Views: 3
ដោយៈ មុនីរ័ត្ន / ភ្នំពេញៈ នៅក្នុងឱកាសនៃមហាសន្និបាតអង្គការសហប្រជាជាតិ លើកទី៧៧ នៅទីក្រុងញូវយ៉ក សហរដ្ឋអាមេរិក កាលពីថ្ងៃទី២១ ខែកញ្ញា ឆ្នាំ២០២២ លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា មានជំនួបទ្វេភាគីដាច់ដោយឡែកពីគ្នា ជាមួយរដ្ឋមន្ត្រីការបរទេស នៃប្រទេសហ្កំប៊ី និងប្រស៊ីល ដើម្បីពិភាក្សាអំពី ការលើកកម្ពស់ទំនាក់ទំនងទ្វេភាគី។ នៅក្នុងថ្ងៃដដែលនោះដែរ លោកឧបនាយករដ្ឋមន្ត្រី ក៏បានជួបពិភាក្សាការងារជាមួយលោកស្រី Louise Mushikiwabo អគ្គលេខាធិការ នៃអង្គការអន្តរជាតិហ្វ្រង់កូហ្វូនី (OIF) ។ នេះបើយោងតាម សេចក្តីព័ត៌មានរបស់ ក្រសួងការបរទេសកម្ពុជា ដែលបានផ្សព្វផ្សាយ នៅថ្ងៃទី២៣ ខែកញ្ញា ឆ្នាំ២០២២ នេះ។
ក្រសួងការបរទេសកម្ពុជា បានបន្តថាៈ ជំនួបជាមួយ ឯកឧត្តមបណ្ឌិត Mamadou Tangara រដ្ឋមន្ដ្រីការបរទេស កិច្ចសហប្រតិបត្តិការអន្តរជាតិ និងអាណិកជនហ្កំប៊ី នៃសាធារណរដ្ឋហ្កំប៊ី៖
លោកឧបនាយករដ្ឋមន្ត្រី ប្រាក់ សុខុន និងលោកបណ្ឌិត Mamadou Tangara បានឯកភាពរៀបចំកិច្ចពិគ្រោះយោបល់ទ្វេភាគី ក្នុងពេលឆាប់ៗខាងមុខនេះ ដើម្បីជំរុញពាណិជ្ជកម្ម ការវិនិយោគ និងកិច្ចសហប្រតិបត្តិការ នៅលើគ្រប់វិស័យ ដែលមានសក្តានុពលភាព រួមទាំង វិស័យកសិកម្មផង រវាងកម្ពុជា និងប្រទេសហ្កំប៊ី។ ដើម្បីអាចដំណើរការបាន ភាគីទាំងពីរ បានយល់ស្របគ្នាធ្វើយ៉ាងណា សម្រេចឱ្យបានឆាប់នូវ កិច្ចព្រមព្រៀងស្តីពីការ លើកលែងទិដ្ឋាការ សម្រាប់អ្នកកាន់ លិខិតឆ្លងដែនការទូត និងផ្លូវការ នៃប្រទេសទាំងពីរ ដែលនឹងជួយសម្រួលដល់ ការផ្លាស់ប្តូរមន្ត្រីរាជការ រួមទាំងរវាងស្ថាប័ន នីតិប្បញ្ញត្តិផងដែរ។
រូបថតៈ ក្រសួងការបរទេស និងសហប្រតិបត្តិការអន្តរជាតិ
រដ្ឋមន្ត្រីការបរទេសទាំងពីរ បានឯកភាពគ្នាថាៈ ភាគីទាំងពីរ គួរគិតគូអំពីការបង្កើត កុងស៊ុលកិត្តិយស នៅក្នុងប្រទេសរៀងៗខ្លួន ដើម្បីជំរុញការភ្ជាប់ទំនាក់ទំនង និងធុរកិច្ច។ ភាគីទាំងពីរ ក៏បានប្តេជ្ញាចិត្តក្នុងការជំរុញកិច្ចសហប្រតិបត្តិការអន្តរជាតិ រវាងកម្ពុជា-ហ្កំប៊ី និងការគាំទ្របេក្ខភាពគ្នា ទៅវិញទៅមក នៅក្នុងអង្គការតំបន់ និងអន្តរជាតិនានា។
ក្រសួងការបរទេស បានបន្តទៀតថាៈ ជំនួបជាមួយលោក Carlos Alberto Franco França រដ្ឋមន្ត្រីការបរទេសប្រេស៊ីល៖
លោកឧបនាយករដ្ឋមន្ត្រី ប្រាក់ សុខុន បានអបអរសាទរប្រេស៊ីល ដែលទើបទទួលបាន ឋានៈជាដៃគូ សន្ទនាតាមវិស័យរបស់អាស៊ាន និងបានឯកភាពជាមួយសមភាគីប្រេស៊ីល របស់លោកថា នៅមានវិស័យសក្តានុពលជាច្រើនទៀត សម្រាប់កិច្ចសហប្រតិបត្តិការ អាស៊ាន-ប្រេស៊ីល និង កម្ពុជា-ប្រេស៊ីល។
រដ្ឋមន្ត្រីការបរទេសទាំងពីរ បានសម្តែងសុទិដ្ឋិនិយមថាៈ កិច្ចពិគ្រោះយោបល់នយោបាយ លើកទី១ រវាងក្រសួងការបរទេសកម្ពុជា និងប្រេស៊ីល ដែលនឹងប្រព្រឹត្តទៅក្នុងខែធ្នូ ឆ្នាំនេះ នឹងពង្រីកទំហំពាណិជ្ជកម្ម និងការវិនិយោគ ព្រមទាំងកិច្ចសហប្រតិបត្តិការ លើវិស័យជាច្រើន រវាងប្រទេសទាំងពីរ។
រូបថតៈ ក្រសួងការបរទេស និងសហប្រតិបត្តិការអន្តរជាតិ
នៅក្នុងជំនួបនេះដែរ លោក Carlos Alberto Franco França បានបង្ហាញពីបំណងចង់បើកស្ថានទូតប្រេស៊ីល ប្រចាំនៅកម្ពុជា នាពេលខាងមុខ។ លោក ក៏បានស្វាគមន៍ចំពោះ បំណងរបស់កម្ពុជា ចង់បើកស្ថានទូតរបស់ខ្លួន នៅទីក្រុង Brasilia នាពេលខាងមុខផងដែរ។ លើសពីនេះ រដ្ឋមន្ត្រីទាំងពីរ បានឯកភាពពង្រឹង កិច្ចសហប្រតិបត្តិការអន្តរជាតិ កម្ពុជា-ប្រេស៊ីល និងបានសន្យាបង្កើនការគាំទ្រគ្នា ក្នុងក្របខ័ណ្ឌអន្តរជាតិ។
ប្រភពដដែល បានបន្តថាៈ ជំនួបជាមួយលោកស្រី Louise Mushikiwabo អគ្គលេខាធិការនៃ អង្គការអន្តរជាតិហ្វ្រង់កូហ្វូនី ៖
លោកឧបនាយករដ្ឋមន្ត្រី ប្រាក់ សុខុន បានពិភាក្សាផ្លាស់ប្តូរយោបល់គ្នា យ៉ាងស្និទ្ធស្នាល ជាមួយ លោកស្រី Louise Mushikiwabo ស្តីពីការជំរុញបន្ថែមទៀតនូវ កិច្ចសហប្រតិបត្តិការ រវាងកម្ពុជា និងអង្គការអន្តរជាតិហ្វ្រង់កូហ្វូនី (OIF) ជាពិសេស ក្នុងការជំរុញការផ្លាស់ប្តូរពាណិជ្ជកម្ម និងការវិនិយោគ នៅក្នុងរង្វង់អង្គការនេះ។
ភាគីទាំងពីរ បានយល់ស្របគ្នាថាៈ មានវិស័យសក្តានុពលជាច្រើន ដែលសមាជិក OIF អាចសហការគ្នា ដើម្បីផលប្រយោជន៍ទៅវិញទៅមក ដូចជាវិស័យកសិកម្ម និងថាមពល កកើតឡើងវិញ។
លោកស្រី Louise Mushikiwabo បានរំឮកឡើងវិញ ដោយក្តីរីករាយក្រៃលែង អំពីទស្សនកិច្ចនៅកម្ពុជា ប្រកបដោយជោគជ័យរបស់លោកស្រី កាលពីខែមីនា ឆ្នាំនេះ៕/V