Views: 2
ដោយៈ បូកគោ / កំពត: ដោយសារតែម្ចាស់ខកខាន មិនបានអនុវត្ត តាមសេចក្តីជូនដំណឹង នាពេលកន្លងមក កាលពីរសៀល ថ្ងៃទី១០ ខែសីហា ឆ្នាំ២០២២ រដ្ឋបាលខេត្តកំពត បានចុះរុះរើសំណង់បំពានយកដី ចំណីព្រែក ស្ថិតក្នុងភូមិជុំក្រៀល ឃុំជុំក្រៀល ស្រុកទឹកឈូ សម្រាប់ជំហានទីមួយ។ រដ្ឋបាលខេត្ត បានរុះរើស័ង្កសី ហ៊ុមព័ទ្ធដីដែលម្ចាស់ បានដាំដំណាំ និងខ្ចូសស្បូវ សម្រាប់អង្គុយលម្ហែប៉ុណ្ពោះ។ ចំណែករបងថ្ម និងសំណង់គ្រឹះ រឹងមាំ មិនទាន់បានរុះរើនៅឡើយទេ ពោលគឺ អាចនឹងចាត់ការ នាពេលក្រោយ។
លោក សេង សិរីបុត្រ អភិបាលរងខេត្តកំពត បានបញ្ជាក់ដូច្នេះ នៅពេលលោកបានដឹកនាំ កម្លាំងចម្រុះ ចុះរុះរើសំណង់បំពានយកដី ចំណីព្រែកនោះ។ លោកបានមានប្រសាសន៍ ទៀតថាៈ ក្រោយពីបានរុះរើរួចរាល់ រដ្ឋបាលខេត្ត នឹងយកតំបន់នេះ បង្កើតជាឆ្នេរ និងសួនធារណៈ សម្រាប់ភ្ញៀវមកលម្ហែកម្សាន្ត។
ទោះជាបែបនេះក្តី ក្រុមការងារ នៅមិនទាន់បញ្ជាក់ថា ប្រភេទរបងគ្រឹះ និងសំណង់រឹងមាំ ជាច្រើនកន្លែង ដែលបានបាញ់ថ្នាំតម្រូវឱ្យរុះរើនោះ នឹងចាត់ការនាពេលណានោះឡើយ។
សូមរំលឹកថា ផ្អែកតាមសេចក្តីជូនដំណឹង លេខ៤១២/២២ ស.ជ.ណ របស់រដ្ឋបាល ស្រុកទឹកឈូក ចុះថ្ងៃទី១ ខែសីហា ឆ្នាំ២០២២ មានខ្លឹមសារថាៈ កន្លងមក រដ្ឋបាលស្រុក ធ្លាប់បានចេញសេចក្តីជូនដំណឹង រួចមកហើយ ពាក់ព័ន្ធករណីសាងសង់ផ្ទះ ធ្វើរបង សង់ខ្ចូស ចាក់ដី ដាំដើមឈើ បំពានចូលដីចំណីព្រែក និងព្រែក ស្ថិតនៅភូមិកំពង់កណ្តាល និងភូមិជុំក្រៀល ឃុំជុំក្រៀល ស្រុកទឹកឈូ ដោយតម្រូវឲ្យផ្អាក រាល់សកម្មភាពទាំងអស់។ ម្ល៉ោះហើយ នៅថ្ងៃទី៣ ខែសីហា ឆ្នាំ២០២២ រដ្ឋបាលខេត្ត រួមទាំងមន្ត្រីនៃមន្ទីរជំនាញ ពាក់ព័ន្ធ នឹងចុះកាយអាចម៍ដី ដកដើមឈើ ក៏ដូចជាសំណង់ផ្សេងៗ ដែលបានសង់ចូលដី ចំណីព្រែក និងព្រែកទាំងនោះ។
សេចក្តីជូនដំណឹង បានបញ្ជាក់ផងដែរថាៈ នៅមុនថ្ងៃទី៣ ខែសីហា ឆ្នាំ២០២២ បងប្អូន ប្រជាពលរដ្ឋ អាចរុះរើដោយខ្លួនឯងបាន។ ដូច្នេះ សូមបងប្អូនប្រជាពលរដ្ឋ ដែលបានសាង សង់ផ្ទះ ខ្ចូស របង ចាក់អាចម៍ដី ដាំដើមឈើ តាមដងព្រែក ចាប់ពីស្ពានថ្មកំពង់ទ្រៀក រហូតដល់ទីបញ្ជាការកងទ័ពជើងទឹក ស្ថិតក្នុងភូមិកំពង់កណ្តាល និងភូមិជុំក្រៀល ឃុំជុំក្រៀល ស្រុកទឹកឈូ អនុវត្តតាមសេចក្តីជូនដំណឹង កុំបីខាន។ ក្នុងករណី មិនអនុវត្តតាមខ្លឹមសារទាំងនេះទេ រដ្ឋបាលស្រុកទឹកឈូ
សហការជាមួយរដ្ឋបាលខេត្ត ព្រមទាំងមន្ទីរជំនាញពាក់ព័ន្ធនឹងចុះរុះរើសំណង់ កាយអាចម៍ដី ព្រមទាំងដកដើមឈើទាំងនោះ ចេញ ដោយមិនទទួលខុសត្រូវរាល់ការខូចខាតទ្រព្យសម្បត្តិ របស់បងប្អូនប្រជាពលរដ្ឋឡើយ។ រីឯការចំណាយ ក្នុងការរុះរើផ្សេងៗ ជាបន្ទុករបស់ប្រជាពលរដ្ឋផ្ទាល់ ៕/V
