
លោកអគ្គលេខាធិការក៏បានបង្ហាញនូវក្តីសង្ឃឹមថាកីឡាកម្ពុជានិងកីឡាអ៊ីរ៉ង់នឹងសហប្រតិបត្តិការគ្នាយ៉ាងល្អហើយ ពង្រឹងបាននូវគុណភាពបច្ចេកទេសកម្រិតខ្ពស់ដែលអាចចូលរួមប្រកួតប្រជែងក្នុងកម្រិតពិភពលោកបាន៕សរន / N